“E tatau i tane ona alolofa atu i a latou avā e pei o o latou lava tino. O lē e alofa i lana avā, e alofa o ia iā te ia lava, auā e leai se tane e ita i lona lava tino; ae e na te fafaga ma faapelepele i ai.”​—EFESO 5:28, 29.

O le tane o le ulu o le aiga. (Efeso 5:23) O se tane lelei e lē sauā pe pulepuletutū. E na te faatāua lana avā ma tausia o ia i le itu i le tino ma tau faalogona. E na te taumafai malosi e faafiafia o ia nai lo o le tausisi i le mea e manaʻo i ai. (Filipi 2:4) E saʻoloto e faailoa atu ona faalogona ma manatu i lana avā ma e faalogologo lelei. E lē “soona ita” pe faia ni tala e faatigā ai i faalogona o lana avā pe sauāina o ia.​—Kolose 3:19.

“A o le avā, ia matuā faaaloalo o ia i lana tane.”​—EFESO 5:33.

Pe a faaalia e le avā le faaaloalo i lana tane ma lagolagosua i ana faaiʻuga, ua ia saosaolaumea i le filemu o le aiga. Pe a faia e le tane se mea sesē, e lē faalumaina o ia e lana avā ae e tumau ona ia agamalu ma faaaloalo. (1 Peteru 3:4) Pe a manaʻomia ona ia talanoa atu i lana tane i se faafitauli, e na te filifilia se taimi talafeagai ma tautala atu ma le faaaloalo.​—Failauga 3:7.

ʻO le a nonofo faatasi le tane ma lana avā, ona avea ai lea o i laʻua ma tino e tasi.’​—KENESE 2:24.

O le a atiaʻe e se tamāloa ma se fafine se faiā vavalalata pe a faaipoipo. E tatau ona galulue le ulugalii ina ia faatumauina le malosi o lenā faiā, e ala i ni talanoaga mai i le loto ma faia gaoioiga lelei e le tasi i le isi. E tatau foʻi ona la faamaoni e ala i le lē faia o feusuaʻiga i fafo o le liʻo o le faaipoipoga. O le lē faamaoni o se mea e tigā, e faaleagaina ai le maufaatuatuaina e le tasi o le isi ma malepe ai le aiga.​—Eperu 13:4.

“Ia aʻoaʻo le tama e tusa ma le ala saʻo; a oo ina toeaina lava e lē liliuese ai o ia.”​—FAATAOTO 22:6.

Ua tuuina e le Atua i mātua le tiute tauave o le toleniina o a latou fanau. E aofia ai le aʻoaʻoina o i latou i le auala e amioaʻi ai ma faataatia ni faaaʻoaʻoga lelei mo i latou. (Teuteronome 6:6, 7) Pe a faalogogatā se tasi o le fanau, o se matua atamai e lē vave ona tali atu. E na te ʻfaalogologo lelei, e lē vave ona tautala, ma e lē vave foʻi ona ita.’ (Iakopo 1:19) Peitaʻi, afai ua manaʻomia ona avatu e se matua se aʻoaʻiga, e na te faia i se auala alofa ae e lē ona o lona ita.

“Le fanau e, ia usiusitaʻi i o outou mātua . . . ʻIa e āva i lou tamā ma lou tinā.’”​—EFESO 6:1, 2.

E tatau i fanau ona usiusitaʻi ma faaalia le matuā faaaloalo i mātua. Pe a faaalia e fanau le āva i o latou mātua, o le a latou saosaolaumea ai i le filemu o le aiga. E faaalia e fanau ua matutua le āva i mātua e ala i le faamautinoa ua tausia lelei i latou. E ono aofia ai le fesoasoani i mātua ia faatumauina le lelei o o latou fale pe avatu le fesoasoani tau tupe.​—1 Timoteo 5:3, 4.