Ioe, e suia e le Atua ona manatu pe a suia uiga o tagata. O se faataʻitaʻiga, ina ua taʻu atu e le Atua o le a faasalaina tagata Isaraelu na ia fetalai: “Atonu e latou te faalogo i ai, ona taʻitasi lea ma liliuese mai i lona ala leaga, ona sui ai lea o loʻu manatu i le malaia na ou mafaufau e faaoo atu iā i latou, ona o le leaga o a latou mea na fai.”​—Ieremia 26:3.

 O loo faaliliuina lenei fuaiupu i le tele o Tusi Paia na “salamō” le Atua i le malaia na mafaufau i ai, lea e foliga mai ai ua faia e le Atua se faaiʻuga sesē. Peitaʻi, o le upu Eperu e mafai ona uiga atu i le “suia o le manatu po o faanaunauga.” Na tusi se tagata atamai: “O le suia o amioga o se tagata fai mea sesē e suia ai le faamasinoga a le Atua.”

 O le mea moni, o le mafai ona suia o manatu o le Atua, e lē uiga ai e tatau ona suia ona manatu. Seʻi iloilo nisi o mea na tutupu o loo i le Tusi Paia e leʻi suia ai manatu o le Atua.

•   E leʻi faatagaina e le Atua Palako e suia Ona manatu ma fetuu ai i le nuu o Isaraelu.​—Numera 23:18-​20.

•   O le maumauaʻi o le tupu o Saulo e fai le mea leaga, na lē suia ai le manatu o le Atua e teena o ia e avea ma tupu o Isaraelu.​—1 Samuelu 15:28, 29.

•   O le a faataunuuina e le Atua lana folafolaga e avea lona Alo ma ositaulaga e faavavau, ma e lē mafai ona suia Lona manatu.​—Salamo 110:4.

 Ioe, ua fetalai le Atua: “Auā o aʻu o Ieova; ou te lē liliu lava.” (Malaki 3:6) O loo faapea mai foʻi le Tusi Paia, “e lē liliu pe fesuisuiaʻi e pei o se ata lafoia” le Atua. (Iakopo 1:​17) E lē feteenaʻi nei faamatalaga ma le faamatalaga a le Tusi Paia e faatatau i le suia o le manatu o le Atua. E lē mafai ona suia uiga o le Atua ma ana tapulaa e faatatau i le alofa ma le faamasinotonu. (Teuteronome 32:4; 1 Ioane 4:8) Peitaʻi, e mafai ona eseese faatonuga e na te avatu i tagata i taimi eseese. O se faataʻitaʻiga, e eseese faatonuga na avatu e le Atua i le tupu o Tavita, a o ia tauina ni taua se lua ma na taulau uma na faatonuga.​—2 Samuelu 5:​18-​25.

 E leai. Ae ua faanoanoa o ia ona o le toʻatele o tagata ua teena o ia. O loo taʻua i le Tusi Paia le tulaga o mea na iai a o leʻi oo le Lolo i aso o Noa. Ua faapea mai: “Ua salamō foi le ALII ina ua faia e ia tagata i le lalolagi, ma ua tiga ai lona finagalo.” (Kenese 6:6; Tusi Paia Samoa—Lomiga 1969) I lenei fuaiupu, o le upu “salamō” e faaliliu mai i le upu Eperu lea e uiga atu i le “suia o manatu.” Na suia manatu o le Atua e faatatau i le toʻatele o tagata na ola i le taimi o le Lolo, ona o a latou amioga leaga. (Kenese 6:​5, 11) E ui na faanoanoa le Atua ona na filifili na tagata e uia se ala leaga, ae e leʻi suia ai ona uiga e faatatau i tagata. O le mea moni, na ia faasaoina tagata mai i le Lolo, e ala ia Noa ma lona aiga.​—Kenese 8:​21; 2 Peteru 2:​5, 9.