O le Tusi Lona Lua a Peteru 2:1-22
2 Peitaʻi, na iai foʻi perofeta pepelo i le nuu o Isaraelu, o le a faapena foʻi ona iai aʻoaʻo pepelo iā te outou.+ E latou te aumaia faalilolilo i totonu vaega e faatupuina fevaevaea‘iga lea e fano ai, ma e oo foʻi ina latou lafoaʻia le matai na faatauina i latou,+ o i latou lava e vave oo mai ai lo latou faaumatiaga.
2 O le a mulimuli foʻi le toʻatele o tagata i a latou amioga faauamaaa,*+ ma e upuleagaina ai le ala o le upu moni ona o i latou.+
3 O lo latou manaʻo tele foʻi, e latou te faavalea ai outou i upu taufaasesē. Ae e lē faatuai mai lo latou faamasinoga na faia talu mai aso anamua,+ ma e oo mai lava lo latou faaumatiaga.+
4 O le mea moni, e leʻi taofia e le Atua lona faasalaina o agelu na agasala,+ ae na lafo i latou i Tatara,*+ ma saisaitia i latou* i le pogisa tele e faatalitali ai mo le faamasinoga.+
5 E leʻi taofia foʻi e ia lona faasalaina o le lalolagi tuai,+ ae na laveaʻiina Noa o lē e talaʻi le amiotonu+ ma isi e toʻafitu,+ ina ua ia aumaia le lolo i le lalolagi o tagata faalēmataʻu.+
6 Ina ua ia faaliu lefulefu aai o Sotoma ma Komoro, na ia taʻusalaina ai i latou,+ e fai ma faaaʻoaʻoga i mea o le a oo mai i tagata faalēmataʻu.+
7 Na ia laveaʻiina foʻi Lota le tagata amiotonu,+ o lē na matuā mafatia ona o amioga faauamaaa* a tagata solitulafono,
8 auā mai i lea aso i lea aso, na matuā tigā le loto o lenā tagata amiotonu ona o solitulafono na ia vaai ma faalogo i ai a o nonofo ma i latou.
9 O lea la, e silafia e Ieova* le auala e laveaʻi ai tagata e faamaoni iā te ia mai i o latou puapuaga,+ ae taofia tagata amiolētonu ina ia faaumatia* i le aso o le faamasinoga,+
10 aemaise ē ua faia feusuaʻiga ma isi ina ia faaleagaina ai i latou,+ ma ē ua ʻinoʻino i le pule.*+
E lē popoi i latou ma e lotomaaa, e lē fefefe foʻi e fai upu leaga i ē e mamalu,
11 a o agelu, e ui ina sili atu lo latou malosi ma le mana, ae e latou te leʻi molia i latou i le fai atu i ai o ni upu leaga, ona o le faaaloalo iā* Ieova.*+
12 A o tagata nei ua pei o ni manu e leai ni mafaufau, e gaoioi e tusa ai ma o latou lagona faalenatura, ma ua fananau mai ina ia puʻea ma fasimatea, ua latou fai upu leaga i mea e latou te lē iloa.+ O le a faaumatia i latou ona o o latou lava ala leaga,
13 ua faamanuʻalia ai i latou, o le taui lea o o latou lava ala sesē.
Ua latou manatu o se mea fiafia le ola i se olaga soonafai,+ e oo lava i le ao. Ua pei i latou o ila ma pona, ua soona fiafia i a latou aʻoaʻoga taufaasesē, a o faia a latou faigaʻai faatasi ma outou.+
14 Ua naunau tele i latou i le mulilua,*+ ma ua lē mafai ai ona sosola ese mai i le agasala, ua latou faaosooso foʻi i ē e lē o malolosi i le faatuatua.* Ua tumu o latou loto i le manaʻo tele.* O i latou o le fanau ua faamalaiaina.
15 Ua lafoaʻi le ala saʻo, ma ua taʻitaʻisesēina i latou. Ua latou mulimuli atu i le ala o Palaamo+ le atalii o Peoro, o lē na naunau i le taui o le fai mea sesē,+
16 ae na aʻoaʻia o ia ona o lona solia o le tulafono.+ O se asini e leai se leo, ae ua tautala mai i le leo o se tagata, ma faasalaveia ai le gaoioiga valea a le perofeta.+
17 O i latou nei o vaipuna e lē o iai ni vai, ma o ao ua lelea i matagi malolosi, ma ua tuu mo i latou le pogisa tele.+
18 Ua latou tautatala i upu faasausili e lē aogā. E ala i tuʻinanauga o le tino+ ma amioga faauamaaa,* ua latou faaosoosoina ai o ē ua faatoʻā sosola ese mai i tagata fai mea sesē.+
19 Ua latou folafola atu iā i latou le saʻolotoga, a o i latou lava ua avea ma pologa a le iʻuvale;+ auā o sē e faatoʻilaloina e se tasi, ua avea o ia ma pologa a lenā tagata.*+
20 E mautinoa lava, afai ua latou sosola ese mai i le faaleagaina e le lalolagi,+ ona o le poto saʻo i le Alii ma le Faaola o Iesu Keriso, ae ua toe aafia i latou i mea lava nei, ma toʻilalo ai i na mea, e sili atu ona leaga lo latou iʻuga nai lo o le amataga.+
21 Sa sili ai pe ana latou lē iloa lelei le ala o le amiotonu, nai lo o le iloa lelei, ae ua toe liliuese mai i le poloaʻiga paia na latou mauaina.+
22 Ua taunuu moni ai iā i latou le faataoto: “Ua toe foʻi le taʻifau i lona puaʻiga, ma ua toe taafili i le palapala le puaa fafine ua uma ona faatāʻele.”+
Faamatalaga Pito i Lalo
^ Po o “amioga leaga e aunoa ma le māsiasi.” O le upu Eleni, o le a·selʹgei·a. Tagaʻi i le Uiga o Upu.
^ Tagaʻi i le Uiga o Upu.
^ Pe atonu “tuuina atu i latou i le lua.”
^ Po o “amioga leaga e aunoa ma le māsiasi.” O le upu Eleni, o le a·selʹgei·a. Tagaʻi i le Uiga o Upu.
^ Ele., “tipiesea.”
^ Po o le “vaai maulalo i alii.”
^ Po o le “i luma o.”
^ Po o le “Ua tutumu o latou mata i le mulilua.”
^ Po o “ē ua tautevateva.”
^ Po o le “Ua toleni o latou loto ia manaʻo tele.”
^ Po o “amioga leaga e aunoa ma le māsiasi.” O le upu Eleni, o le a·selʹgei·a. Tagaʻi i le Uiga o Upu.
^ Po o le “faatoʻilaloina i se mea, ua avea o ia ma pologa i lenā mea.”
