Ina ua uma ona foafoaina le uluaʻi tane ma le fafine, na tuufaatasia i laʻua e le Atua i le faaipoipoga. Na ia faavaeina le faaipoipoga o se faiā faapitoa i le vā o le tane ma le fafine, lea e avea foʻi o se faavae tumau mo le aiga.—Kenese 1:27, 28; 2:18.

 E finagalo le Atua ia maua e ulugalii faaipoipo le fiafia. (Faataoto 5:18) Ua ia saunia tapulaa ma mataupu silisili i le Tusi Paia, e fesoasoani e taulau ai se faaipoipoga.

I lenei mataupu

•  O ā tapulaa a le Atua mo faaipoipoga?

•  O le ā le manatu o le Tusi Paia e faatatau i le nonofo eseese ma le tatalaina o le faaipoipoga?

•  Pe e manaʻomia ona lesitala faaletulafono se faaipoipoga ina ia talia ai e le Atua?

•  O ā matafaioi ma tiute tauave ua tuuina atu i tane ma avā?

•  Pe e faatalitalia e le Atua mai i ulugalii faaipoipo le faia o ni fanau?

•  E faapefea ona fesoasoani le Tusi Paia i laʻu faaipoipoga?

•  Mau o le Tusi Paia e faatatau i faaipoipoga

 E mai lava i le amataga, na faavaeina ai e le Atua le faaipoipoga e tuufaatasia ai se tane e toʻatasi ma se fafine e toʻatasi. (Kenese 2:24) E lē talia e le Atua le tele o avā a se tamāloa, o faiga faatauatane po o le nonofo faapōuliuli. (1 Korinito 6:9; 1 Tesalonia 4:3) Na aʻoaʻoina e Iesu ona soo ia mulimuli i le uluaʻi tapulaa na faavaeina e le Atua mo faaipoipoga.—Mareko 10:6-8.

 I le silafaga a le Atua, o le faaipoipoga o se faatulagaga e tumau. Pe a faaipoipo se tane ma se fafine, e la te tautō o le a faamaoni le tasi i le isi ma nonofo faatasi seʻia oo i le oti. E faatalitalia i laʻua e le Atua e tausia lenā tautoga.—Mareko 10:9.

 E iai taimi e manaʻomia ona nonofo eseese ai le tane ma le avā, e pei o le taimi e alu ai se tasi o i laʻua ona o se faalavelave i le aiga. Peitaʻi, e lē faalaeiauina e le Tusi Paia le nonofo eseese pe a tutupu faafitauli i le faaipoipoga. Nai lo o lea, pe a tutupu faafitauli ua faalaeiauina e le Tusi Paia ulugalii, ia toe faalelei.—1 Korinito 7:10.

 E na o le pau le māfuaaga faale-Tusi Paia mo le tatalaina o le faaipoipoga, o le mulilua. (Mataio 19:9) O lea, pe afai e filifili se ulugalii e nonofo eseese pe tatala le faaipoipoga ona o nisi māfuaaga e ese mai i le mulilua, e leai se tasi o i laʻua e saʻoloto faale-Tusi Paia e faia se tuugātala ma se isi pe toe faaipoipo foʻi.—Mataio 5:32; 1 Korinito 7:11.

 E faatalitalia e le Atua mai i Kerisiano le usitaʻi i tulafono a le malo e faatatau i faaipoipoga. (Tito 3:1) Pe a mafai ona lesitala faaletulafono le faaipoipoga a se ulugalii, e faaalia ai lo la faaaloalo i faipule silisili ae faapea foʻi le tapulaa a le Atua o le faaipoipoga o se faatulagaga e tumau. a

•   Tiute tauave a ulugalii. E tatau ona feutagaʻi ulugalii i se auala alofa ma faaaloalo. (Efeso 5:33) E tatau ona la faamalieina manaʻoga tau feusuaʻiga i se auala alofa, ma ʻalofia so o se faiga e atagia ai le lē faamaoni. (1 Korinito 7:3; Eperu 13:4) Pe afai e iai se la fanau, e iā i laʻua uma le tiute tauave o le tausia o le fanau.—Faataoto 6:20.

   E lē o taʻua auʻiliʻili mai i le Tusi Paia le auala e faia ai e ulugalii faaipoipo a la tiute i le tausia o manaʻoga faaletino ma feʻau i le aiga. E la te filifilia faatasi po o le ā le mea e sili ona lelei mo le la aiga.

•   Matafaioi a le tane. O loo taʻua i le Tusi Paia, “o le tane o le ulu lea o le avā.” (Efeso 5:23) O lona uiga, e tatau ona ia taʻimua i lona aiga ma faia filifiliga e aogā mo lana avā ma le fanau.

   E ao ona faamautinoa ua ia tausia o latou manaʻoga faaletino, tau faalogona ma le faaleagaga. (1 Timoteo 5:8) E na te faatāuaina uiga ma tomai o lana avā e ala i le galulue faatasi ma ia, ma amanaʻia ona manatu ma faalogona pe a faia filifiliga. (Faataoto 31:11, 28) O loo taʻua i le Tusi Paia e tatau ona faatino e le tane ona tiute tauave i se auala alofa.—Kolose 3:19.

•   Matafaioi a le avā. O loo taʻua i le Tusi Paia, e ao i le avā ona matuā faaaloalo i lana tane. (Efeso 5:33) E faafiafiaina le Atua pe a faataunuuina e le avā lana matafaioi.

   O lana matafaioi, o le fesoasoani lea i le tane i le faia o filifiliga lelei, ma lagolagosua i lona tulaga ulu. (Kenese 2:18) E taʻuleleia i le Tusi Paia se avā e faia lana vaega tāua i le faaipoipoga.—Faataoto 31:10.

 Leai. Na iai le taimi na faatonuina ai e Ieova ana auauna e fai ni fanau. (Kenese 1:28; 9:1) Peitaʻi, e lē faatalitalia Kerisiano e usitaʻia lenā faatonuga i aso nei. E leʻi faatonuina e Iesu ona soo ia fai ni fanau. E leʻi faapea mai foʻi ona soo e ao i ulugalii faaipoipo ona fai ni fanau. E filifili le ulugalii pe e faia sa la fanau pe leai.

 O loo iai i le Tusi Paia mataupu silisili e fesoasoani i ulugalii, e maua ai se amataga lelei o le faaipoipoga. E mafai foʻi ona fesoasoani i ulugalii e ʻalofia ai pe foʻia faafitauli.

 E fesoasoani mataupu silisili a le Tusi Paia i ulugalii . . .

•   ia faaalia le alofa moni.—1 Korinito 13:4-7; Kolose 3:14.

•   ia foʻia faafitauli.—1 Korinito 10:24.

•   ia avea ma ē e faalogologo lelei.—Iakopo 1:19.

•   ia faaalia le faaaloalo.—Roma 12:10.

•   ia lotofaamagalo.—1 Peteru 4:8.

•   ia faamaoni.—Mareko 10:9.

•   ia onosaʻi.—Efeso 4:2, 3.

•   ia galulue faatasi.—Failauga 4:9.

•   ia faamalosia lo la alofa.—Pese a Solomona 8:7.