O le Tusi iā Tito 3:1-15
3 Ia faamanatu atu pea iā i latou ina ia gauaʻi ma usiusitaʻi i malo ma pule,+ ina ia nofosauni mo galuega lelei uma,
2 aua neʻi faia ni tala leaga e uiga i se tasi, aua le faamisa, ae ia magafagafa,+ ma ia matuā agamalu i tagata uma.+
3 Auā na tatou vālea foʻi, ma lē usiusitaʻi, ma taʻitaʻisesēina, ma faapologaina i tuʻinanauga ma mea faafiafia eseese, ma faia amioga leaga ma le matauʻa, na inosia foʻi i tatou, ma na tatou feitagaʻi.
4 Peitaʻi, ina ua faaalia mai le agalelei ma le alofa o le Atua+ lo tatou Faaola i tagata
5 (e lē ona o galuega o le amiotonu na tatou faia,+ ae ona o lona alofa mutimutivale),+ na ia faaolaina i tatou e ala i le faatā‘eleina o i tatou lea ua maua ai le ola fou,+ ma e ala i le faafouina o i tatou e le agaga paia.+
6 O le agaga lenei na ia matuā liligiina mai iā i tatou e ala i lo tatou Faaola o Iesu Keriso,+
7 ina ua taʻuamiotonuina i tatou i lona agalelei faifua,+ ina ia mafai ai ona avea i tatou ma suli+ e tusa ma le faamoemoe o le ola e faavavau.+
8 E maufaatuatuaina nei upu, ma ou te manaʻo ina ia e faamatilatila atu pea nei mea, ina ia mafai ai e i latou e talitonu i le Atua ona taulaʻi atu o latou mafaufau i le tausisi i galuega lelei. E lelei nei mea ma e aogā i tagata.
9 Ia ʻaloese mai i fesili valea, ma tala o gafa, ma le femisaaʻi, ma finauga i le Tulafono, auā e leai se mea e maua ai ma e iʻuvale foʻi.+
10 A o se tagata e na te faasalalau ni aʻoaʻoga sesē,+ ia teena o ia+ pe a uma ona apoapoaʻia*+ muamua ma faalua,
11 i le iloaina ua liliuese lenā tagata mai i le ala ma ua agasala, ma ua ia faasalaina o ia lava.
12 Pe a ou aauina atu Aretima po o Tuiko+ iā te oe, ia e taumafai malosi e te sau iā te aʻu i Nikopoli, auā ua ou fuafua ou te nofo i inā i le tau mālūlū.
13 Ia avatu iā Sena, o se tagata e poto i le Tulafono ma Apolo ni mea mo la laʻua malaga, ina ia la maua mea e la te manaʻomia.+
14 Ae ia aʻoaʻoina o tatou tagata e tausisi i galuega lelei, ina ia latou fesoasoani i taimi e manaʻomia vave ai,+ ina neʻi lē fua mai+ i latou.
15 O loo momoli atu alofaaga o i latou uma o loo matou faatasi. Ia avatu oʻu alofaaga i ē o loo i le faatuatua e alolofa faapelepele iā i matou.
Tau ina ia iā te outou uma le agalelei faifua o le Atua.
Faamatalaga Pito i Lalo
^ Po o le “lapataʻia.”
