Ilamoommohu Tonga yinanni gobbaraati; Tonga 170 giddichuwa afidhinote wodiidi-galchimi Paasifikera noo gobbaati. Tonga heeˈnoommo yannara, garire diafiˈnoommoreeti; lawishshaho, korreentenna kaameelu dinonke. Ikkirono, baambu wayinna boodu lukkuwi noonke. Rosu cufamanno woyite, aninna lamu roduuwiˈya anniˈyara gate loosa kaaˈlineemmo; gatenke muuze, maxaaxeessa qolcoomanna buruka kaasiˈneemmo. Anninke maatenkera hasiisannore shiqishannohu, kuri coyibba hiˈreeti, hattono barru looso looseeti. Giddichuwate heeˈrannohu wolu manninte gede, maatenke Qullaawa Maxaafa lowo geeshsha ayirrissanno; qoleno beetekiristaane ganyine haˈneemmo. Ikkirono, woyyaabbino heeshsho heeˈra dandiineemmohu wole dureette gobba haˈnummoro callaati yine hendoommo.

 Tonaalee diro ikkieta, abbiˈya Ameerikaho Kaalifoorniya yinanniwa haˈne heeˈneemmo gede assinke. Hatte gobba bude rosa lowo geeshsha qarrissinonke! Miinju ragaanni heeshshonke woyyaabbinoha ikkirono, heeˈneemmo qooxeessi buxima, jaddonna jingilli assitanno dhagga batidhinoho. Duucha woyite hashsha hashsha qawwete luulo macciishshineemmo; qachinkera heeˈrannohu rooru manni durriiyyete gaamo waajjanno. Lowo manni insaneeto gargadhatenna gibbo gargarate yee massaara qodhanno. Hatte yannara gannoonnie giirchi xaa geeshsha gagasiˈyara no.

 Layinki dirimi roso rosanni heeˈre, wolootu wedelli gede ikka hasiˈrummo. Hakko daafira, sunu sununni akkimale ikkinanni jila haˈra, quwa sae aga, jaddo loosanna jallaagishshanno dhagga adha hanafummo. Gedensoonni kokeyini yinannihu jingilli assanno xagichi araado amaddue. Konne jingilli assanno xagicho hidhate yee moora hanafummo. Maateˈya beetekiristaane ganyite hadhannoha ikkirono, ane kayinni darawoˈya huntannoekki gede amaalannoehu dino. Polise jaddo loosanna duucha higge amadde usurtinoe. Heeshshoˈya anganni fulte baˈino! Gedensoonni usuru minira essinie.

 Mitto barra 1997 usuru mine heeˈreenna, mittu usuranyi anga Qullaawa Maxaafa laummo. Hatti Gannu woggaati; Tonga manni Gannu ayyaana lubbora ayirrisanno. Hakku usuranyi, ‘Yesuusi ilamino yanna daafira Qullaawu Maxaafi mayyaannoro afootto?’ yee xaˈmieta ‘Diafoommo’ yee qolummosi. Hakkiinni Qullaawu Maxaafinni Yesuusi ilama daafira kultanno xagge leellishie; Gannu ayyaanira assinanni coyi giddo rooru Qullaawu Maxaafi giddo nookkita huwatummo. (Maatewoosi 2:1-12; Luqaasi 2:5-14) Tini lowo geeshsha dhagge ikkitinoe daafira, ‘Qullaawu Maxaafi wolere mayyaanno ikka?’ yee hedummo. Isi, Yihowa Farciˈraasine lamalate kiiro usuru mine assidhanno gambooshshira koyisieta ledosi haˈrummo. Hatte yannara insa Ajuujate maxaafa xiinxallitanni no. Hasaabbannori hakkeeshsha leellinoekkiha ikkirono, rosiissannori baalu Qullaawu Maxaafi aana xintaminota huwatummo.

 Insa Qullaawa Maxaafa xiinxallinseemmohe yitueta hagiirrunni maahoyye yuummo. Albillitte uulla gannate ikkitanno yaannoha Qullaawu Maxaafi roso umo macciishshoommohu hattee yannaraati. (Isayaasi 35:5-8) Magano hagiirsiisate, heeshshoˈya giddo lowore biddi assiˈra hasiissannoeta wodanchummo. Qoleno, Maganu Yihowa, busha gade adhe Gannate eammora fajjannoekkita huwatummo. (1 Qorontoosi 6:9, 10) Hakko daafira, hanqoˈya eemadhate, hattono sijaara, agattote araadonna jallaagishshanno dhagga agurate sharramummo.

 Yoo yinoonnie diri goofikkinni, 1999 daramino manni heeˈranno kaampe sonkie. Mitto diro saˈanno yanna geeshsha Yihowa Farciˈraasine ledo xaada didandoommo. Ikkirono, heeshshoˈya biddi assiˈrate murciˈroommo. Gashshootu hatte gobbara heeˈrate uyinoonnie fajjo hoole Ameerikunni fushshe shorrieta 2000 Tonga higummo.

 Tonga higummoti, bayichonko Yihowa Farciˈraasine hasiˈre wirro Qullaawa Maxaafa xiinxalla hanafummo. Roseemmo rosi baasa baxisinoe; Ameerikaho noori Yihowa Farciˈraasinente, gede Tonga heedhannorino rosiissanno rosi Qullaawu Maxaafi aana xintaminota wodanchummoti dhagge assiˈrummo.

 Anniˈyara beetekiristaanete giddo silxaane noosi daafira, qooxeessaho heeˈranno manni ayirrisannosi. Hakko daafira, Yihowa Farciˈraasine ledo gamba yaaˈya umi qara maateˈyara hibbo ikkitinonsa, qoleno insa lowo geeshsha giirantino. Gedensoonni kayinni anniˈyanna amaˈya Qullaawu Maxaafi amaale heeshshoˈya biddi assiˈrate kaaˈlitinoeta afiti hagiidhino.

 Qarra ikkinoe coyi giddo mittu, qooxeessinkera noota mannu quwa sayise agannota mitte agatto agurate. Batinyu Tonga labballi, lamalate kiiro Kaava yinannita qaarete rumushshinni qexxeessinannita jallaagishshanno agatto aganni lowo saate keeshshanno. Anino Ameerikunni qaera higummoti, hashsha hashsha tenne agatto qixxeessinanni minira haˈranni quwa sayise ageemmo. Qullaawu Maxaafi rosi garinni heeˈrannokki manni ledo hosaˈya, konni qarrira tugginoe. Gedensoonni kayinni, tini gade Magano dadillissannota rosummo. Magano hagiirsiisatenna atootesi afiˈrate, heeshshoˈya biddi assiˈrummo.

 Yihowa Farciˈraasine assidhanno gambooshshe baalanka haˈra hanafummo. Yihowa hagiirsiisanno manniwa aanaˈya, busha gade agurate kaaˈlitinoe. Hakkiinni 2002 cuuame Yihowa Farciˈraasincho ikkummo.

 Maganu cinca lowo geeshsha kaaˈlitinoe; Qullaawu Maxaafi, Maganu “Baalunku aagintaawe higaranna ayino baˈˈara hasiˈrannokki daafira, kiˈnera yee cincino” yaanno. (2 Pheexiroosi 3:9) Maganu tenne busha alame lowo dirira albaanni huna dandaanno; ikkollana cincino daafira, ane gedee manni isi ledo jaalooma kalaqiˈra dandiino. Qoleno, wolootu jaallasi ikkitanno gede kaaˈlate, ane horoonsiˈranni nooe yee hedeemmo.

 Yihowa kaaˈlinoe daafira, heeshshoˈya woyyaabbino. Xa busha araadora yee dimooreemmo. Hatteentenni, olliichiˈyano Yihowa jaalla ikkanno gede kaaˈlate sharrameemmo. Yihowa Farciˈraasinewa aanaˈyanni, lowo geeshsha baxeemmo galteˈya Tiya afiˈroommo. Xa qaaqqinke ledo hagiirrunni heeˈneemmo. Qoleno Qullaawu Maxaafi albillitte keeru woˈmino gannatera hegerera heeˈnoommota kulanno hexxo mannaho rosiinseemmo.