Yihowa Farciˈraasine Pirotestaantete?
Deeˈni. Ninke Yihowa Farciˈraasine Kiristaanaho; kayinni Pirotestaante diˈˈikkinoommo. Hatto yineemmohu mayiraati?
Pirotestaantete yaa “Roomu Kaatolike gibbe fultino ammaˈnooti” yine tirroonni. Ninke Yihowa Farciˈraasine Kaatolikete Beetekiristaane rosiissanno rosi ledo sumuu yineemmokkiha ikkirono, Pirotestaante kayinni diˈˈikkinoommo; korkaatuno:
Pirotestaantete ammaˈno rosiissannohu batinyu rosi Qullaawu Maxaafi yaannori ledo sumuu diyaannoho. Lawishshaho, Qullaawu Maxaafi Sillaase yinanni Magani noota dikulanno; hatteentenni, “Maganu mittoho” yaanno. (1 Ximootewoosi 2:5; Yohaannisi 14:28) Qoleno Maganu bushuulle qorichishannohu sioolete giiranni ikkikkinni hegere bao baˈanno gede asse ikkinota Qaalisi kulanno.—Faarso 37:9; 2 Teselonqe 1:9.
Kaatolikete Beetekiristaane hettinseemmore diˈˈikkinoommo; qoleno ise woy wole aye ammaˈnono haaroonsate woˈnaalleemmore diˈˈikkinoommo. Hatteentenni, Maganu Mangisteha dancha duduwo dudumbeemmo; hattono mannu hakkonne dancha duduwo ammananno gede kaaˈlate sharrammeemmo. (Maatewoosi 24:14; 28:19, 20) Hasattonke wole ammaˈno haaroonsine woyyeessa ikkitukkinni, wodana subbinorira Maganunna Qaalisi Qullaawu Maxaafi halaale rosiisate.—Qolasiyaasi Sokka 1:9, 10; 2 Ximootewoosi 2:24, 25.