Ee, kaaˈlannohe! Qullaawu Maxaafi “dadillitinore jawaachishanno Magani” qixxeessino Maxaafaati. (2 Qorontoosi 7:6) Qullaawu Maxaafi surrete dhibba xagisate hende qixxeessinoonniha ikka hoogirono, batinye manna insaneeto shaate hedonsa qeeˈlanno gede kaaˈlino. Aannoti dancha amaale aterano kaaˈlitannohe.

•  Qullaawu Maxaafi hiittenne kaaˈlitanno amaale aanno?

•  Qullaawu Maxaafi reyo halchino mannire kulanno?

•  Ateneeto shaate hedo qeeˈlate kaaˈlitannoheti Qullaawu Maxaafi qummeeshshuwa hiikkuriiti?

•  Mittu manchi hexxo mudhe “Reyo woyyitannoe” yiiro maa assa dandaatto?

•  Konni albaanni ateneeto shaate woˈnaalte egennoottoha ikkirona?

• ● Wodanikki xisso wolootaho kuˈli.

   Qullaawu Maxaafi yaannore: “Jaalu woˈmanka woyite jaalaholla; roduuno qarru barra iillanno.”—Lawishsha 17:17.

   Qummeeshshu tiro: Yaaddo amaddannonke woyite, wolootu kaaˈlo hasiissannonke.

   Wodanikki xisso maaxidhe sammi yaattoha ikkiro, duhu wolqakkira aleenni ikkahera dandaanno. Wolootaho kuˈlattoha ikkiro kayinni, beedho afiˈrattoranna qarrakki wolu garinni laˈˈattora dandaatto.

   Togo assate woˈnaali: Ballo xissokki techonni mitoho kuˈli; lawishshaho maatekki miilira woy ammanatto jaalira hasaapha dandaatto. a Qoleno giddokkita woraqataho borreessakki, hedokki xawisate kaaˈlitahera dandiitanno.

• ● Akimenniwa haˈri.

   Qullaawu Maxaafi yaannore: “Dhiwantinorira ikkinnina fayyaaleeyyete xagisaanchu dihasiisannonsa.”—Maatewoosi 9:12.

   Qummeeshshu tiro: Dhiwammeemmo woyite akimete kaaˈlo hasiissannonke.

   Meessaneeto shaate heda, surrete xissora malaate ikkitara dandiitanno. Surrete xisso wolu dhibbi gedeentilla ikkinnina saalfantannire diˈˈikkino. Akimootu surrete xisso xagisse hursitara dandiitanno.

   Togo assate woˈnaali: Ballo rakke dancha gede xagisanno akimichiwa haˈri.

• ● Maganu ate daafira hedannota qaagi.

   Qullaawu Maxaafi yaannore: “Onte gurrae lame saantera hirranni diheeˈnoonni? Maganu hakkuri giddonni mitticho nafa dihawanno. . . . Waajjitinoonte; kiˈne lowo gurraenni roortinanni.”—Luqaasi 12:6, 7.

   Qummeeshshu tiro: Heeshshokki Maganu albaanni lowo waaga afidhinote.

   Caaqqi yee laˈˈannohehu nookkiha lawihero nafa, Maganoho qarrikki leellannosi. ‘Xaate heeˈra dihasiˈreemmo’ yite hedittoro nafa, isi ate daafira hedanno. Faarso 51:17 Magano, “Heeshshi yiinohanna atewa higino wodana dimishatto” yitanno. Maganu baxannohe daafira heeˈrattora hasiˈranno.

   Togo assate woˈnaali: Maganu baxannoheta leellishshannota Qullaawu Maxaafi taje xiinxalli. Lawishshaho, Ella 2016 Agarooshshu Shaera qoola 3-5 nooha “Yihowa Ate Daafira Hedanno” yaanno birxichonna Yihowawa Shiqi (Amaaru Afoo) yaanno maxaafa fooliishsho 24 nabbawi.

• ● Magano huucciˈri.

   Qullaawu Maxaafi yaannore: “Kiˈnere malannohu isootina [Maganohona], qarrisannoˈnere baala isi aana tuqqe.”—1 Pheexiroosi 5:7.

   Qummeeshshu tiro: Maganu wodanikki xissonna yaachishanni noohe coye baalanka hasaaphattosira koyisinohe.

   Maganu qarrakki cincate kaaˈlitannohe jawaantenna giddoyidi keere aannohe. (Filiphisiyusi Sokka 4:6, 7, 13) Kaaˈlo afiˈrate iso huuccidhannore konni garinni irkisannonsa.—Faarso 55:22.

   Togo assate woˈnaali: Techonni Magano huucciˈri. Yihowa yinanniha suˈmasi gante, giddiidi xissokki isira kuˈli. (Faarso 83:18) Qarrakki dandaatto gede jawaante aahera huucciˈri.

• ● Qullaawu Maxaafi albillittete yanna daafira kulanno hexxo hiinci.

   Qullaawu Maxaafi yaannore: “Tini hexxo heeshshonkera milli miqqi yaannokkihu addaxxinanni mokkollichi gedeete.”—Ibiraawoota 6:19.

   Qummeeshshu tiro: Hombobalatte kawanna kaˈa raateessitanni noo markaawe gede giddiidi hedokki heeshshinna gotti yituro nafa, Qullaawu Maxaafi giddo noo hexxo kiˈahera dandiitanno.

   Qullaawu Maxaafi giddo noo hexxo haaqeete halcho diˈˈikkitino; tenne hexxo uyinohu xissiisiˈneemmo gede assannonke coye baalanka huneemmo yee qaale eino Maganooti.—Yohaannisi Ajuuja 21:4.

   Togo assate woˈnaali: Qullaawu Maxaafi kulanno hexxore ledde afate, Maganuwiinni Dayinoha Dancha Duduwo! yitanno biroshereha 5ki roso nabbawi.

• ● Hagiirsiisannohe coye assi.

   Qullaawu Maxaafi yaannore: “Hagiirraamu wodani mannimmate fayyimma aanno.”—Lawishsha 17:22.

   Qummeeshshu tiro: Hagiirsiisannonke coye assineemmo woyite, surrenkenna mannimmanke fayyimma woyyaabbara dandiitanno.

   Togo assate woˈnaali: Hagiirsiisannohe coye assi. Lawishshaho, baxatto muuziiqa macciishsha, jawaachishannore kultanno borro nabbawa, woy wole baxisannohe coye assa dandaatto. Qoleno shiimare assite nafa woloota kaaˈlittoro, hagiirrikki lexxara dandaanno.—Soqqamaasinete Looso 20:35.

• ● Ordu fayyimmakki towaaxxi.

   Qullaawu Maxaafi yaannore: “Manninate kaajjishiˈrate rosi . . . kaaˈlanno.”—1 Ximootewoosi 4:8.

   Qummeeshshu tiro: Mannimmate guunte millimmo, dancha gede goxicho afiˈra, hattono kiˈanno sagale ita kaaˈlitanno.

   Togo assate woˈnaali: Gobba fulte, 15 daqiiqano ikkiro ariiffatte qaafi.

• ● Wodanikki hedonna heeshshokki giddo mitu coyi soorramara dandaannota qaagi.

   Qullaawu Maxaafi yaannore: “Gaˈa ikkannore affinoonnini?”—Yaiqoobi 4:14.

   Qummeeshshu tiro: Qarrinke, wole agurina mala diafiˈrinoho yine hendoommo qarri nafa, noo gedeenni heeˈra hoogara dandaanno.

   Techo ragu baalu tunsinkero nafa, gaˈa coyi woyyaawara dandaanno. Hakko daafira, ballo cincite saˈˈatto gara hedi. (2 Qorontoosi 4:8) Xa hexxo mudhatto gede assinohe coyi gale hosanni woyyaawara dandaanno; ateneeto shiittoro kayinni, lubbokki qolte diafatto.

   Togo assate woˈnaali: Qullaawu Maxaafi giddo hexxo mudhe reyo halchino mannire kultanno xagge nabbawi; konni manni heeshsho galte hossanni insa hedinokki garinni woyyaabbino gara wodanchate woˈnaali. Hanni mito lawishsha laˈno.

 Ee, Qullaawu Maxaafi mitu manni reyo halchinota kulanno. Maganu konne manna diboroorino; hatteentenni kaaˈlinonsa. Ateno kaaˈlannohe.

Eeliyaasi

•  ● Eeliyaasi ayeti? Eeliyaasi worba masaalaanchooti. Ikkirono isi hexxo mudhino woyiti no. Yaiqoobi 5:17, “Eeliyaasi ninke gedee manchooti” yitanno.

•  ● Isi reyo halchinohu mayiraati? Eeliyaasi mitte hige callatino, waajjino, hattono waagu dinoe yee hedino. Konni daafira isi “Lubboˈya haaˈri” yee Yihowa huucciˈrino.—1 Mootoolla 19:4.

•  ● Mayi kaaˈlisiyya? Eeliyaasi giddiidisi hedo gudise Maganoho kuˈlino. Maganu iso jawaachishinosihu hiittoonniiti? Maganu Eeliyaasi daafira hedannota leellishino; hattono wolqasi mageeshshi geeshsha lowotero huwatanno gede kaaˈlinosi. Qoleno Eeliyaasi xaano waagu noosiha ikkinota huwatanno gede assino; hattono Eeliyaasira towaatannosiha dancha soqqamaancho uyinosi.

•  ▸ Eeliyaasi xagge nabbawi: 1 Mootoolla 19:2-18.

Iyyoobi

•  ● Iyyoobi ayeti? Iyyoobi dureessaho, halaalaancho Magano magansiˈrannohonna maate noosi manchooti.

•  ● Isi reyo halchinohu mayiraati? Iyyoobira hedeweelcho buutote qarri iillinosi. Noosi jajji baalu goofino. Oososi baalanti danotenni mitteenni gooffino. Buutote dhibbi amadinosi. Qoleno, mararro afiˈrinokki manni, ‘Qarru amadannohe gede assiˈroottohu umokkiiti’ yee beebbatenni rufinosi. Konnira Iyyoobi togo yiino: “Heeshshoˈya mishoommo; heeˈrammora horontanni dihasiˈreemmo.”—Iyyoobi 7:16.

•  ● Mayi kaaˈlisiyya? Iyyoobi Magano huucciˈrino; qoleno wolootaho hasaaphino. (Iyyoobi 10:1-3) Eelihu yinannihu mararanno jaalisi jawaachishinosi; qoleno Eelihu, Iyyoobi qarrasi wolu raginni hedanno gede kaaˈlinosi. Roorenkanni kayinni, Iyyoobi Maganu amaalenna kaaˈlo maahoyye yee adhino.

•  ▸ Iyyoobi xagge nabbawi: Iyyoobi 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Muse

•  ● Muse ayeti? Muse hundite Israeelete daga sooreessaati; qoleno ammanamino masaalaanchooti.

•  ● Isi reyo halchinohu mayiraati? Musera loosu batiˈrinosi, hattono mannu duucha woyite mishannosi woy arrassannosi; qoleno isi, kawii sae didandeemmo yee hedino. Hakko daafira, “Rakke shiie” yee Magano huucciˈrino.—Kiiro 11:11, 15.

•  ● Mayi kaaˈlisiyya? Isi giddosita fushshe Maganoho kuˈlino. Maganu, Musera duha ikkinosi looso shaashshe yaachishannosire ajishino.

•  ▸ Muse xagge nabbawi: Kiiro 11:4-6, 10-17.