Ee no; Qullaawu Maxaafi giddo Maganu noota buuxissannoti ammansiissanno taje no. Maganu no yine ammana hasiissannonkehu mulla taje nookkiha woy ammaˈnonke hatto yitino daafira diˈˈikkino; hatteentenni Qullaawu Maxaafi, baalanka coye ‘fonqolle laˈneemmo’ gedenna ‘wodanchate’ dandoonke horoonsiˈneemmo gede jawaachishannonke. (1 Teselonqe 5:21; 1 Yohaannisi 5:20) Hanni Qullaawu Maxaafi kulannota aante noota ammansiissanno taje huwati:

•   Amanyootunni qinaabbinotinna heeshshote kalaqami nooti kalqete alame Kalaqaanchu noota leellishshanno. Qullaawu Maxaafi togo yaanno: “Baalunku mini minannoha afiˈrino. Baalankare loosinohu kayinni Maganoho.” (Ibiraawoota 3:4) Batinyu lowo roso rosino manni, huwatate qarrissannokkiti tini hedo ammansiissannota ikkitinota huwatino. a

•   Ninke mannu oosora, kalaqamunni heeshshote yaa mayyaateronna heeˈneemmohu mayiraatiro afate hasatto noonke; manninatinkera hasiisannori heeˈrinkero nafa, tini hasattonke woˈma hoogguro harshammi diyineemmo. Qullaawu Maxaafi ayyaanaamittete hude daafira kulannohu iseraati; tenne giddo mitte, Magano afatenna iso magansiˈrate noonke hasattooti. (Maatewoosi 4:4; Yohaannisi Ajuuja 4:11) Tini ayyaanaamittete hasattonke, Maganu noota leellishshanno taje calla ikkitukkinni isi tenne hasattonke wonshiˈnammora hasiˈrannoha shaqqado Kalaqaancho ikkinota leellishshanno.

•   Qullaawu Maxaafi giddo kulloonniti mitto mittonka coye tittirte kultanno masaalo lowo xibbi diri gedensaanni woˈmitino. Masaalote giddo kulloonnihu mittu mittunku coyi gatikki woˈmasi, tenne masaalo coyiˈrinohu mannunnita roortino wolqa noosi Magani noota leellishanno.—2 Pheexiroosi 1:21.

•   Qullaawa Maxaafa borreessituri hakkawaro noohu wolu manni huwatinokkiha sayinsete coye huwattino. Lawishshaho hundi waro noohu batinyu manni baatto daaniichu, manchaame woy bootu duhe amadino yite ammantanno. Qullaawu Maxaafi kayinni Maganu ‘baatto mulla darga rarraasinota’ kulanno. (Iyyoobi 26:7 ) Hatteente gede, Qullaawa Maxaafa umo borreessinoonni qaalinni Isayaasi 40:22 baatto qunqumado ikkitinota kultanno. Batinyu manni, Qullaawu Maxaafi borreessaano togoota baxxitino egenno afidhinohu Maganu kulinonsa daafiraati yee ammananno.

•   Qullaawu Maxaafi batinye qarrissanno xaˈmuwara dawaro qolanno; mittu manchi tenne xaˈmuwara duushshitanno dawaro afiˈra hoogiro Maganu dino yee hedara dandaanno. Lawishsha: Maganu baxillaanchonna woˈmanka dandaannoha ikkina, alamete aana qarrunna bunshe togo batidhinohu mayiraati? Ammaˈno duucha woyite mannu danchare ikkikkinni bushare assanno gede xixxiibbannohu mayiraati?—Tiito 1:16.