Maganu mannu oosora, huuccattotenni isi ledo hasaawatenna giddonsata isira kuˈlate dandoo uyinonsa; tini baxxitino eltooti. Masaalaanchu Daawiti togo yee huucciˈrino: “Mannu baalu . . . atewa daanno; atino huuccattonsa macciishshatto.” (Far. 65:2, 3) Ikkina Maganu huuccattonke macciishshanno gedenna atootesi aannonke gede hiittoonni huucciˈra hasiissannonke?

Hojjinke huucciˈneemmo huuccatto Maganoho giddonketa gudinse hasaaphineemmo faro fantannonke. (Faarso 62:8) Woˈmanka Dandaanno Magani woˈma giddonni huucciˈneemmo huuccatto baxanno.

Maganoho duuchu suusu suˈmi noosiha ikkirono, umisihu mittu suˈmi calla noosi. Isi togo yiino: “Ani Yihowaati. Suˈmiya konneeti.” (Isayaasi 42:8, NW) Yihowa yinanni suˈmi, Qullaawa Borro giddo 7,000 meddi yaanno bayicho no. Batinye masaalaano Magano suˈmasi gante huuccidhino. Abirihaami, “Yihowa, ballo xaano coyiˈreemmo” yiino. (Kalaqama 18:30, NW) Ninkeno huuccatto assiˈneemmo woyite, Yihowa yinanniha Maganu suˈma ganne huucciˈra hasiissannonke.

Coyiˈneemmo qaali ikkihano ikkiro, Maganoho hedonkenna hasattonke leeltannosi. Qaalisi togo yee jawaachishannonke: “Maganu manna [dimallaadanno]; . . . Aye gosano ikkiro Maganu waajjannosihanna dancha loosannoha baxanno.”—Soqqamaasinete Looso 10:34, 35.

Ikkirono, Maganu aanno atoote afiˈrate huucciˈratenni sainore assa hasiissannonke. Aananno birxichira, maa assa hasiissannonkero laˈneemmo.