Yannankera halaalenna kapho bada roore qarra ikkitinoha lawannohe? Xaa yannara mannu halaalenna adda ikkinore agure uminsa hedonna wodaninsata ammananno. Alamete doyichora batinyu manni ‘Halaaleho yinanniri dino’ yee ammanannoha ikkino.

 Togoo lao hige haaro diˈˈikkitino. Mitu 2,000 diri albaanni, Roomu Gashshaanchi Phanxiyosi Philaaxoosi Yesuusa ashshiishshanni “Halaalu maati?” yee xaˈmino. (Yohaannisi 18:38) Philaaxoosi Yesuusi xaˈmosira dawaro qolara agadhinokkiha ikkirono, xaˈmosi dawaro afiˈra hasiissannote. Qullaawu Maxaafi tenne xaˈmora ammansiissanno dawaro qolanno; qolanno dawarono tenne mannu addanna xara bada hooge gurchaawino alamera halaale afatto gede kaaˈlitahera dandiitanno.

Isi halaalu umisi nooyya?

 Ee, no. Qullaawu Maxaafi “halaale” yaanno qaale adda ikkinorenna amanyootunni gara ikkinore kulate horoonsiˈranno. Qoleno Magano Yihowa a “Halaalu Magano” yinoonni daafira, Qullaawu Maxaafi kulanno garinni halaalu Buicho Yihowaati. (Faarso 31:5) Qullaawu Maxaafi Maganuwiinni dayino halaale kulanno; qoleno tenne gurchaabbino alame aana massagannonke daafira, halaale xawaabbu ledo heewisiinsoonni.—Faarso 43:3; Yohaannisi 17:17.

Halaale afa dandaattohu hiittoonniiti?

 Maganu Qullaawu Maxaafi kulanno halaale ille ximbiiˈline ammannammora dihasiˈranno. Hatteentenni, wodananke addaxxa agurre hedate dandoonke horoonsiˈne xiinxallinammora hasiˈranno. (Roomu Sokka 12:1) Yihowa iso seekkine anfammoranna ‘woˈma hedonkenni’ banxammosira hasiˈranno; qoleno Qullaawu Maxaafi kulannonkeri halaale ikkinota buuxiˈnammora hasiˈranno.—Maatewoosi 22:37, 38; Soqqamaasinete Looso 17:11.

Kaphu dayihu mamiinniitiyya?

 Qullaawu Maxaafi kulanno garinni, umo kapho coyiˈra hanafinohu Maganu diini Sheexaane Daawuloosiiti; Qullaawu Maxaafi isi “kaphu anna” ikkinota kulanno. (Yohaannisi 8:44) Isi umi mannira Maganu daafira kapho coyiˈrino. (Kalaqama 3:1-6, 13, 17-19; 5:5) Sheexaanu hakkuyinku, kapho tuqisanna Maganu halaale diwa diagurino.—Yohaannisi Ajuuja 12:9.

Xaa yannara kaphu togo batiˈrinohu mayiraati?

 Tenne “goofimarchu barra” yinanni yannara, Sheexaanu albinni roore lowo manna doganninna soˈrisiisanni no. Batinyu manni manna doge mitore afiˈrate yee kapho coyiˈranno. (2 Ximootewoosi 3:1, 13) Yannankera batinye ammaˈno giddono kaphu halaˈlino. Qullaawu Maxaafi giddo balanxe masaalloonninte gede, mannootu “halchitanno coye rosiissannonsare gamba assidhanno. Kunnira, halaale agurte, maatto macciishsha baxxanno.”—2 Ximootewoosi 4:3, 4.

Halaalu hasiisannohu mayiraati?

 Halaalu mannu mimmito ammanannonna addaxxanno gede assanno. Ammanama hoogguro jaaloomunna dagoomu diigamanno. Qullaawu Maxaafi, Maganu halaalunni magansiˈnammosira hasiˈrannota kulanno. Togo yaanno: “Magansidhannosirino Ayyaanunninna halaalunni magansidhasira hasiisanno.” (Yohaannisi 4:24) Qullaawu Maxaafi halaali, ammaˈno rosiissanno kapho badde afatto gedenna togoo kaphinni dogamattokki gede kaaˈlannohe gara afate, “Magano Baxa Qarra Ikkitanno Gede Assino Kapho” yaanno umi hunda aante aantete fultino birxichuwa nabbawi.

Maganu halaale anfammora hasiˈrannohu mayiraati?

 Maganu gato afiˈrattora hasiˈranno; tennera kayinni halaale afa hasiissannohe. (1 Ximootewoosi 2:4) Maganu kuni danchaho kuni bushaho yee fushshino seera rosse hakko seerinni galattoha ikkiro, isira muli jaala ikkatto. (Faarso 15:1, 2) Mannu halaale afara yee Maganu Yesuusa uullara soyino. Maganu Yesuusi rosiisino roso baala macciishshinammora hasiˈranno.—Maatewoosi 17:5; Yohaannisi 18:37.

Maganu kapho baala coˈo asse hunanno yanna dagga ikka

 Ee dagganno. Maganu mannu umisi qiniitira yee wole dogannota effire giwanno. Isi kaphonna sarxe coyidhanni heeˈra doodhitinore baala baattote aaninni hunara qaale eino. (Faarso 5:6) Isi hatto assanno woyite, “Halaalu kayinni hegerera heeˈranno” yitanno hexxono woˈmitanno gede assanno.—Lawishsha 12:19.