Ye so ayeke nzoni nga ye so ayeke sioni: Tongana nyen la Bible apeut ti aidé e?
Bâ aye osio so na yâ ni Bible a-aidé azo kutu mingi.
1. Mariage
Azo ayeke na abango nde nde na ndö ti mariage nga na ndö ti ye so apeut ti sara si ala duti na ngia.
BIBLE ATENE: “A lingbi koli oko oko na popo ti ala andoye wali ti lo legeoko tongana ti so lo ndoye terê ti lo wani. Na mbage, a lingbi wali ane koli ti lo mingi.”—aÉphésien 5:33.
NDA TI TËNË NI: Nzapa la azia gere ti mariage na sese. Tongaso, lo hinga ye so azo so asara mariage ayeke na bezoin ni ti tene ala duti na ngia (Marc 10:6-9). Tongana koli na wali so asara mariage awe apensé na mba ti lo mingi ahon lo wani, ala use kue ayeke duti na ngia. Mbeni koli so aye wali ti lo ayeke bâ lege ti lo nzoni nga lo yeke sara ye na lo na nzoni bê. Nga, mbeni wali so ane koli ti lo ayeke mû maboko na lo na lo yeke fa so lo ne koli ti lo na lege ti sarango tënë ti lo nga na sarango ye ti lo.
AWANGO TI BIBLE AYEKE NZONI: Quang na Thi, so ayeke na Vietnam, abâ so ala yeke lani na ngia na yâ ti mariage ti ala ape. Mingi ni, Quang ayeke sara ye lani na nzoni bê ape. Lo tene: “Mbi sara sanka ti asentiment ti Thi nga mingi ni mbi yeke zia kamene na lê ti lo.” Thi aye lani ti sara divorce. Lo tene: “Mbi bâ lani so mbi peut encore ape ti sara confiance na koli ti mbi nga ti ne lo.”
Na nda ni, Quang na Thi amanda ye so Bible atene na aÉphésien 5:33 nga ala gi ti sara ye alingbi na ni na yâ ti mariage ti ala. Quang atene: “Versê so a-aidé mbi ti bâ so mbi bezoin ti sara ye na nzoni bê na mbage ti Thi, ti ye lo, ti bâ lege ti abezoin ti lo nga ti sara si lo sentir terê ti lo nzoni. So mbi sara tongaso, asara si lo ye mbi nga lo ne mbi mingi.” Nga, Thi atene: “So mbi gi ti sara ye alingbi na aÉphésien 5:33 nga mbi fa na koli ti mbi so mbi ne lo asara si mbi bâ so lo ye mbi, mbi sentir terê ti mbi bien nga mbi yeke na siriri.”
Ti hinga ye mingi na ndö ti mariage, diko Zingo na lango! N° 2 2018, so li ni ayeke “Aye 12 so ayeke sara si sewa aduti na ngia” na ndö ti jw.org.
2. Tongana nyen la e peut ti sara ye na mbage ti azo?
Mingi ni, azo ayeke sara ye na mbage ti amba ti ala na lege ni ape ndali ti mara ti ala, kodro ti ala, pendere ti ala, bungbi ti Nzapa ti ala wala ndali ti so zo ni ayeke bungbi koli na koli wala wali na wali.
BIBLE ATENE: “Ala ne mara ti azo nde nde kue.”—1 Pierre 2:17.
NDA TI TËNË NI: Bible afa na e ape ti ke azo ndali ti mara ti ala, kodro ti ala wala ndali ti so ala yeke bungbi koli na koli wala wali na wali. Me, a encouragé e ti ne azo kue, atâa mara ti ala, kodro ti ala wala ala yeke na mosoro wala pëpe (Kusala 10:34). Même tongana e yeda na aye so ambeni zo amä na bê na ni ape wala sarango ye ti ala ayeke tongana nyen, e peut ti sara ye na ala na nzoni bê nga e ne ala.—Matthieu 7:12.
AWANGO TI BIBLE AYEKE NZONI: Daniel abâ lani azo so alondo na Asie tongana azo so apeut ti ga na kpale na yâ ti kodro so lo yeke dä. Lo ke lani azo kue so ayeke azo ti Asie nga fani mingi lo yeke zonga ala na lê ti azo. Daniel atene: “Mbi gi ti justifié sarango ye ti mbi na lege so mbi yeke tene ‘mbi ye kodro ti mbi mingi’. Mbi bâ lani so apensé ti mbi nga na asarango ye ti mbi ayeke sioni ape.”
A si na mbeni ngoi, Daniel amanda Bible. Lo tene: “Mbi bâ so mbi bezoin ti changé fason so mbi yeke pensé na ni. Mbi gi ti bâ azo tongana ti so Nzapa abâ na ala ndali ti so e kue e yeke oko, atâa ndo wa la e londo dä.” Daniel afa atënë ti bê ti lo tongana lo tingbi laso na azo ti mbeni mara nde. Lo tene: “Mingi ni, mbi yeke gi ti hinga ndo so ala londo dä ape. Fadeso, mbi ye mara ti azo nde nde kue nga mbi yeke na nzoni songo ti kamarade na azo na yâ ti dunia kue.”
Ti hinga ye mingi na ndö ni, diko Zingo na lango! N° 3 2020, so li ni ayeke “Eskê zo apeut ti zia ti ke mba ti lo senge senge?” na ndö ti jw.org.
3. Tënë ti nginza
Mingi ti azo agi ti ga azo ti mosoro tongaso si ala duti na ngia nga gigi ti ala ti kekereke aga nzoni.
BIBLE ATENE: “Ndara ayeke bata zo tongana ti so nginza ayeke bata zo. Me nzoni ti hingango ye ayeke so: Ndara ayeke bata fini ti wa ti lo.”—Zo-ti-fa-tene 7:12.
NDA TI TËNË NI: E bezoin nginza, me a yeke pëpe ni la asara si e duti na ngia wala gigi ti e ti kekereke aga nzoni (aProverbe 18:11; 23:4, 5). Me, sarango ye alingbi na awango ti ndara so ayeke na yâ ti Bible la ayeke sara si e duti na tâ ngia nga ayeke sara si gigi ti e ti kekereke aga nzoni.—1 Timothée 6:17-19.
AWANGO TI BIBLE AYEKE NZONI: Cardo, so ayeke mbeni koli na Indonésie, agi lani ti wara gbâ ti mosoro. Lo tene: “Mbi yeke lani na aye kue so mingi ti azo aye ti wara ni. Mbi yeke voyagé, mbi vo aye ti luxe, a-oto nga na ada. Me, mbi perdre aye kue so mbi yeke na ni.” Cardo akiri atene: “Mbeni zo anzi mbi na lege ti likisi, na nginza so mbi sara kua ngangu ti wara ni na yâ ti angu so kue ahon gï hio tongaso na lê ti mbi. Mbi sara lani kua ngangu teti angu mingi ti ga zo ti mosoro, me na nda ni, mbi découragé ndali ti so mbi perdre aye kue nga mbi bâ so mbi yeke ye oko ape.”
Cardo akomanse ti sara ye alingbi na awango so Bible amû na ndö ti nginza. Lo zia lege ti gingo gbâ ti mosoro, na lo gi ti duti na mbeni vie so ayeke simple. Lo tene: “Me ti fadeso, mbi bâ so mbi yeke na vrai mosoro ndali ti so mbi yeke na nzoni songo na Nzapa. Na bï mbi peut ti lango nzoni nga mbi yeke vraiment na ngia.”
Ti hinga ye mingi na ndö ti ye so Bible atene na ndö ti tënë ti nginza, diko article “Eskê mandango mbeti nga na nginza la asara si gigi ti zo aga nzoni?” na yâ ti Tour ti Ba Ndo N° 3 2021, na ndö ti jw.org.
4. Tënë ti bungbingo koli na wali
Azo ayeke na abango nde nde na ndö ti tënë ti bungbingo koli na wali.
BIBLE ATENE: “Ala gbanzi terê ti ala na lango-sioni. A yeke nzoni zo oko oko na popo ti ala ahinga ti kanga nzara ti terê ti lo wani si lo duti nzoni-kue nga na nengo terê, me pëpe na lege ti nzara ti terê so a kanga ni pëpe tongana ti so amara so ahinga Nzapa pëpe ayeke nga na ni.”—1 aThessalonicien 4:3-5.
NDA TI TËNË NI: Bible azia limite na ndö ti ye so andu tënë ti bungbingo koli na wali. Tënë “lango-sioni” aye ti sara tënë ti gingo wali wala koli nde, sarango ndumba, bungbingo koli na wali na popo ti azo so asara mariage ape, bungbingo koli na koli wala wali na wali nga bungbingo na anyama (1 aCorinthien 6:9, 10). Bungbingo koli na wali ayeke mbeni cadeau so alondo na Nzapa so ayeke gï ndali ti azo so asara mariage awe.—aProverbe 5:18, 19.
AWANGO TI BIBLE AYEKE NZONI: Mbeni wali na Australie, so iri ti lo ayeke Kylie, atene: “So mbi yeke kumbamba, mbi pensé lani so tongana mbi bungbi koli na wali, mbi yeke sentir so a ye mbi nga mbi yeke bien. Me ye ni asi lani tongaso ape. Mbi sentir terê ti mbi nzoni ape nga mbi yeke na vundu.”
Na pekoni, Kylie amanda ye na ndö ti ye so Bible atene na ndö ti bungbingo koli na wali nga lo sara ye alingbi na ni. Lo tene: “Mbi ga ti bâ so andia ti Nzapa ayeke bata zo si zo awara aye ti vundu ape. Fadeso, mbi sentir terê ti mbi bien nga mbi bâ so a ye mbi ndali ti so mbi yeke sara aye so Jéhovah ahunda na e ti sara. Ti sara ye alingbi na afango ye ti Bible azi mbi na yâ ti akpale.”
Ti hinga ye mingi na ndö ni, diko article “Bible atene nyen na ndö ti koli na wali so ayeke vivre sân ti sara mariage?” na ndö ti jw.org.
Lo so acréé e a-aidé e ti hinga kangbi so ayeke na popo ti ye so ayeke nzoni nga na ye so ayeke sioni. Atâa so ti sara ye alingbi na ye so Nzapa afa ayeke lakue kete ye ape, me a yeke ga na aye ti nzoni. E peut ti duti sûr so tongana e sara ye alingbi na ni, a yeke sara si e duti na ngia lakue.
