“Mbeni tara nde asi na ala pëpe, gï ti so ayeke si ka na azo kue. Me Nzapa ayeke be-ta-zo, na lo yeke zia ande pëpe si a tara ala ahon ti so ala lingbi ti kanga bê dä, me tongana tara ni ayeke si na ala, lo yeke leke nga lege ti tene ala lingbi ti gbu ngangu dä.”—1 aCorinthien 10:13, Mbeti ti Nzapa ti fini dunia.

 “Handa nde asara e pëpe, gï handa so asara azo kue; me Nzapa ayeke Be-Ta-Zo, fade Lo zia handa ahon ngangu ti e pëpe; me legeoko na handa so, fade Lo leke lege ti sigi nga, si e lingbi gbu ngangu.”—1 aCorinthien 10:13, La Sainte Bible en Sango.

 Versê so afa so Nzapa ayeke be-ta-zo, na asara si e ye lo. Awakua ti Nzapa so ayeke be-ta-zo apeut ti duti na confiance so lo yeke aidé ala, surtout na ngoi so ala wara atara.

 “Mbeni tara nde asi na ala pëpe, gï ti so ayeke si ka na azo kue.” Bê ti awakua ti Nzapa apeut ti pusu ala ti sara mbeni ye so lo ke. Mara ti atara tongaso, même si ayeke ngangu, a yeke ye so ayeke si ka na azo mingi. a Tongaso, awakua ti Nzapa apeut ti duti sûr so ala lingbi ti gbu lê ni na yâ ti mara ti aye tongaso.

 “Nzapa ayeke be-ta-zo.” Jéhovah b Nzapa alingbi ti tene e sara confiance na lo. Lo yeke sara ye lakue alingbi na zendo ti lo, so lo yeke zia pëpe azo so aye lo, so angbâ be-ta-zo na lo nga so amä yanga ti lo (Deutéronome 7:9; Psaume 9:10; 37:28). Tongaso, azo so avoro lo apeut ti duti na confiance so lo yeke sara ye alingbi na azendo use, so adë bê, so ayeke na yâ ti versê so.

 “Lo yeke zia ande pëpe si a tara ala ahon ti so ala lingbi ti kanga bê dä.” Nzapa afa so lo yeke be-ta-zo na lege so lo yeke zia pëpe si atara ni aga ngangu mingi ahon ti so zo alingbi ti gbu ngangu dä. Lo hinga limite ti awakua ti lo kue.—Psaume 94:14.

 “Tongana tara ni ayeke si na ala, lo yeke leke nga lege ti tene ala lingbi ti gbu ngangu dä.” Nzapa apeut ti zi mbeni tara ti awakua ti lo wala ti mû na ala ye so ala yeke na bezoin ni ti gbu ngangu dä. Na tapande, lo peut ti fa lege na e na lege ti yingo vulu ti lo, lo dë bê ti e na lege ti Bible, wala lo aidé e na lege aita ti e.—Jean 14:26; 2 aCorinthien 1:3, 4; aColossien 4:11.

 Atënë ti versê so asigi na yâ ti mbeni lettre so bazengele Paul atokua na aChrétien ti congrégation ti Corinthe. Na yâ ti mbage ti lettre ti Paul so, lo sara kua na mbaï ti azo ti Israël ti giriri tongana tapande ti gbotongo mê na aita ti Corinthe (1 aCorinthien 10:11). Paul afa molongo ti atara so azo ti Israël awara ni lani, na tapande, vorongo ayanda nga na lango-sioni (1 aCorinthien 10:6-10). Ambeni na popo ti ala atï na yâ ti atara so. Paul asara lani kua na tapande ti ala ti dabe ti aChrétien ti sara confiance na terê ti ala ahon ndö ni ape, ti pensé so ala peut ti tï lâ oko ape na yâ ti tara (1 aCorinthien 10:12). Ye oko, lo dë bê ti ala na lege ti atënë so ayeke na yâ ti versê ti 1 Corinthians 10:13. Awakua ti Nzapa apeut ti ngbâ ti duti be-ta-zo, ataâ atara wa la ala tingbi na ni.

 Bâ nduru vidéo so ti bâ ambeni ye so ayeke na yâ ti kozo mbeti na aCorinthien.