Masalmo 119:1-176
-
Kupereka takhuta thangwi ya mafala adidi a Mulungu
-
‘Aphale na atsikana anapitiriza tani kukhala akucena?’ (9)
-
“Ndisakomerwa kakamwe na macenjezo anu” (24)
-
“Ine ndisakomerwa kakamwe na mwambo wanu!” (97)
-
“Udziwisi kakamwe kupiringana apfundzisi anga onsene” (99)
-
“Mafala anu ndi nyale inamwanikira manyalo anga” (105)
-
‘Mafala anu ndi undimomwene’ (160)
-
Ntendere kuna anthu anafuna mwambo wa Mulungu (165)
-
א [Alefi]
119 Anyakutsandzaya ndi anthu akuti nkhabe mulando* mu umaso wawo,Akuti asabvera mwambo wa Yahova.+
2 Anyakutsandzaya ndi ale anabvera macenjezo ace,+Ale anansaka na ntima wawo onsene.+
3 Iwo nkhabe kucita pinthu pyakuipa;Iwo asafamba munjira zace.+
4 Imwe mwatipanga toeraTibvere mwadidi mitemo yanu.+
5 Ndisafuna kakamwe kukhala wakukhulupirika*+Toera ndibvere matongero anu!
6 Penepo nee ndinadzakhala na manyadzo+Pakudinga matongero anu onsene.
7 Ndingadziwa matongero anu akulungamaNdinadzakusimbani na ntima wadidi.
8 Ndinadzabvera matongero anu.
Natenepa lekani kundisiya ndekhene.
ב [Bheti]
9 Mʼphale peno ntsikana anakwanisa tani kupitiriza na makhaliro akucena?
Anacita pyenepi angakhala mʼmaso mwakubverana na mafala anu.+
10 Ine ndisakusakani na ntima wanga onsene.
Lekani tawirisa kuti ndisiye kubvera matongero anu.+
11 Ine ndisakoya mafala anu muntima mwanga+Toera ndikhonde kukudawirani.+
12 Adathema kusimbwa ndimwe Yahova;Ndipfundziseni matongero anu.
13 Na mulomo wanga ndisadziwisaMatongero onsene adalonga imwe.
14 Ine ndisakomerwa na macenjezo anu+Kupiringana pinthu pinango pyonsene pyakufunika.+
15 Ndinadzanyerezera mwadidi* mitemo yanu+Mbandionesesa mwadidi njira zanu.+
16 Ndisafuna kakamwe mitemo yanu.
Ine nkhabe kudzaduwala mafala anu.+
ג [Gimeli]
17 Tsalakanani mwadidi ntumiki wanu,Toera ine ndikhale mʼmaso, pontho ndibvere mafala anu.+
18 Fungulani maso anga toera ndione mwadidiPinthu pyakudzumisa pinagumanika mu mwambo wanu.
19 Ndine mulendo mu dziko ino.+
Lekani kundibisira matongero anu.
20 Ndzidzi onsene ndisanentsekaThangwi yakufuna kakamwe matongero anu.
21 Imwe musasandika anthu akudzikuza,Ale adapaswa dzedze thangwi yakukhonda kubvera matongero anu.+
22 Acitiseni toera asiye kundisingirira na kundipwaza,Thangwi ndisabvera matongero anu.
23 Maseze atsogoleri akhale pabodzi mbandilonga mwakuipa,Ine ntumiki wanu ndinanyerezera mwadidi* matongero anu.
24 Ndisakomerwa kakamwe na macenjezo anu;+Iwo akhala ninga mapungu anga.+
ד [Dhaleti]
25 Ine ndagodama pa pfumbi.+
Ndikoyeni na umaso mwakubverana na pidalonga imwe.+
26 Ine ndakupangani njira zanga, imwe mbamunditawira;Ndipfundziseni matongero anu.+
27 Ndiphedzeni toera ndidziwe mabvekero a* mitemo yanu,Toera ine ndinyerezere mwadidi* mabasa anu akudzumisa.+
28 Nee ndisakwanisa kugona thangwi yakutsukwala.
Ndipaseni mphambvu mwakubverana na pidalonga imwe.
29 Citisani kuti uthambi ukhale kutali na ine,+Pontho ndibvereni ntsisi mbamundipfundzisa mwambo wanu.
30 Ndasankhula kukhala wakukhulupirika kuna imwe.+
Ine ndadzindikira kuti musatonga mwakulungama.
31 Ndisaphatisira mwadidi matongero anu.+
Yahova, lekani kutawirisa kuti ndiphatiswe mwala.*+
32 Ine ndinadzatowezera matongero anu na ntima onseneThangwi imwe musathimizira kubvesesa kwanga.*
ה [He]
33 Imwe Yahova, ndipfundziseni+ toera ndifambe mwakubverana na matongero anu,Pontho ndinadzaatowezera mu umaso wanga onsene.+
34 Ndipaseni ndzeru,Toera ine ndibvere mwambo wanuMbandiukoya na ntima wanga onsene.
35 Nditsogolereni toera ndibvere* matongero anu,+Thangwi ine ndisakomerwa nawo.
36 Citisani ntima wanga toera ufune macenjezo anu,Tayu kusirira.*+
37 Peusani maso anga toera akhonde kuona pinthu pyakusowa basa;+Ndicitiseni kufamba munjira zanu toera ndipitirize kukhala mʼmaso.
38 Kwanirisani pikiro idacita* imwe kuna ntumiki wanu,Toera anthu akugopeni.*
39 Bulusani pinthu pyakupasa manyadzo pinagopa ine,Thangwi matongero anu ndi adidi.+
40 Onani kuti ndisafuna kakamwe matongero anu.
Ndikoyeni na umaso mwakubverana na ulungami wanu.
ו [Vau]
41 Yahova, ndipangizeni ufuni wanu wakukhonda mala,+Ndipulumuseni mwakubverana na pikiro yanu;*+
42 Natenepa ndinakwanisa kutawira ule anandisingirira,Thangwi ndisanyindira mafala anu.
43 Lekani kubulusa mafala a undimomwene pamulomo panga,Thangwi ndisadikhira kutonga kwanu.
44 Ine ndinapitiriza kukoya mwambo wanu,Kwenda na kwenda.+
45 Pontho ine ndinafamba mʼmbuto zakutsidzikizika,+Thangwi ndisapfundza mitemo yanu toera kuibvera.
46 Ine ndinadzalonga thangwi ya macenjezo anu kuna amambo,Pontho nee ndinakhala na manyadzo.+
47 Ine ndisakomerwa kakamwe na matongero anuInde, ine ndisaafuna kakamwe.+
48 Ine ndinathukula manja anga kuna imwe pakucita phembero thangwi ndisafuna kakamwe matongero anu,+Pontho ndinadzanyerezera mwadidi* mitemo yanu.+
ז [Zaine]
49 Kumbukani mafala adalonga* imwe kuna ine ntumiki wanu,Akuti asandicitisa kukhala na cidikhiro.
50 Pyenepi ndipyo pinandibalangaza mu ndzidzi unatamba ine nyatwa,+Thangwi mafala anu asandicitisa kukhala na umaso.
51 Anthu akudzikuza asandisingirira kakamwe,Mbwenye ine nkhabe siya kubvera mwambo wanu.+
52 Yahova, ine ndisakumbuka matongero anu a ndzidzi wakale,+Pontho iwo asandibalangaza.+
53 Ine ndaipirwa kakamwe thangwi ya anyakucita pyakuipaAkuti asasiya kubvera mwambo wanu.+
54 Matongero anu ndi nyimbo kuna ineMʼmbuto zonsene zinakhala ine.*
55 Yahova, ine ndisakumbuka dzina yanu namasiku,+Toera ndikwanise kukoya mwambo wanu.
56 Pyenepi ndipyo pinacita ineThangwi ndisabvera matongero anu.
ח [Heti]
57 Yahova, imwe ndimwe unthaka wanga;+Ine ndapikira toera kukoya mafala anu.+
58 Ine ndisakudembeterani* na ntima wanga onsene;+Ndibvereni ntsisi+ mwakubverana na pikiro yanu.*
59 Ine ndanyerezera mwadidi njira zangaToera ndibwerere mbandibvera macenjezo anu.+
60 Ine ndisacimbiza, pontho nkhabe dembukaNa kubvera matongero anu.+
61 Nkhambala za anyakucita pyakuipa zandizungulira,Mbwenye mwambo wanu, ine nkhabe kuuduwala.+
62 Tcititciti ine ndisalamuka toera kupereka takhuta+Thangwi yakutonga kwanu kwakulungama.
63 Ine ndine xamwali wa onsene anakugopani,
Pontho wa ale anabvera matongero anu.+
64 Yahova, ufuni wanu wakukhonda mala usaoneka pa dziko yonsene yapantsi;+Ndipfundziseni matongero anu.
ט [Tete]
65 Yahova, imwe mwatsalakana mwadidi ntumiki wanu,Mwakubverana na pidalonga imwe.
66 Ndipfundziseni toera ndikhale na ndzeru zadidi na udziwisi,+Thangwi ndisanyindira matongero anu.
67 Kale ndikhacita pyakuipa mwakukhonda funa,Mbwenye cincino ndisabvera mafala anu.+
68 Imwe ndimwe wadidi,+ pontho mabasa anu ndi adidi.
Ndipfundziseni matongero anu.+
69 Anthu akudzikuza asalonga uthambi toera kupswipisa makhaliro anga,Mbwenye ine ndisabvera matongero anu na ntima wanga onsene.
70 Mitima yawo yadzakhala yakuuma,*+Mbwenye ine ndisafuna kakamwe mwambo wanu.+
71 Nyatwa zidatamba ine zandiphedza+Toera ine ndikwanise kupfundza matongero anu.
72 Mwambo udalonga imwe ndi wadidi kuna ine,+Ndi wadidi kakamwe kupiringana ouro na parata izinji.+
י [Yodhe]
73 Ine ndaumbwa, pontho ndacitwa na manja anu.
Ndipaseni luso yakubvesesa,Toera ine ndipfundze matongero anu.+
74 Ale anakugopani asakomerwa angandiona,Thangwi mafala anu ndi cidikhiro canga.*+
75 Yahova, ine ndisadziwa kuti imwe musatonga mwaulungami,+Pontho ndisadziwa kuti imwe mwanditcunyusa thangwi yakukhulupirika kwanu.+
76 Ndaphata miyendo, ndibalangazeni na ufuni wanu wakukhonda mala,+Mwakubverana na pikiro idacita* imwe kuna ntumiki wanu.
77 Ndibvereni ntsisi toera ine ndipitirize kukhala mʼmaso,+Thangwi ine ndisafuna kakamwe mwambo wanu.+
78 Mbapaswe manyadzo anthu akudzikuza,Thangwi iwo asandicitira pyakuipa mwakusowa mathangwi.*
Mbwenye ine ndinanyerezera* mwadidi mitemo yanu.+
79 Ale anakugopani mbabwerere kuna ine,Ale akuti asadziwa macenjezo anu.
80 Ntima wanga mbuleke kukhala na mulando mu ndzidzi unatowezera ine matongero anu,+Toera ndikhonde kupasika manyadzo.+
כ [Kafe]
81 Ndisafuna* kakamwe cipulumuso canu,+Thangwi mafala anu ndi cidikhiro canga.*
82 Maso anga asafuna kakamwe mafala anu;+Ine ndisabvundzika: “Munandibalangaza lini?”+
83 Thangwi ine ndine ninga budu ya nthembe yakuumiswa na utci,Mbwenye ine nkhabe duwala matongero anu.+
84 Kodi ine ntumiki wanu ndisafunika kudikhira ntsiku zingasi?
Munabwera lini kudzatonga ale ananditcinga?+
85 Anthu akudzikuza, akuti asapwaza mwambo wanuAsandikumbira madjenje.
86 Matongero anu onsene ndi akunyindirika.
Anthu asanditcinga mwakusowa mathangwi; ndiphedzeni!+
87 Iwo akhadasala pangʼono toera kundifudza pa dziko yapantsi,Mbwenye ine ndapitiriza kubvera mitemo yanu.
88 Ndikoyeni na umaso thangwi ya ufuni wanu wakukhonda mala,Toera ndikoye macenjezo adalonga imwe.
ל [Lamedhi]
89 Yahova, kwenda na kwendaMafala anu anadzapitiriza kudzulu.+
90 Kukhulupirika kwanu kusapangizika mu ubalwi na ubalwi.+
Imwe mwalikhisa dziko yapantsi toera iyo ipitirize kukhala yakukhazikika.+
91 Thangwi ya matongero anu, pyonsene* piripo mpaka lero,Thangwi pyonsene pisakutumikirani.
92 Mbidakhonda kukomerwa na mwambo wanu,Ine mbandidafa mu ndzidzi ukhatamba ine nyatwa.+
93 Ine cipo ndinaduwala mitemo yanu,Thangwi imwe mwandipulumusa na mitemo ineyi.+
94 Ine ndine wanu; ndipulumuseni,+Thangwi ine ndisasaka mitemo yanu.+
95 Anyakucita pyakuipa asandidikhira toera kundipha,Mbwenye ine ndisanyerezera kakamwe pya macenjezo anu.
96 Ine ndaona kuti pinthu pyonsene pyadidi piri na madireMbwenye matongero anu nkhabe madire.*
מ [Memi]
97 Ine ndisakomerwa kakamwe na mwambo wanu!+
Ntsiku zonsene ndisaunyerezera.*+
98 Ntemo wanu usandicitisa kukhala wandzeru kupiringana anyamalwa anga,+Thangwi iwo uli na ine kwenda na kwenda.
99 Ine ndiri na udziwisi kakamwe kupiringana apfundzisi anga onsene,+Thangwi ndisanyerezera* mwadidi macenjezo anu.
100 Ine ndisacita pinthu mwandzeru kakamwe kupiringana anthu akugwesera,Thangwi ndisabvera mitemo yanu.
101 Ine ndisakhonda kufamba munjira zakuipa,+Toera ndibvere mafala anu.
102 Ine nkhabe kusiya matongero anu,Thangwi adandipfundzisa ndimwe.
103 Mafala anu asatapira kakamwe pa lirimi panga,Iwo asatapira kakamwe nkanwa mwanga kupiringana uci!+
104 Ine ndisacita pinthu mwandzeru thangwi ya mitemo yanu.+
Na thangwi ineyi, ine ndisaida njira zonsene zakuipa.+
נ [Nuni]
105 Mafala anu ndi nyale inamwanikira manyalo anga,Pontho ndi ceza cinamwanikira njira yanga.+
106 Ine ndacita pikiro, pontho ndinaikwanirisa,Toera kubvera matongero anu akulungama.
107 Ine ndathabuka kakamwe.+
Yahova, ndikoyeni na umaso mwakubverana na pidalonga imwe.+
108 Ndaphata miyendo Yahova, tawirani ntsembe zinapereka ine mwakufuna kwanga toera kukusimbani,*+Pontho ndipfundziseni matongero anu.+
109 Ndzidzi onsene umaso wanga uli pangozwi,*Mbwenye ine nkhabe kuduwala mwambo wanu.+
110 Anyakucita pyakuipa asanditeyera nsampha,Mbwenye ine nkhabe kusiya mitemo yanu.+
111 Ine ndisaona macenjezo anu ninga unthaka wanga wakwenda na kwenda,Thangwi iwo asacitisa ntima wanga kukhala wakutsandzaya.+
112 Ine ndatonga* kubvera mitemo yanuMʼmidzidzi yonsene mpaka kunkhomo.
ס [Sameki]
113 Ine ndisaida ale ali na ntima wakugawika,*+Mbwenye ndisafuna kakamwe mwambo wanu.+
114 Imwe ndimwe mbuto yanga yakuthawira na xango yanga,+Thangwi mafala anu ndi cidikhiro canga.*+
115 Imwe anyakucita pyakuipa, khalani kutali na ine,+Toera ine ndibvere matongero a Mulungu wanga.
116 Mulungu, ndiphedzeni ninga mudapikira imwe,*+Toera ndipitirize kukhala mʼmaso;Lekani tawirisa kuti cidikhiro canga cikhale cakusowa basa.*+
117 Ndiphedzeni toera ndipulumuswe;+Penepo ndinadzaikha manyerezero anga onsene ku mitemo yanu.+
118 Imwe musakhonda onsene anasiya mitemo yanu,+Thangwi iwo ndi authambi, pontho asanyengeza.
119 Imwe musataya ninga pirombo anthu onsene anacita pyakuipa pa dziko yapantsi.+
Na thangwi ineyi, ine ndisafuna kakamwe macenjezo anu.
120 Manungo anga asatetemera thangwi yakugopa imwe;Ine ndisagopa kutonga kwanu miseru.
ע [Ayine]
121 Ine ndisacita pinthu pyadidi na pyakulungama.
Lekani kundisiya mʼmanja mwa anthu anandiponderera!
122 Pikirani kuti imwe munaphedza ntumiki wanu;Anthu akudzikuza mbaleke kundithabusa.
123 Maso anga aneta thangwi yakudikhira kupulumuswa na imwe,+Pontho thangwi yakudikhira kukwanirisika kwa pikiro yanu yakulungama.+
124 Pangizani ufuni wanu wakukhonda mala kuna ntumiki wanu,+Pontho ndipfundziseni matongero anu.+
125 Ndine ntumiki wanu; ndipaseni udziwisi+Toera ndikwanise kubvesesa macenjezo anu.
126 Wafika ndzidzi toera Yahova acite pinthu,+Thangwi iwo nee abvera mwambo wanu.
127 Na thangwi ineyi, ine ndisafuna kakamwe matongero anu,Ndisaafuna kakamwe kupiringana ouro, ngakhale ouro yadidi kakamwe.+
128 Natenepa, kuna ine, pitsogolero pyonsene pinabuluka* kuna imwe ndi pyadidi;+Ine ndisaida njira zonsene zakuipa.+
פ [Pe]
129 Macenjezo anu ndi adidi kakamwe.
Na thangwi ineyi, ine ndisaabvera.
130 Mafala anu angafokotozwa asabweresa ceza,+Mbapasa udziwisi kuna ale adausowa.+
131 Ine ndisafungula mulomo wanga mbandipuma mwakubveka,*Thangwi ndisafuna kakamwe matongero anu.+
132 Ndiyangʼaneni, pontho ndibvereni ntsisi,+Mwakubverana na pidatonga imwe kucita kuna ale anafuna dzina yanu.+
133 Nditsogolereni na mafala anu toera ndifambe mwakutsidzikizika;Pontho lekani tawirisa kuti ndikundwe na pinthu pyakuipa.+
134 Ndipulumuseni* mʼmanja mwa ale anandiponderera,Pontho ine ndinadzabvera mitemo yanu.
135 Citisani nkhope yanu kuyetimira* kuna ntumiki wanu,+
Pontho ndipfundziseni mitemo yanu.
136 Misozi ikubuluka mʼmaso mwangaThangwi mbumba nee yabvera mwambo wanu.+
צ [Tsadhe]
137 Imwe Yahova ndimwe wakulungama,+Pontho matongero anu ndi adidi.+
138 Macenjezo anapereka imwe ndi akulungama,Pontho ndi akunyindirika kakamwe.
139 Phinga yanga kuna imwe ndi ninga moto wakugaka muntima mwanga,+Thangwi anyamalwa anga aduwala mafala anu.
140 Mafala anu ndi akucena kakamwe,+Pontho ine ntumiki wanu ndisakomerwa nawo.+
141 Kuna anango ndine wakusowa basa na wakupwazika;+Ngakhale tenepo, ine nee ndaduwala mitemo yanu.
142 Ulungami wanu ndi wakwenda na kwenda,+Pontho mwambo wanu ndi undimomwene.+
143 Maseze nditambe nyatwa, pontho ndithimbane na pinentso,
Ine ndisapitiriza kukomerwa kakamwe na mitemo yanu.
144 Ulungami wa macenjezo anu ndi wakwenda na kwenda.
Ndipaseni udziwisi+ toera ndipitirize kukhala mʼmaso.
ק [Kofe]
145 Ine ndisacemera na ntima wanga onsene. Nditawireni Yahova.
Ine ndinadzabvera matongero anu.
146 Ine ndisakucemerani; ndipulumuseni!
Ine ndinadzabvera macenjezo anu.
147 Ine ndisalamuka mʼbambakuca* toera kuphemba ciphedzo,+Thangwi mafala anu ndi cidikhiro canga.*
148 Ine ndisalamuka tcititciti,Toera ndikwanise kunyerezera* mwadidi mafala anu.+
149 Bveserani fala yanga thangwi ya ufuni wanu wakukhonda mala.+
Yahova, ndikoyeni na umaso thangwi yaulungami wanu.
150 Ale anacita pinthu pyakupasa manyadzo* afika dhuzi na ine;Iwo ali kutali kakamwe na mwambo wanu.
151 Yahova, imwe muli dhuzi na ine,+Pontho matongero anu onsene ndi andimomwene.+
152 Ine ndadzindikira kale kakamwe kuti macenjezo anuMwaakhazikisa toera akhale kwenda na kwenda.+
ר [Rexi]
153 Onani nyatwa zanga, pontho ndipulumuseni,+Thangwi ine nee ndaduwala mwambo wanu.
154 Nditsidzikizeni,* pontho ndipulumuseni;+Ndikoyeni na umaso mwakubverana na pikiro yanu.*
155 Cipulumuso ciri kutali na anyakucita pyakuipa,Thangwi iwo nee apfundza mitemo yanu.+
156 Yahova, ntsisi zanu ndi zikulu.+
Ndikoyeni na umaso mwakubverana na ulungami wanu.
157 Anyakunditcinga na anyamalwa anga ndi azinji;+Mbwenye ine nkhabe kusiya mitemo yanu.
158 Ndisaipirwa kakamwe na anthu anacita pinthu mwaciphamaso,Thangwi iwo nkhabe kubvera mafala anu.+
159 Onani, ine ndisafuna kakamwe mitemo yanu!
Yahova, ndikoyeni na umaso thangwi ya ufuni wanu wakukhonda mala.+
160 Mafala anu onsene ndi undimomwene,+Pontho matongero anu onsene akulungama ndi a kwenda na kwenda.
ש [Sini] peno [Xini]
161 Atsogoleri asanditcinga+ mwakusowa mathangwi,Mbwenye ntima wanga usalemedza mafala anu.+
162 Ine ndisakomerwa na mafala anu+Ninga munthu wakuti agumana mpfuma zizinji kakamwe.
163 Ine ndisaida uthambi, pontho ndisanyanyasirwa nawo,+Mbwenye ndisafuna mwambo wanu.+
164 Ine ndisakusimbani kanomwe pa ntsikuThangwi ya kutonga kwanu kwa ulungami.
165 Ale anafuna mwambo wanu asakhala na ntendere uzinji kakamwe;+Nkhabe cinthu cinafuna kuagwegwedusa.*
166 Yahova, ine ndisadikhira kupulumuswa na imwe,Pontho ndisabvera matongero anu.
167 Ndisabvera* macenjezo anu,Pontho ndisaafuna kakamwe.+
168 Ine ndisabvera mitemo yanu na macenjezo anu,Thangwi imwe musadziwa pyonsene pinacita ine.+
ת [Tau]
169 Yahova, mbufike kuna imwe nʼkhuwo wanga wakuphemba ciphedzo.+
Ndipaseni udziwisi mwakubverana na mafala anu.+
170 Phembo yanga toera kubverwa ntsisi mbifike kuna imwe.
Ndipulumuseni ninga mudapikira imwe.*
171 Ndinakusimbani ndzidzi onsene,+Thangwi imwe musandipfundzisa mitemo yanu.
172 Ndinadzaimba nyimbo zinalonga pya mafala anu+Thangwi matongero anu onsene ndi akulungama.
173 Djanja yanu mbikhale dzololo toera kundiphedza,+Thangwi ine ndasankhula kubvera mitemo yanu.+
174 Ndisadikhira kupulumuswa na imwe Yahova,Pontho ndisafuna kakamwe mwambo wanu.+
175 Pitirizani kundikoya na umaso toera ine ndikwanise kukusimbani;+Ndiphedzeni na matongero anu.
176 Ine ndapeuka ninga bira yakutayika.+ Sakani ntumiki wanu,Thangwi ine nee ndaduwala matongero anu.+
Pidzindikiro Pyapantsi
^ Peno: “asapitiriza kukhala akukhulupirika.”
^ Fala na Fala: “Ndisafuna kakamwe toera njira zanga zikhale zakulikha.”
^ Peno: “Ndinadzapfundza.”
^ Peno: “ndinapfundza.”
^ Fala na Fala: “njira za.”
^ Peno: “ndipfundze.”
^ Peno: “ndipaswe manyadzo.”
^ Munjira inango: “musacitisa ntima wanga kukhala na cinyindiro.”
^ Peno: “Ndicitiseni kufamba munjira ya.”
^ Peno: “kuwina pinthu mwakusowa ulungami.”
^ Peno: “mafala adalonga.”
^ Munjira inango: “Pinacita ale anakugopani.”
^ Peno: “mafala anu.”
^ Peno: “ndinadzapfundza.”
^ Peno: “pikiro idalonga.”
^ Peno: “Panyumba inakhala ine ninga mulendo.”
^ Peno: “Ine ndisafewesa (ndisasaka kumwetulira kwa) nkhope yanu.”
^ Peno: “mafala anu.”
^ Fala na Fala: “mitima yawo nee ikhali na mabvero ninga mafuta.”
^ Peno: “ndisadikhira mafala anu.”
^ Peno: “mafala adalonga.”
^ Munjira inango: “mwauthambi.”
^ Peno: “ndinapfundza.”
^ Peno: “Umaso wanga usafuna.”
^ Peno: “Thangwi ndisadikhira mafala anu.”
^ Pyenepi pisabveka pinthu pyonsene pidacita iye.
^ Fala na Fala: “asaphataniza pizinji.”
^ Peno: “ndisaupfundza.”
^ Peno: “ndisapfundza.”
^ Fala na Fala: “ntsembe za mulomo wanga zinapereka ine mwakufuna kwanga.”
^ Peno: “Ndzidzi onsene umaso wanga uli mʼmanja.”
^ Peno: “ndakulumiza ntima wanga toera.”
^ Peno: “anthu akupenula.”
^ Peno: “ndisadikhira mafala anu.”
^ Peno: “mwakubverana na pidalonga imwe.”
^ Peno: “cindipase manyadzo.”
^ Peno: “mitemo yonsene inabuluka.”
^ Fala na Fala: “mbandiyaxamula.”
^ Fala na Fala: “Ndiomboleni.”
^ Peno: “imwetulire.”
^ Peno: “munaca kunja.”
^ Peno: “ndisadikhira mafala anu.”
^ Peno: “kupfundza.”
^ Peno: “pinthu pyakunyanyasa.”
^ Peno: “Fambisani nseru wanga.”
^ Peno: “mafala anu.”
^ Peno: “Kwa iwo nkhabe mwala wakugwegwedusa.”
^ Peno: “Ntima wanga usabvera.”
^ Peno: “mwakubverana na pidalonga imwe.”
