Иисус атын дьонтон уратыта диэн сиргэ төрүөн иннинэ халлааҥҥа олорор күүстээх аанньал этэ (Иоанн 8:23). Кини Таҥара бастакы айымньыта буолар уонна тугу барытын айарга кыттыыны ылбыта. Иегова Иисуһу эрэ бэйэтэ соҕотоҕун айбыта, ол иһин кини Таҥара «төрөппүт соҕотох Уола» диэн ааттанар (Иоанн 1:14). Иисус өссө Таҥара аатыттан сулууспалыыр буолан «Тыл» диэн ааттаммыта. (Аман өс 8:22, 23, 30; Колоссяннарга 1:15, 16 ааҕыҥ.)

 Таҥара сибэтиэй тыынын көмөтүнэн уолун олоҕун халлаантан Мария диэн еврей кыыһын иһигэр көһөрбүтэ. Кини кэргэнэ суох этэ. Ити Иисус сирдээҕи аҕата суоҕун көрдөрөр (Лука 1:30—35). Иисус сиргэ кэлэн: 1) Таҥара туһунан кырдьыгы үөрэппитэ, 2) Таҥара көҥүлүн ыарахан да кэмҥэ хайдах толорору көрдөрбүтэ уонна 3) бэйэтин эҥкилэ суох олоҕун «толук» биэрбитэ. (Матфей 20:28 ааҕыҥ.)

 Толук диэн киһини өлүүттэн босхолуур аналлаах төлөбүр буолар (Исход 21:29, 30). Таҥара дьоннор кырдьалларын уонна өлөллөрүн баҕарбатаҕа. Биһиги ону хантан билэбитий? Таҥара маҥнайгы киһини, Адамы, аньыыны оҥордоххуна өлүөҥ диэн сэрэппитэ. Ол аата Адам аньыыны оҥорботоҕо буоллар, хаһан да өлүө суохтаах этэ (Айыллыы 2:16, 17; 5:5). Биибилийэ этэринэн өлүү аан дойдуга «Адамынан киирбитэ». Киниттэн оҕолоругар барыларыгар аньыы бэриллибитэ. Ол түмүгэр бары өлөр буолбуттара. Биһиги Адамтан бэриллибит өлүүттэн босхолоноору толукка наадыйабыт. (Римляннарга 5:12; 6:23 ааҕыҥ.)

  Биһигини өлүүттэн босхолуур туһугар ким толук биэриэн сөп этэй? Киһи өллөҕүнэ бэйэтин эрэ аньыытын иһин төлөбүр биэрэр кыахтаах. Биир да аньыылаах киһи атыттар аньыыларын төлөөн толуйан ылар кыаҕа суох. (Саалтыыр 48:8—10 ааҕыҥ.)

 Иисус биһигиттэн уратыта диэн аньыыта суох этэ. Ол иһин кини аньыыны хаһан да оҥорботох буолан, бэйэтин аньыытын иһин өлөрө наадата суох этэ. Иисус атыттар аньыыларын иһин өлбүтэ. Таҥара бэйэтин уолун биһиги өлбөппүт туһугар сиргэ ыытан киһи-аймахха улуу тапталын көрдөрбүтэ. Иисус аҕатын тылын истэн, биһиги аньыыбыт иһин олоҕун биэрэн эмиэ тапталын көрдөрбүтэ. (Иоанн 3:16; Римляннарга 5:18, 19 ааҕыҥ.)

 Видеоролигы көрүҥ «Иисус тоҕо өлбүтэй?»

 Иисус сиргэ баар эрдэҕинэ ыарыһахтары үтүөрдэрэ, өлбүттэри тилиннэрэрэ уонна иэдээҥҥэ түбэспиттэргэ көмөлөһөрө. Иисус оннук гынан Таҥараҕа истигэн дьоҥҥо анаан инникитин тугу оҥоруохтааҕын көрдөрбүтэ (Матфей 15:30, 31; Иоанн 5:28). Иисус өлбүтүн кэннэ Таҥара кинини тилиннэрбитэ, онон кини билигин күүстээх аанньал буолан халлааҥҥа олорор (1 Петр 3:18). Иисус ол кэннэ Таҥара уҥа өттүгэр олорбута. Онтон ыла аҕата киниэхэ сири салайар ыраахтааҕы былааһын биэрэрин кэтэспитэ (Еврейдэргэ 10:12, 13). Билигин Иисус халлааҥҥа ыраахтааҕы быһыытынан салайар, оттон кини батыһааччылара бу үчүгэй сонуну сир үрдүнэн тарҕаталлар. (Лука 1:32, 33; Матфей 24:14 ааҕыҥ.)

 Сотору кэминэн Иисус ыраахтааҕы былааһын туһанан эрэйдэниини суох гыныа уонна сири куһаҕан дьонтон ыраастыа. Иисуһу итэҕэйээччилэр уонна кини тылын истээччилэр бары ырай сиригэр олоруохтара. (Саалтыыр 36:9—11 ааҕыҥ.)