29 GICURASI 2023 | YAHUJWE N’IGIHE KU ITARIKI YA 3 GICURASI 2024
U BURUSIYA

AMAKURU MASHYA—ABAVANDIMWE BAHAMIJWE ICYAHA | Amahame yo muri Bibiliya afasha abavandimwe kwihanganira ibitotezo

FUNGURA

Ku itariki ya 2 Gicurasi 2024, urukiko rw’akarere ka Pozharskiy ruri mu gace ka Primorye, rwahamije icyaha umuvandimwe Nikolay Dikhtyar, Andrey Lyakhov, Yuriy Ponomarenko na Oleg Sergeyev. Rwabakatiye igifungo gisubitse cy’imyaka ibiri n’amezi atandatu, imyaka ibiri n’amezi umunani, imyaka itandatu n’amezi atandatu n’imyaka itandatu n’amezi ane. Ntibizaba ngombwa ko bajyanwa muri gereza.

Icyo twabavugaho

Nikolay Dikhtyar

Igihe yavukiye: 1954 (Ukraine)

Ibimuranga: Yari injenyeri mu bijyanye n’ibyuma bitanga ubushyuhe n’ubukonje

Igihe yabonaga uburyo ubuhanuzi bwo muri Bibiliya buri gusohora muri iki gihe yarushijeho kwemera ko ibyo ivuga ari ukuri. Yabatijwe mu mwaka wa 1998

Ibyo yavuze

Ni iki cyagufashije gukomeza kurangwa n’icyizere muri ibi bihe bitoroshye?

Sinatunguwe igihe namenyaga ko Abahamya ba Yehova bo mu Burusiya batangiye gutotezwa. Nari nzi ko ikintu kiza nakora ari ukwitegura ibitotezo. Nari nzi neza ko byanze bikunze nzahura n’ibitotezo (2 Timoteyo 3:12). Umuryango wa Yehova uradufasha cyane. Udutegurira amafunguro yo mu buryo bw’umwuka kandi abavandimwe basenga badusabira. Mba numva ari nkaho buri gihe Yehova na Yesu bari kumwe nanjye kugira ngo bankomeze kandi batume nihangana.

Andrey Lyakhov

Igihe yavukiye: 1978 (Voznesenka mu ntara Primorye)

Ibimuranga: Yakoze mu bwubatsi, ibijyanye no gutunganya mu nzu imbere

Yahuye n’Abahamya ba Yehova bwa mbere mu mwaka wa 2014. Bamufashije kubona ibisubizo by’ibibazo yibazaga bakoresheje Bibiliya kandi byatumye yemera adashidikanya ko yabonye ukuri. Yabatijwe mu mwaka wa 2016

Ibyo yavuze

Ni iki cyagufashije gukomeza kugira ukwizera gukomeye?

Gucika intege byashoboraga gutuma niheba kandi ukwizera kwange kukagabanuka. Nzi ko kugira ngo nkomeze kugira ibyishimo nkeneye gukora byinshi kurusha ibyo nakoraga mbere. Muri Matayo 6:33, Yesu yaduteye inkunga yo ‘gushaka mbere na mbere ubwami bw’Imana.’ Gutekereza kuri ayo magambo bituma nkomeza kwibanda ku bintu bimfasha kugira ukwizera gukomeye. Nzi neza ko Yehova azakomeza kumfasha kugira ngo nihangane uko ibibazo nahura na byo byaba bimeze kose. Nta mpamvu yo gucibwa intege cyangwa guhangayikishwa n’ibintu bishobora kuba cyangwa ntibibe.

Oleg Sergeyev

Igihe yavukiye: 1984 (Vladivostok mu ntara ya Primorye)

Ibimuranga: Akora ibijyane n’amashanyarazi

Ababyeyi be babaye Abahamya ba Yehova akiri muto. Kwiyigisha Bibiliya byatumye arushaho kwemera ko ari mu idini ry’ukuri.Yabatijwe mu mwaka wa 1999

Yashakanye na Anastasiya mu mwaka wa 2010. Bafite abana batatu

Ibyo yavuze

Ese haba hari umurongo wo muri Bibiliya wagufashije mu buryo bwihariye?

Nkunda gutekereza cyane ku magambo ya Yesu ari muri Luka 12:25, 26 agira ati: “Ni nde muri mwe ushobora kongera umukono umwe ku gihe ubuzima bwe buzamara, abiheshejwe no guhangayika? None se niba nta kintu na gito mushobora gukora, kuki mwahangayikira ibindi bisigaye?” Ayo magambo anyibutsa ko ntakwiriye gukomeza gutekereza ku bimpangayikisha. Hari ibintu umuntu aba adashobora kugira icyo ahinduraho. Ahubwo ikintu cyiza umuntu abakwiriye gukora ni ukumenya uko yabyihanganira kandi akarushaho kwishingikiriza kuri Yehova.

Tuzi neza ko kimwe na Andrey, Nikolay, Oleg na Yuriy, gukurikiza amahame yo muri Bibiliya mu buzima bwacu bwa buri munsi bitatuma ‘tugira ibikenewe byose kugira ngo dukore umurimo mwiza wose.’—2 Timoteyo 3:16, 17.

Uko Ibintu byagiye bikurikirana

Ku itariki ya 16 Nyakanga 2021

Yuriy yakorewe dosiye. Akekwaho gutegura ibikorwa by’umuryango ushinjwa ibikorwa by’ubutagondwa
Ku itariki ya 22 Nyakanga 2021

Inyubako Yuriy abamo yarasatswe
Ku itariki ya 24 Nyakanga 2021

Yuriy yabujijwe kuva mu gace atuyemo
Ku itariki ya 1 Ugushyingo 2021

Inyubako Oleg abamo yarasatswe
Ku itariki ya 2 Ugushyingo 2021

Oleg yabujijwe kuva mu gace atuyemo
Ku itariki ya 12 Gashyantare 2022

Oleg yashinjwe ibyaha maze nawe yongerwa muri dosiye
Ku itariki ya 14 Werurwe 2022

Nikolay yashinjwe ibyaha maze nawe yongerwa muri dosiye
Ku itariki ya 15 Werurwe 2022

Andrey yashinjwe ibyaha maze nawe yongerwa muri dosiye
Ku itariki ya 10 Kanama, 2022

Nibwo Urubanza rwatangiye

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU