Mpfuletelo Lowu Yamukeliwiki Hi Yohane 21:1-27
21 Kutani ni vona matilo lamampshwa ni misava leyimpshwa; hikusa a matilo ya khale ni misava ya khale a swi khalutile, nakone a lwandle a dzri nga ha li kone.
2 Ni vona ni doropa dzra ku xwenga, ku nga Yerusalema Lwemumpshwa, na a xika hi le tilweni lani Xikwembu Nkulukumba a nga kone, na a lulamiseliwe ku fana ni mutekiwa lweyi a lulamiseleliwiki ku yamukela muteki.
3 Hiloko ni yingela zritu ledzrikulu na dzri pfa hi le tilweni dzri ku: “Lavisa! A tende dzra Xikwembu Nkulukumba dzri le vhanwini, a ta tsrhama na vone, nakone vone va ta va vhanu vake. Xikwembu Nkulukumba ha byake a ta va na vone.
4 A ta sula minyembeti hinkwayu a matihlweni yavu, a lifu a dzri nge he ti va kone, a ku nge he ti va ni nkosi ni ku dzrila, nambi swivavu a swi nge he ti va kone. A mintxhumu ya khale yi khalutile.”
5 Lweyi a tsrhamiki xiluvelweni a ku: “Lavisa! Ni yentxa mintxhumu hinkwayu yi va leyimpshwa.” A tlhela a ku: “Tsrala, hikusa a mazritu lawa ma dumbeka* nakone i ya ntiyiso.”
6 Kutani a ni byela a ku: “A mazritu lawo ma hetisekile! Hi mine Alfa na Omega,* masungulo ni magamu. Lweyi a twaka tozra ni ta mu nyika mati hi mahala,* lama humaka ka xihlovo xa wutomi.
7 Lweyi a hlulaka a ta kuma mintxhumu leyi, nakone ni ta va Xikwembu Nkulukumba wake yene a ta va n’wananga.
8 Kambe loko ku li matoya, vhanu lava kalaka va nga na lipfumelo, vhanu lava kalaka va nga basanga, nakone va yentxaka mintxhumu leyi nyenyentsaka, vadlayi, vayentxi va swa tingana hi tlhelo dzra tinkuku,* vangoma, lava gandzrelaka swithombe, ni hinkwavu lava hembaka, va ta txukumeteliwa a tiveni dzra ndzrilo lowu pfuzraka ni xivavula. Leswi swi fanekisela lifu dzra wubidzri.”
9 Yin’we ya tintsrumi leta 7, leti a ti ni 7 wa swibya leswi a swi tale hi 7 wa makhombo ya wugamu, yi ni tela yi tlhasa yi ni byela yi ku: “Tana ni ta ku komba mutekiwa, ku nga nsati wa Xihambana.”
10 Xileswo yi ni teka hi ntamu wa moya, yi ni yisa nhaveni leyikulu ya ku leha, yi ni komba Yerusalema, ku nga doropa dzra ku xwenga, na dzri xika hi le tilweni lani Xikwembu Nkulukumba a nga kone
11 na dzri ni ku phatima ka Xikwembu Nkulukumba. A ku phatima ka dzrone a ku fana ni ka zribye dzra lisima ku fana ni zribye dzra yaxpa, ledzri phatimaka ku fana ni vhidru ledzri vonekelaka.
12 A dzri ni muru wa wukulu wu tlhela wu leha, ni 12 wa tinyangwa; ka nyangwa ha wun’we a ku ni ntsrumi, nakone ka tinyangwa toleto a ku tsraliwe mavito ya 12 wa tinxaka ta vana va Israyele.
13 Hi tlhelo dzra le wuxeni a ku ni tinyangwa tizrazru, hi tlhelo dzra le n’walungu a ku ni tinyangwa tizrazru, hi tlhelo dzra le nyingitimu a ku ni tinyangwa tizrazru, hi tlhelo dzra le mpeladambu a ku ni tinyangwa tizrazru.
14 A muru wa doropa a wu tlhela wu va ni 12 wa mazribye ya masungulo, nakone ka wone a ku ni 12 wa mavito ya vapostola va 12 va Xihambana.
15 Lweyi a a vulavula na mine a a tamele lihlanga dzra woru akuva a pima doropa, tinyangwa ta dzrone kun’we ni muru wa dzrone.
16 A doropa ledzro a dzri ni mune wa matlhelo nakone a matlhelo wolawo a ma dzringana hi ku leha ni hi ku yanama. Kutani a pima doropa hi lihlanga, a kuma leswaku dzri ni kolomu ka 2.220 wa makilometru;* a ku leha, ku yanama ni ku tlakuka ka dzrone a ku fana.
17 A tlhela a pima ni muru wa dzrone, a kuma leswaku wu ni kolomu ka 64 wa mametru* hi ku ya hi mapimela ya mhunu, ku nga lawa a ntsrumi na yone yi ma tizrisiki.
18 A muru a wu yakiwe hi yaxpa, nakone a doropa a dzri hambiwe hi woru ledzrinene, ledzri vonekelaka ku fana ni vhidru.
19 A masungulo ya doropa a ma xongisiwe hi mazribye ya lisima ya mixaka hinkwayu. A masungulo ya ku sungula a ma li ya yaxpa, a ya wubidzri a ma li ya safiri, a ya wuzrazru a ma li ya kelkedoni, a ya wumune a ma li ya ermeralda,
20 a ya wuntlhanu a ma li ya sardoni, a ya wu 6 a ma li ya sardiyo, a ya wu 7 a ma li ya krizolite, a ya wu 8 a ma li ya berilo, a ya wu 9 a ma li ya topazi, a ya wu 10 a ma li ya krisoprasi, a ya wu 11 a ma li ya yasinti, a ya wu 12 a ma li ya ametixti.
21 Handle ka leswo, a tinyangwa leta 12 a ti ni 12 wa maperola; nyangwa yin’wana ni yin’wana a yi hambiwe hi perola dzrin’we. Nakone a ndlela leyikulu ya doropa a yi hambiwe hi woru ledzrinene, dzra ku vonekela ku fana ni vhidru.
22 A ni zanga ni vona tempele ka doropa ledzro, hikusa Yehovha Xikwembu Nkulukumba wa Ntamu Hinkwawu hi yene tempele dzra dzrone, na xone Xihambana hi xone tempele dzra doropa.
23 A doropa ledzro a dzri vileli dambu nambi ku li n’weti akuva swi dzri vaningela, hikusa a ku phatima ka Xikwembu Nkulukumba ka dzri vaningela, nakone a livaningu dzra dzrone i Xihambana.
24 A ku vaninga ka dzrone ku ta vaninga ndlela akuva matiko ma kota ku famba, nakone a tihosi ta misava ti ta buyisela doropa ledzro a lidzrumu dzra tone.
25 A tinyangwa ta dzrone a ti nge ti txhuka ti pfaliwa siku hinkwadzru, hikusa ka dzrone a ku nge ti va ni wusiku.
26 A lidzrumu dzra matiko ni xitxhavu swi ta yisiwa ka dzrone.
27 Kambe a ku na ntxhumu lowu ntxhimiki, nakone a ku na mhunu lweyi a yentxaka mintxhumu ya ku nyenyentsa kumbe a kanganyisaka lweyi a taka nghena ka dzrone, ku to nghena ntsena lava tsraliwiki a bukwini dzra Xihambana dzra wutomi.
Tintlhamuxelo ta le hansi
^ Kumbe: “ma faneliwa hi ku dumbiwa”.
^ Kumbe: “A ni Z”. Alfa i letra dzra ku sungula ka maletra ya Xigriki kasi ke Omega i letra dzra wugamu.
^ Kumbe: “na a nga hakeli ntxhumu”.
^ Vona Ntlhamuxelo Wa Mazritu. “Swiyentxo swa tingana hi tlhelo dzra tinkuku”.
^ Hi ku kongoma: “12.000 wa switadiyu”. Xitadiyu xin’we a xi ni 185 wa mametru.
^ Hi ku kongoma: “144 wa minkono”.
