Mpfuletelo Lowu Yamukeliwiki Hi Yohane 1:1-20
1 Lowu i mpfuletelo* wa Yesu Kriste, lowu Xikwembu Nkulukumba a mu nyikiki wone, akuva a komba malandzra ya Xikwembu Nkulukumba mintxhumu leyi taka yentxeka ku nga li khale. Kutani Yesu a zrumele ntsrumi yake ka nandzra wake Yohane, akuva hi ku tizrisa swihlamaliso yi ya mu komba mintxhumu leyi taka yentxeka a nkameni lowu taka,
2 yene a nyikele wumboni bya zritu ledzri Xikwembu Nkulukumba a dzri nyikeliki ni wumboni bya mintxhumu hinkwayu leyi Yesu Kriste a yi hlayiki,* ina, wumboni bya mintxhumu hinkwayu leyi a yi voniki.
3 Awa nyonxa lweyi a dondzraka mazritu ya wuprofeta lebyi hi zritu ledzri tlakukiki nakone va nyonxa lava va ma twaka kun’we ni lava va yingisetaka mintxhumu leyi tsraliwiki ka byone, hikusa a nkama lowu bekiwiki wu kusuhi.
4 Mine Yohane, ni tsralela 7 wa mabandla lama nga xifundzreni xa Aziya:
Ingiki mi nga va ni timpswalu letikulu ni ku zrula leswi pfaka hi ka “Lweyi a nga kone, lweyi a viki kone ni lweyi a taka”, nakone swi pfaka hi ka 7 wa mimoya leyi nga mahlweni ka xiluvelo xake,
5 ni hi ka Yesu Kriste lweyi a nga “Mboni leyi Dumbekaka”, “mativula ka lava fiki” ni “Hosi ya tihosi ta misava”.
Yesu Kriste lweyi a hi zrandzriki a tlhela a hi ntsrhunxa ka swidoho swezru hi ku tizrisa ngati yake
6 nakone a hi yentxiki hi va mfumu, vaprista va Xikwembu Nkulukumba wake tlhelo Papayi wake, a a dzrumisiwi a tlhela a va ni ntamu hi lani ku nga helikiki. Amen.
7 Lavisani! Awa ta hi matlavi nakone vhanu hinkwavu va ta mu vona, kun’we ni lava va mu tlhaviki; a tinxaka hinkwatu ta misava ti ta tiba swifuva hi ku vaviseka hi kola kwake. Ina, swi ta yentxeka hi kakunene. Amen.
8 “Hi mine Alfa na Omega”,* ku hlaya Yehovha Xikwembu Nkulukumba, “Lweyi a nga kone, lweyi a viki kone ni lweyi a taka, ni Xikwembu Nkulukumba wa Ntamu Hinkwawu”.
9 Mine Yohane makwenu tlhelo mhunu lweyi na yene a kumanaka ni tinxanisa nakone a taka hlengela na n’wine ka mfumu, futsrhi na yene a tiyiselaka swanga mulandzreli wa Yesu, a ni le xihlaleni lexi vitaniwaka Patmosi hi mhaka ya ku vulavula mayelanu na Xikwembu Nkulukumba ni ku nyikela wumboni mayelanu na Yesu.
10 Hi kola ka moya wa ku xwenga ni tikume na ni le sikwini dzra Hosi, hiloko ni yingela zritu ledzrikulu a ntsrhaku kwanga dzra mpfumawulu wa ku fana ni wa xipalapala,*
11 dzri ku: “Leswi u swi vonaka swi tsrale bukwini u va u swi zrumela ka 7 wa mabandla: ku nga bandla dzra Efesa, bandla dzra Smirna, Pergamosi, Tiyatira, Sarda, Filadelfiya ni bandla dzra Lawudikiya.”
12 Ni ndzrulukile akuva ni vona lweyi a a vulavula na mine, kutani loko ni ndzrulukile, ni vone 7 wa mimotsre ya woru,*
13 a xikazri ka mimotsre yoleyo a ku ni mhunu lweyi a fanaka ni n’wana wa mhunu, na a yambale mpahla ya ku leha yi tlhasa minkondzrweni, a tsrimbe ni bandhi dzra woru ka xifuva.
14 Handle ka leswo, a misisi ya nhloko yake a yi li ya ku basa, a yi fana ni voya bya ku basa ni xitsrhwatsrhwa nakone a matihlo yake a ma fana ni langavi dzra ndzrilo,
15 a minkondzro yake a yi phatima ku fana ni kobri dzra dzrinene loko dzri nyivilikisiwa a ndzrilweni, nakone a zritu dzrake a dzri fana ni mpfumawulu wa mati ya manyingi.
16 A a ni 7 wa tinyeleti ka voko dzrake dzra xinene; hi le non’wini wake a ku huma xipada xa ku leha lexi lotiwiki nakone xi tsremaka hi matlhelo ha mabidzri, a wuso byake a byi phatima ngopfu swinene, a dzri fana ni dambu loko dzri tlhava hi ntamu.
17 A nkama ni nga mu vona, ni we minkondzrweni yake ingiki hi loko ne fa.
Kutani a ni tlhanteka voko dzrake dzra xinene a ku: “U nga txhavi. Hi mine wa ku Sungula ni wa Wugamu,
18 ni lweyi a hanyaka; a ni file, kambe swoswi na hanya! Nakone ni ta hanya hi masiku ni masiku, futsrhi ni ni mimpfungulu ya lifu ni ya Sizra.*
19 Xileswo yi tsrale hansi mintxhumu leyi u yi voniki, mintxhumu leyi yentxekaka swoswi ni mintxhumu leyi taka yentxeka ntsrhaku ka leyi.
20 A xihundla xa ku xwenga xa 7 wa tinyeleti leti u ti voniki a vokweni dzranga dzra xinene ni 7 wa mimotsre ya woru hi lexi: A 7 wa tinyeleti ti yimela 7 wa tintsrumi leti nga ka 7 wa mabandla, kasi ke a 7 wa mimotsre yi yimela 7 wa mabandla.
Tintlhamuxelo ta le hansi
^ Kumbe: “ntlhamuxelo; leswi paluxiwiki”.
^ Hi ku kongoma: “ni wumboni lebyi Yesu a byi nyikeliki”.
^ Kumbe: “A ni Z”. Alfa i letra dzra ku sungula ka maletra ya Xigriki kasi ke Omega i letra dzra wugamu.
^ Kumbe: “trombeta”.
^ A motsre ha wun’we a wu ni 7 wa mimbangu ya ku tlhoma swa ku vona ha swone.
^ Kumbe: “Hayidesi”, ku nga sizra ledzri tolovelekiki dzra vhanu. Vona Ntlhamuxelo Wa Mazritu.
