Руководящё совето — када найбари ӷрупа лэ манушэн, савэ драго полэн и ритярэн лэ Дэвлэско законо, и савэ руководин, кай пала Дэл тэ росԥэнэн па вся и люма. Вонэ диқэн пала дуй маменторя:

•   Вонэ подӷотавливают и проӷрама, пэ сави сытён лэ Иеговастирэ свидетеля. Кордэ ужал библейско литература, христиански собрании, ай кадяжэ разни школы важ лэ Иеговастирэ свидетеля (Луки 12:42).

•   Вонэ диқэн пала дила, сави терэн лэ Иеговастирэ свидетеля па вся и люма. Када, кай росԥэнэн пала Дэл и диқэн, пэр со трэбуй тэ жан и ловэ, савэ пожэртвовали пэ кадэя дила.

 Руководящё совето адес лэл важ пэстэ примеро лэ старейшынонэндар и апостолонэндар, савэ жувэнас андо пэрво вико андо Иерусалимо и прилэнас важни ришэнии важ всаворэ христиански собрании, савэ сас андэ кодэя время (Деяния 15:2, 6). Сар и кодэла мурша, савэ на парашэнас тэ кандэн лэ Дэвлэс, мурша, савэ адес служын андо Руководящё совето, на гиндон важ пэстэ, кай вонэ ӷлавни андэ амари арӷанизацыя. Вонэ родэн атветоря пэ вопросоря андэ Библия, и прижанэн, кай о Иегова стодя лэ Иисусос Христос, кай во тэ авэл Ӷлавно андэ собрания (1 Коринфянам 11:3; Эфесянам 5:23).

 Андо Руководящё совето кадэла мурша: Кеннэто Кук, Гейджо Флигло, Сэмюэло Хёрдо, Джеффри Джексоно, Стивено Летто, Геррито Лёшо, Марко Сандэрсоно, Дейвидо Сплэйно и Джеффри Уиндеро. Вонэ служын андо всемирно ӷлавно управления андо Уорвико (штат Нью-Йорк, США).

 Руководящё совето стодя шов камитеторя, савэ диқэн пала разно дила андэ амари арӷанизацыя. Кажно мурш андо Руководящё совето служый андо ек или май бут камитеторя.

•   Издательско камитето диқэл, кай тэ вижал библейско литература и кай ла тэ доставляют каринг трэбуй. Инке диқэл, кай тэ строин и здании, кай тэлён лэ Дэвлэсти, здании важ и переводческо дила и филиалоря.

•   Камитето анда координатороря диқэл пала юридически дила, ай кадяжэ диқэл, кай тэ поможын, кала терэлпэ природно бида и кала преследуют важ и вера. Ай кадяжэ кала терэлпэ авэр баро ԥаримос кай лэ Иеговастирэ свидетеля.

•   Камитето па кадроря заботийпэ пала кодэла, ко андэ разни страны служый андо Вефилё.

•   Писательско камитето подӷотавливает темы важ и библейско литература и важ амаро сайто. Ай инке во арӷанизует переводческо дила.

•   Служэбно камитето руководий кодэлэса, кай «и лащи новость пала Царство» уӷанглэ пэ вся люма (Матфеё 24:14).

•   Учебно камитето подӷотавливает и проӷрама важ и канӷрэсоря, важ и собрании и важ разни библейски школы, ай кадяжэ подӷотавливает библейски видеоря и аудио.

 Ко служый андо Руководящё совето терэн дила най кати андэ кадэла камитеторя. Инке вонэ стидэнпэ кажно курко, кай тэ подэн дума пала кода, со трэбуй важ амари арӷанизацыя. Вонэ ришают када па Библия. Кадэла мурша камэн тэ полэн, сави ришэния чалёла лэ Дэвлэсти и сар о Дэл сыкавэл када через пэско свынто духо. Вонэ старыинпэ тэ прилэн ришэнии, савэ чалёна всаворэнди андар лэндэ (Деяния 15:25).

 Када христианоря, савэнди доверяют, и савэ поможын, кай тэ жал дила андэ камитеторя, савэ стодя Руководящё совето (1 Коринфянам 4:2). Лэндэ исин опыто и способности, савэ трэбуй, кай тэ терэн дила андо камитето, андо саво вонэ назначени. Кадяжэ вонэ авэн пэ встречи важ кадэла камитеторя. И хоть вонэ нэ участвуют, кала прилэн ришэнии, вонэ моӷут тэ дэн лашо совето и тэ росԥэнэн дополнительно информацыя. Инке вонэ терэн кадя, сар ришыли андэ камитеторя и диқэн, со анэн кадэла ришэнии. Руководящё совето можэт тэ дэл лэнди задания тэ диқэнпэ лэ ԥралэнца, савэ жувэн андэ разни страны или тэ выступают пэ ежэӷодни собрании или пэ выпускоря андэ Школа Галаадо.