Пэрво письмо андо Каринфо 11:1-34
11 Лэн мандар примеро, сар мэ лав примеро лэ Христостар.
2 Мэ драго дав дума пала тумэндэ, важ кода кай тумэ никала на бистрэн пала мандэ и састэс приритярдён кодэлэсти, со мэ пэрэдэм тумэнди.
3 Мэ камав, кай тумэ тэ ӷанэн: о Христос — хулай пэ кажно мурш, о мурш — хулай пэ жувли, ай о Дэл — хулай по Христос.
4 Если о мурш ушарадэ шэрэса мангэлпэ или пэрэдэл и дэвликунэ алава, во лажаварэл кодэлэс, ко хулай пэр лэстэ.
5 Если и жувли найушарадэ шэрэса мангэлпэ или пэрэдэл и дэвликунэ алава, вой лажаварэл кодэлэс, ко хулай пэр латэ. Када со тэ обрий о шэро.
6 Важ кода кай если и жувли на ушаравэл о шэро, тоди мэк вой опшынэн пэсти бал. Но если важ латэ лажаво тэ авэл опстрыжымэ или обриимэ, тоди мэк лэл варисо по шэро.
7 О мурш на трэбуй тэ ушаравэл о шэро, важ кода кай о Дэл создал лэс пар пэстэ и через лэстэ о Дэл ашэл ашунгло. Ай через и жувли ашэл ашунгло о мурш.
8 Най о мурш жыля ла жувлятар, ай и жувли жыля лэ муршэстар.
9 Тай инке най о мурш сас создано важ и жувли, ай и жувли сас создано важ о мурш.
10 Акэ важ када, ай кадяжэ важ и анӷелоря и жувли трэбуй тэ ԥиравэл варисо по шэро. Кадя вой сыкавэла, кай пэр латэ исин хулай.
11 Но кодэла, ко андярэл лэ Барэ Хуластири время, полэн, кай и жувли нэ можэт би лэ муршэско, ай о мурш нэ можэт би ла жувляко.
12 Сар и жувли жыля лэ муршэстар, кадя и о мурш арақадёл ла жувлятар. Ай вся жал лэ Дэвлэстар.
13 Диқэн екжэнэ: прижал ла жувляти найушарадэ шэрэса тэ мангэлпэ лэ Дэвлэсти англа авэр?
14 О мурш на сас создано, кай тэ одмэкэл лунги бал, и када лажаимос важ лэстэ.
15 Ай если кай и жувли лунги бал, када латири шук. И бал латэ, кай вой тэ ушаравэл о шэро.
16 Ай если варико камэл варисо тэ стерэл против кадэва порядко, тоди амэ ԥэнаса, кай авэр порядко нинай ни амэндэ, ни кай лэ Дэвлэстирэ ӷурторя.
17 Но мэ на дав дума пала тумэндэ драго, важ кода кай, кала тумэ стидэнпэ ӷуртом, кадэлэстар най о лашымос, ай о вэрытимос.
18 Май ӥто всаворэстар, мэ ашундэм, кай тумэ, кала стидэнпэ ӷуртом, розделинпэ, и мэ набут патяв кадэлэсти.
19 Да, машкар тумэндэ авэна кодэла, ко отделийпэ, и кадя дицола, ко андар тумэндэ уӷодно лэ Дэвлэсти.
20 Кала тумэ стидэнпэ ӷуртом, кай тэ справин лэ Барэ Хуластири мисяйля, тумэ терэн када нэправильно.
21 Инке жы каринг кода сар тэ поджал и время важ тумари мисяйля, кажно хал пэско хамос, и вижал, кай варико боқало, ай варико мато.
22 Хэба тумэндэ нинай цэра, кай котэ тэ хан и тэ пэн? Или тумэ вэрыцын лэ Дэвлэско ӷурто и камэн тэ лажаварэн кодэлэн, кастэ нисо нинай? Со мэ тоди тумэнди тэ ԥэнав? Акэ пала када на ԥэнава тумэнди о лашо алав.
23 Мэ сытярав тумэн кодэлэсти, со уӷанглэм лэ Барэ Хуластар. О Баро Хулай о Исусо андэ рят, кала лэс трэбуй сас тэ здэн, ля о марно,
24 блаӷодарисардя лэ Дэвлэс, ԥагля о марно и ԥэндя: «Кадэва марно сыкавэл мэрни тила, сави мэ отдав важ тумэндэ. Терэн када, кай тэ сэрэн мэрни время».
25 Кадяжэ посли мисяйля во дя лэнди о вино и ԥэндя: «Кадэва вино сыкавэл и нэви солах пэ мэрно рат. Терэн када кажно разо, кала пэн лэс, кай тэ сэрэн мэрни время».
26 Кажно разо, кала тумэ хан кадэва марно и пэн кадэва вино, тумэ росԥэнэн пала лэ Барэ Хуластири смэрть, пока во на авэла.
27 Кочай кодэва, ко хал о марно или пэл лэ Барэ Хуласко вино и андэ кодэя время андярэл пэс найдраго, терэл бэзэх против лэ Барэ Хуластири тила и против лэско рат.
28 Кажно трэбуй тэ диқэл, со лэстэ андо ди, кай тэ полэл, можэт во тэ хал и тэ пэл чи най, и кати тоди мэк хал о марно и пэл о вино.
29 Ай ко хал и пэл и на полэл, со сыкавэл лэ Барэ Хуластири тила, во ашэл дошало, кала хал и пэл.
30 Акэ васо машкар тумэндэ бут кодэлэн, ко би зорэско и насвало, и чимало кодэлэн, ко муля.
31 Ай тэ полэн тумэ май драго, со тумэндэ андо ди, тумэ на авелоп дошалэ.
32 Но кала о Иегова сындой амэн, во дэл амэнди годи, кай амэ тэ на ашас дошалэ вмести кадэла люмаса.
33 Ни акэ, ԥрала, кала тумэ авэн пэ кадэя мисяйля, аштярэн ек еқэс.
34 Если варико боқало, мэк хал цэрэ, кай тумэ тэ на ашэн дошалэ англа Дэл, кала стидэнпэ ӷуртоса. Ай авря диласа управисавава, кала авава.
