Лащи новость лэ Иоаностар 8:12-59
8 12 О Иисусо упалэ взвисайля каринг о народо: «Мэ — свето важ и люма. Ко жал мэрнэ дромэса*, во никала на лэла тэ ԥирэл андэ тэмнота, — лэстэ авэла свето, савэстар жал и жызня».
13 Пэ када и фарисеёря ԥэндэ лэсти: «Ту екжэно англа миро потвердис о алав пала пэстэ, кочай тирэ алава нисо на ашэн».
14 О Иисусо ԥэндя лэнди: «Дажэ если мэ екжэно потвердисарав о алав пала пэстэ, андэ мэрнэ алава исин зор, важ кода кай мэ ӷанав, катар мэ авелэм и каринг жав. Ай тумэ на ӷанэн, катар мэ авелэм и каринг жав.
15 Тумэ сындон пала авэр па лэ манушэско гиндо — мэ жэ ни пала кастэ на сындосарав.
16 Ай если мэ и сындосарав, тоди мэрно сындо справедливо, важ кода кай мэ най екжэно, но манца о Дад, саво ман бишалдя.
17 Тай инке, андэ тумаро законо пистромэ: „Кодэлэсти, со потвердин дуй мануш, исин патяимос“.
18 Мэ екжэно потвердисарав о алав пала пэстэ, и о алав пала мандэ потвердий о Дад, саво ман бишалдя».
19 Тоди вонэ пушлэ лэстар: «Кай тиро Дад?» О Иисусо ԥэндя лэнди: «Тумэ на ӷанэн ни ман, ни мэрнэ Дадэс. Тэ ӷанглоп тумэ ман, ӷанглоп и мэрнэ Дадэс».
20 Во ԥэнэнас кадэла алава, кала сытярэлас андэ лэ Дэвлэско цэр*, котэ, кай сас и кувшыноря лэ ловэнца важ лэ Дэвлэстири дила. Но нико лэс на астардя, важ кода кай лэстири время инке на авеля.
21 О Иисусо упалэ ԥэндя лэнди: «Мэ ужавтар. Тумэ лэна тэ родэн ман, но всаек мэрэна андэ пэско бэзэх. Интя, каринг мэ жав, тумэ нэ сможэте тэ авэн».
22 Тоди и иудеёря линэ тэ пушэн: «Во со, тидэлпэ корко пэс тэ умарэл? Васо во ԥэнэн: „Интя, каринг мэ жав, тумэ нэ сможэте тэ авэн“?»
23 Инке во ԥэндя: «Тумэ катар, па ԥув, ай мэ авелэм па нэбо. Тумэ анда кадэя люма, ай мэ най анда кадэя люма.
24 Кочай мэ и ԥэндэм тумэнди, кай тумэ мэрэна андэ пэско бэзэх. Важ кода кай, если на патяна, кай кодэва, ко трэбуй сас тэ авэл, — када мэ, тумэ мэрэна андэ пэско бэзэх».
25 Вонэ пушлэ лэстар: «Ай ко ту?» О Иисусо ԥэндя лэнди: «Состэ мэ вопще дав дума тумэнца?
26 Мэ моӷу бут со пала тумэндэ тэ ԥэнав и важ бутэстэ тумэн тэ лажаварав. Кодэва, ко ман бишалдя, ԥэнэн чачимос, и мэ ԥэнав лэ мирости кода, со ашундэм лэстар».
27 Вонэ на полинэ, кай во ԥэнэнас лэнди пала Дад.
28 Инке о Иисусо ԥэндя: «Кала тумэ ваздэна* лэ манушэстирэ Шавэс, то уӷанэна, кай када мэ и кай мэ нисо на терав корко пэстар. Мэ ԥэнав кати кода, сости сытярдя ман о Дад.
29 Кодэва, ко бишалдя ман, — манца. Во на ашадя ман екжэнэс, важ кода кай мэ вся и время терав кода, со лэсти уӷодно».
30 Кала во ԥэнэнас вся када, бут мануша патяе андэр лэстэ.
31 О Иисусо ԥэндя кодэлэнди, ко патяя андэр лэстэ: «Если тумэ жувэн па мэрно законо*, тоди тумэ па чачимастэ андярэн мэрни время*.
32 Тумэ уӷанэна о чачимос, и через о чачимос ашэна свободни».
33 Пэ када дэсавэ ԥэндэ: «Амэ лэ Авраамостирэ бэяцэ и никала на самас раборя. Васо ту ԥэнэс амэнди: „Ашэна свободни“?»
34 О Иисусо ԥэндя лэнди: «Ԥэнав тумэнди чачимос: кажно, ко терэл бэзэх, — лэ бэзэхэско рабо.
35 О рабо на ашэлпэ андо цэр пэ вся и время, ай о шаво ашэлпэ пэ вся и время.
36 Если о Шаво дэла тумэнди свобода, тумэ ашэна па чачимастэ свободни.
37 Мэ ӷанав, кай тумэ лэ Авраамостирэ бэяцэ. Но тумэ камэн ман тэ умарэн, важ кода кай на приашундён каринг мэрно алав.
38 Мэ ԥэнав пала кода, со диқлэм, кала сымас мэрнэ Дадэса, ай тумэ терэн кода, сости сытелэ пэстирэ дадэстар».
39 Пэ када вонэ ԥэндэ лэсти: «Амаро дад — о Авраамо». Но о Иисусо ԥэндя лэнди: «Тэ авелоп тумэ лэ Авраамостирэ бэяцэ, тоди андярдоп пэс сар о Авраамо.
40 Но тумэ камэн тэ умарэн ман — кодэлэс, ко ԥэндя тумэнди пала чачимос, саво ашундя лэ Дэвлэстар. О Авраамо кадя на терэлас.
41 Тумэ терэн сар тумаро дад». Вонэ ԥэндэ лэсти: «Амэ закони* бэяцэ, амэндэ ек Дад — о Дэл».
42 О Иисусо ԥэндя лэнди: «Тэ авелоп о Дэл тумаро Дад, тумэ любисардоп ман, важ кода кай мэ авелэм лэстар и акана мэ катэ. Мэ авелэм най корко пэстар — во бишалдя ман.
43 Васо тумэ нащи полэн, со мэ дав дума? Важ кода кай тумэ на камэн* тэ ашунэн мэрнэ алава.
44 Тумаро дад — о Бэнг, и тумэн цырдэл тэ терэн кода, со камэл тумаро дад*. Во ля тэ одлэл и жызня кодэла времятар, сар звазгляпэ, и отшутя о чачимос, важ кода кай во на любий о чачимос. Кала во хохавэл, во сыкавэл, саво во, важ кода кай во сыно хохавно и лэ хохаимаско дад.
45 Ай мэ ԥэнав чачимос, кочай тумэ манди и на патян.
46 Ко андар тумэндэ дошалярэла ман андо бэзэх? Ай если мэ ԥэнав чачимос, васо тумэ манди на патян?
47 Кодэва, ко лэ Дэвлэстар, ашунэл лэ Дэвлэстирэ алава. Ай тумэ най лэ Дэвлэстар, кочай и на ашунэн».
48 Пэ када и иудеёря ԥэндэ лэсти: «Хэба амэ най чаче ԥэнас, кай ту самаритя́но и андэр тутэ о найвужо?»
49 О Иисусо ԥэндя лэнди: «Андэр мандэ нинай о найвужо. Мэ став патив пэ мэрно Дад, ай тумэ ман ӷиткон.
50 Но мэ на старысавав тэ затерав пэсти ашунгло алав — када о Дэл камэл, кай мэ тэ ашав ашунгло и када во прилэл ришэния*.
51 Патян манди: ко ритярэл мэрно законо, во никала на мэрэла*».
52 И иудеёря ԥэндэ лэсти: «Акана амэ точно ӷанас, кай андэр тутэ о найвужо. О Авраамо муля, и кодэла, ко пэрэдэлас и алава лэ Дэвлэстар,* тожэ, ай ту ԥэнэс: „Ко ритярэл мэрно законо, во никала на мэрэла“.
53 Ту со, май баро амарэ дадэстар лэ Авраамостар? Во муля, и кодэла, ко пэрэдэлас и алава лэ Дэвлэстар,* мулинэ. Тоди ко ту кацаво?»
54 О Иисусо ԥэндя лэнди: «Тэ старысайлоп мэ екжэно тэ затерав пэсти ашунгло алав, тоди кацаво ашунгло алав на ашэлоп нисо. Но мэ ашав ашунгло через мэрно Дад — кодэва, кас тумэ прижанэн пэстирэ Дэвлэса
55 и кас всаек на ӷанэн. Ай мэ лэс ӷанав. Тэ ԥэндоп мэ, кай на ӷанав лэс, тоди мэ авелоп хохавно, сар тумэ. Но мэ лэс ӷанав и ритярав лэско законо*.
56 Тумаро дад о Авраамо фартэ радуияспэ кодэлэсти, кай диқэла мэрно дес, и во диқля лэс и сас лошало».
57 И иудеёря ԥэндэ лэсти: «Тути нинай дажэ 50 бэрш, и ту диқлян лэ Авраамос?»
58 О Иисусо ԥэндя лэнди: «Ԥэнав тумэнди чачимос: мэ сымас, сар инке на арақаделя о Авраамо».
59 Тоди вонэ хутилдэ́ и бара тэ шувидэн андэр лэстэ, но во гараделя лэндар и ужылятар анда лэ Дэвлэско цэр*.
Сноски
^ Или «жал пала мандэ».
^ Или «храмо».
^ Катэ и дума жал пала кода, кай тэ казнин по столбо.
^ Или «алав».
^ Или «мэрнэ ученикоря».
^ Или «най бэяцэ лэ билажавардимастар». Греч. парнэ́я.
^ Или «нэ можэте».
^ Или «тумэ камэн тэ андярэн тумарэ дадэстири время».
^ Или «сындой».
^ Или «никала на диқэла смэрть».
^ Или «лэ Дэвлэстирэ особи мануша».
^ Или «лэ Дэвлэстирэ особи мануша».
^ Или «приритярдював лэстирэ алавэсти».
^ Или «храмо».
