Лащи новость лэ Иоаностар 1:1-51
1 Фартэ дэлмут, кала нисо инке на сас создано, сас Алав*, и о Алав сас паша Дэл, и о Алав сас дэвлэса*.
2 Во сас лэ Дэвлэса, кала инке нисо на сас создано.
3 Вся, со исин, о Дэл стердя вмести лэса*, и би лэско нисо на сас стердо.
4 Через лэстэ появисайля жызня, ай и жызня* сас свето важ о миро.
5 О свето свитий андэ тэмнота, но и тэмнота нэ можэт тэ бирой лэс.
6 Авеля о мануш, савэс бишалдя о Дэл. Лэс ақарэнас Иоано.
7 Во авеля сар свидетелё — тэ потвердий о чачимос пала свето, кай через лэстэ со май разни мануша тэ патян.
8 Во на сас кодэва свето, но трэбуй сас тэ потвердий о чачимос пала свето.
9 О чачуно свето, саво свитий лэ разнонэ манушэнди, трэбуй сас ӥто тэ авэл андэ люма.
10 Во сас андэ люма, но и люма, сави появисайля через лэстэ, лэс на ӷатярдя.
11 Во авеля кай пэстирэ, но вонэ лэс на прижанглэ.
12 Ай кодэлэнди, ко лэс прижангля, во домэкля* тэ ашэн лэ Дэвлэстирэ бэяцэ, важ кода кай вонэ патянас андэр лэстэ*.
13 Вонэ арақаделэ най лэ манушэндар и най важ кода, кай кадя закамля о миро или лэндирэ родителя, но вонэ арақаделэ лэ Дэвлэстар.
14 О Алав ашэля манушэса и жувэлас машкар амэндэ. Амэ диқлям, сар марэлас лэстар и стэма — када о Дэл стердя, кай лэско особено шаво тэ ашэл ашунгло. Во на парашэлас тэ росԥэнэн* о чачимос, и о Дэл вся и время лэс блаӷословияс*.
15 (О Иоано потвердияс о чачимос пала лэстэ и ԥэнэнас англа всаворэ: «Када пала лэстэ мэ ԥэндэм: „Ко авэл посли мандэ, во ашэля май баро мандар, важ кода кай авеля пэ люма, кала ман инке на сас“».)
16 Во вся и время сыкавэлас каринг амэндэ пэско баро лашымос, саво лэстэ кадя бут, кай никала на прожала.
17 Через о Маисеё о Дэл дя законо, ай через о Иисусо Христос — сыкадя пэско баро лашымос и дя тэ уӷанас о чачимос.
18 Ни ек мануш никала на диқля лэ Дэвлэс. Пала лэстэ амэнди росԥэндя о особено шаво, саво сар Дэл. Во находийпэ паша Дад*.
19 Акэ со о Иоано, сар свидетелё, потвердисардя. И иудеёря бишалдэ анда Иерусалимо лэ рашан и лэ левитонэн тэ пушэн лэстар: «Ко ту?»
20 Тоди во ворта ԥэндя: «Мэ най Христос*».
21 Вонэ пушлэ: «Ай ко ту? О Илья?» Во ԥэндя: «Най». Тоди вонэ пушлэ: «Можэт, ту лэ Дэвлэско особо мануш*?» И во упалэ ԥэндя: «Най!»
22 Вонэ пушлэ лэстар: «Мо ԥэн ужэ, ко ту? Ԥэн амэнди, кай амэ тэ пэрэдас тирэ алава кодэлэнди, ко амэн бишалдя. Со ту ԥэнэса пала пэстэ?»
23 Во ԥэндя: «Када мэрно ӷолосо ӷромко ашундёл андэ пустыня: „Вировнин о дром важ о Иегова!“ — сар ԥэндя о Иса́я, лэ Дэвлэско особо мануш*».
24 Ай кадэлэ манушэн бишалдэ и фарисеёря.
25 Вонэ пушлэ лэстар: «Ай васо ту болэс, если ту най о Христос, най о Илья и най лэ Дэвлэско особо мануш*?»
26 О Иоано ԥэндя: «Мэ болав лэ паеса. Но машкар тумэндэ исин кодэва, кас тумэн на ӷанэн,
27 кодэва, ко авэл посли мандэ. Мэ на ашав дажэ тэ росԥандав и пряшка пэ лэстирэ сандаля».
28 Када сас андэ Вифа́ния, пала лэн Ярда́но, кай болэлас о Иоано.
29 Пэ авэр дес во диқля лэ Иисусос, саво жалас каринг лэстэ, и ԥэндя: «Акэ лэ Дэвлэско Бакроро, саво залэл* ла люмако бэзэх!
30 Када пала лэстэ мэ ԥэндэм: „Посли мандэ авэл кодэва, ко ашэля мандар май баро, важ кода кай авеля пэ люма, кала ман инке на сас“.
31 Мэ лэс на ӷанавас, но мэ авелэм тэ болав лэ паеса, кай пала лэстэ тэ ашундёл андо Израилё».
32 Кадяжэ о Иоано росԥэндя: «Мэ диқлэм, кай па нэбо, сар ӷолубо, змэкляпэ о свынто зор и ашэляпэ пэр лэстэ.
33 Мэ лэс на ӷанавас, но кодэва, ко бишалдя ман тэ болав лэ паеса, ԥэндя манди: „Ту диқэса кодэлэс, пэр кастэ змэкэлапэ о свынто зор и пэр кастэ во ашэлапэ, — акэ во и исин, ко болэл лэ свынтонэ зорэса“.
34 Мэ диқлэм када и, сар свидетелё, ԥэнав о чачимос, кай во — лэ Дэвлэско Шаво».
35 Пэ авэр дес о Иоано упалэ тердёлас котэ пэстирэ дуе учениконэнца
36 и, кала додиқля лэ Иисусос, ԥэндя: «Акэ лэ Дэвлэско Бакроро!»
37 Лэдуй ученикоря жылэ пала лэстэ, кала ашундэ када.
38 О Иисусо обрисайля, додиқля, кай вонэ жан палал, и пушля лэндар: «Со тумэ родэн?» Вонэ ԥэндэ лэсти: «Рави́ (када пэрэандярдёл сар «учителё»), кай ту ашэлянпэ тэ ратярэс?»
39 Во ԥэндя: «Авэн, и диқэна екжэнэ». Сас варикай 4 часа дня*. Вонэ жылэ лэса и диқлэ, кай во ашэляпэ тэ ратярэл, и сас лэса вся о дес.
40 Ек анда кодэла ученикоря, савэ ашундэ лэ Иоаностирэ алава и жылэ лэ Иисусоса, сас о Андрий. Лэстирэ ԥралэс ақарэнас Си́мано Пётро.
41 Во сразу виарақля пэстирэ ԥралэс лэ Симанос и ԥэндя лэсти: «Амэ диқлям* лэ Христос» (со означает «кодэва, кас витидя о Дэл»),
42 ай тоди андя лэс каринг о Иисусо. О Иисусо диқля пэр лэстэ и ԥэндя: «Ту Си́мано, лэ Иоаноско шаво. Пэр тутэ лэна тэ ԥэнэн Ки́фа» (пэ греческо шыб Пётро).
43 Пэ авэр дес о Иисусо закамля тэ жал андэ Галиле́я. Во диқляпэ лэ Филипоса и ԥэндя лэсти: «Жа мэрнэ дромэса*».
44 Кадэва мануш сас анда Вифсаи́да — анда кадэва жэ форо сас о Андрий и о Пётро.
45 О Фили́по жыля каринг о Нафанаи́ло и ԥэндя лэсти: «Амэ диқлям* кодэлэс, пала кастэ пистромэ андэ лэ Маисеёско законо и пала кастэ ԥэнэнас лэ Дэвлэстирэ особи мануша*, — лэ Иисусос, лэ Иосифостирэ шавэс, анда Назаре́то».
46 Но о Нафанаи́ло пушля: «Хэба андо Назаре́то моӷут тэ авэн бахталэ мануша?» О Фили́по ԥэндя: «Жа и дик».
47 О Иисусо додиқля лэ Нафанаилос, саво жалас каринг лэстэ, и ԥэндя: «Акэ чачуно израильтянино, андэ саво ни ӷрама нинай хытрия».
48 О Нафанаи́ло пушля: «Катар ту ман ӷанэс?» О Иисусо ԥэндя: «Англа кода сар о Фили́по ақардя тут, мэ диқлэм тут тала инжырово витка».
49 Тоди о Нафанаи́ло ԥэндя лэсти: «Учителё*, ту — лэ Дэвлэско Шаво, ту — лэ Израилёско Царё».
50 Пэ када о Иисусо ԥэндя: «Ту патяс важ кода, кай мэ ԥэндэм тути: „Мэ диқлэм тут тала инжырово витка“? Ту диқэса пэбутэстэ май бут».
51 Кадяжэ во ԥэндя: «Патян: тумэ диқэна, сар ԥэрнадёла о нэбо, и додиқэна лэ Дэвлэстирэ анӷелонэн, савэ змэкэнпэ каринг лэ манушэско Шаво и ваздэнпэ упрэ».
Сноски
^ Или «лэ Дэвлэско прицтавителё». Катэ и май дур андэ кадэя ӷлава.
^ Или «дэвликуно».
^ Или «через лэстэ».
^ Или «лэстири жызня».
^ Или «дя возможность».
^ Досл. «андэ лэско алав».
^ Или «тэ сытярэл».
^ Или «во вся и время сыкавэлас баро лашымос, саво лэсти дя о Дэл, и вся и время ԥэнэнас о чачимос, саво уӷангля лэ Дэвлэстар».
^ Досл. «паша лэ Дадэско колин». Тэ авэс варикастэ паша колин — када сыкавэлас, кай во стол бари патив пэр тутэ.
^ Или «Избрано».
^ Или «ту пэрэдэс и алава лэ Дэвлэстар».
^ Или «саво пэрэдэлас и алава лэ Дэвлэстар».
^ Или «и ту най кодэва, ко пэрэдэл и алава лэ Дэвлэстар».
^ Досл. «ундярэл».
^ Досл. «10 часов (сар вижыля о қам)».
^ Досл. «виарақлям».
^ Или «жа пала мандэ».
^ Досл. «виарақлям».
^ Или «и мануша, савэ пэрэдэнас и алава лэ Дэвлэстар».
^ Досл. «рави́».
