Лащи новость лэ Иоаностар 6:1-71
6 Посли када о Иисусо лагля пэ авэр бэрэӷо андэ Галилейско моря, пэ сави кадяжэ ԥэнэнас Тивиря́цко.
2 Пала лэстэ ԥирэлас фартэ бут миро, важ кода кай диқэлас, сар во исцэлияс лэ насвалэн.
3 О Иисусо вазгляпэ по плай и бэшля котэ пэстирэ учениконэнца.
4 Када сас время, кала пашолас о иудейско празнико Патради.
5 Кала о Иисусо додиқля, кай каринг лэстэ жан бут мануша, во пушля кай о Фили́по: «Кай амэнди тэ тинас марно, кай лэн тэ праварас?»
6 Во ӷанэнас, со лэла тэ терэл, но пушля пала када, кай тэ диқэл, сар о Фили́по андярэла пэс.
7 О Фили́по ԥэндя лэсти: «Дажэ если тэ тинэс марно пэ 200 мардэ*, када на хутила, кай кажнонэсти тэ дорэсэлпэ хоть понабут».
8 Авэр лэско ученико, о Андрий, лэ Симаноско лэ Петроско ԥрал, ԥэндя лэсти:
9 «Катэ кай ек бэято исин 5 пышки* и 2 маще. Но хэба када хутила тэ праварас скати манушэн?»
10 О Иисусо ԥэндя: «Мэк всаворэ бэшэн». Котэ сас бут чар, и о миро бэшля пэ ԥув. Ек и мурш котэ сас варикай 5 000.
11 О Иисусо ля о марно, блаӷодарисардя лэ Дэвлэс и роздя лэс лэ манушэнди; кода жэ во стердя и лэ мащеса, и кажно халя, скати камля.
12 Ай кала и мануша чалелэ, во мангля лэ учениконэндар: «Стидэн вся, со ашэляпэ, кай нисо тэ на хындёл».
13 Вонэ стидэ́ котора лэ марнэстар* андэ 12 ԥэрди корзины.
14 Кала и мануша диқлэ, сави чуда стердя о Иисусо, вонэ линэ тэ ԥэнэн: «Када чаче лэ Дэвлэско особо мануш*, саво трэбуй сас тэ авэл андэ люма».
15 Ай о Иисусо ӷанэнас, кай вонэ камэн тэ заставин лэс тэ ашэл лэндирэ царёса, и кочай упалэ ужылятар по плай, кай тэ авэл екжэно.
16 Вэчэром и ученикоря змэклэпэ каринг и моря.
17 Вонэ бэшлэ андэ лодка и лаглэ пэ авэр риг моря, андо Капирнау́мо. (Ужэ тэмносайля, ай о Иисусо инке на рисайля.)
18 Андэ кодэя время вазгляпэ бари балвал, ай и моря ля тэ бурлий и тэ пенийпэ.
19 Вонэ проплывисардэ ужэ 5 чи 6 километроря*, кала додиқлэ лэ Иисусос, саво жалас па моря каринг и лодка, и пэрэдарайлэ.
20 Во ԥэндя лэнди: «На́ даран! Када мэ».
21 Тоди вонэ сас ради тэ лэн лэс андэ лодка и почти сразу посли када авелэ кай о бэрэӷо, каринг саво плывисардэ.
22 Пэ авэр дес о миро, саво ашэлясаспэ пэ кодэя риг моря, додиқля, кай паша бэрэӷо будэр нинай ни ек лодка. Жы каринг када котэ сас найбари лодка, но о Иисусо на лагля пэр латэ. Лэстирэ ученикоря уплывисардэ би лэско.
23 Андэ кодэя жэ время авеля най ек лодка анда Тивиря́да. Вонэ терделэ найдур кодэлэ ҭанэстар, кай о миро халя о марно, посли кода сар о Иисусо* поблаӷодарисардя лэ Дэвлэс.
24 Кала и мануша додиқлэ, кай нинай ни лэ Иисусос, ни лэстирэ учениконэн, вонэ бэшлэ андэ кадэла лодки и лаглэ андо Капирнау́мо, кай тэ родэн лэ Иисусос.
25 Вонэ виарақлэ лэс по бэрэӷо пэ авэр риг и пушлэ лэстар: «Учителё*, кала ту кардэ авелян?»
26 О Иисусо ԥэндя: «Чачимос ԥэнав тумэнди: тумэ родэн ман най важ кода, кай диқлэ и чудеса, ай важ кода, кай халэ о марно и чалелэ.
27 Стон о зор най важ о хамос, саво римойпэ, ай важ о хамос, саво на римойпэ и саво анэн вечно жызня. Кацаво хамос дэл тумэнди лэ манушэско Шаво, важ кода кай о Дад, амаро Дэл, дя лэсти пэ када о право*».
28 Тоди вонэ пушлэ лэстар: «Со амэнди тэ терас, кай о Дэл амэн тэ блаӷословий?»
29 О Иисусо ԥэндя: «О Дэл камэл, кай тумэ тэ патян андэ кодэва, кас во бишалдя».
30 Ай вонэ ԥэндэ лэсти: «Сави чуда ту сыкавэса, кай амэ тути тэ патяс? Со ту стерэса?
31 Например, амарэ папоря ханас ма́на андэ пустыня. Андэ Свынти Лила пистромэ: „Во дя лэнди марно па нэбо“».
32 О Иисусо ԥэндя: «Ԥэнав тумэнди чачимос: о Маисеё на дя тумэнди чачуно марно па нэбо. Но акана лэс тумэнди дэл мэрно Дад.
33 Важ кода кай о марно лэ Дэвлэстар — када кодэва, ко зжал па нэбо и дэл ла люмати и жызня».
34 Пэ када вонэ ԥэндэ: «Учителё*, вся и время дэ амэнди кадэва марно».
35 О Иисусо ԥэндя лэнди: «Мэ — марно, саво дэл жызня. Ко авэл каринг мандэ, во никала на авэла боқало, и ко патял андэр мандэ, во никала на ашэлапэ би паеско.
36 Но, сар мэ ужэ ԥэнавас тумэнди, тумэ, хоть и диқэн ман, всаек на патян.
37 Всаворэ, кас дэл манди мэрно Дад, авэна каринг мандэ, и мэ никала на видаравава кодэлэс, ко авэл мандэ.
38 Важ кода кай мэ авелэм па нэбо, кай тэ андярав най пэстири время, ай и время кодэлэстири, ко бишалдя ман.
39 И во камэл, кай мэ тэ на хасарав ни еқэс анда кодэла, кас во манди дя, но тэ жундярав лэн андо послиднё дес.
40 Мэрно Дад камэл, кай кажно, ко прижанэн лэ Шавэс и патял андэр лэстэ, тэ жувэл вечно, и мэ жундярава лэс андо послиднё дес».
41 Тоди и иудеёря линэ тэ холявэн, кай во ԥэндя: «Мэ — марно, саво зжыля па нэбо».
42 Вонэ ԥэнэнас: «Хэба када най о Иисусо, лэ Иосифоско шаво? Амэ жэ ӷанас лэстирэ дадэс и лэстиря да. Сар во можэт тэ ԥэнэн: „Мэ зжылэм па нэбо“?»
43 Тоди о Иисусо ԥэндя: «Парашэн тэ холявэн.
44 Нико нэ можэт тэ авэл каринг мандэ, если о Дад, саво ман бишалдя, на пашарэла лэс каринг мандэ, и мэ жундярава лэс андо послиднё дес.
45 И мануша, савэ пэрэдэнас и алава лэ Дэвлэстар,* пистросардэ: „Лэн всаворэн лэла тэ сытярэл о Иегова“. Кажно, ко ашунэл лэ Дадэс и сытёл лэстар, пашол каринг мандэ.
46 Када на сыкавэл, кай варико анда мануша диқля лэ Дадэс. Лэ Дадэс диқля кати кодэва, ко лэ Дэвлэстар.
47 Патян: кодэва, ко патял, лэла вечно тэ жувэл.
48 Мэ — марно, саво дэл жызня.
49 Хоть тумарэ папоря и ханас и ма́на андэ пустыня, вонэ всаек мулинэ.
50 Ай кажно, ко хал о марно, саво зжал па нэбо, на мэрэла.
51 Мэ — жундо марно, саво зжыля па нэбо. Ко хал кадэва марно, во лэла тэ жувэл вечно. Кадэва марно — мэрни тила, сави мэ отдава, кай о миро тэ жувэл».
52 Тоди и иудеёря линэ тэ споринпэ ек еқэса. Вонэ ԥэнэнас: «Сар кадэва мануш можэт тэ дэл амэнди пэстири тила?»
53 Пэ када о Иисусо ԥэндя лэнди: «Патян манди: если тумэ на хан лэ манушэстирэ Шавэстири тила и на пэн лэско рат, тоди тумэндэ на авэла жызня*.
54 Ко хал мэрни тила и пэл мэрно рат, во лэла вечно тэ жувэл, и мэ жундярава лэс андо послиднё дес.
55 Важ кода кай мэрни тила — када чачуно хамос и мэрно рат — чачуно пимос.
56 Ко хал мэрни тила и пэл мэрно рат, — лэстэ ек гиндо манца, ай мандэ ек гиндо лэса.
57 Ман бишалдя о Дад, саво жундо, и сар мэ жував через лэстэ, кадя и кодэва, ко хал мэрни тила, лэла тэ жувэл через мандэ.
58 Акэ о марно, саво зжыля па нэбо. Во най кацаво, саво ханас тумарэ папоря — ханас и всаек мулинэ. Ко хал кадэва марно, во лэла тэ жувэл вечно».
59 Во ԥэндя када, кала сытярэлас андэ ла собранияко цэр* андо Капирнау́мо.
60 Бут анда лэстирэ ученикоря, кала ашундэ лэстирэ алава, ԥэндэ: «Када баро дело! Сар кацаво можно тэ ашунас?»
61 О Иисусо ӷанэнас, кай лэстирэ ученикоря холяйлэ пэ када, и ԥэндя лэнди: «Чаче када тумэн кадя холярдя?
62 Ай со, если тумэ диқэна, кай лэ манушэско Шаво ваздэлпэ интя, кай сас жы каринг када?
63 Кати о свынто зор дэл и жызня, екжэнэ и мануша нэ моӷут ла тэ затерэн*. И алава, савэ мэ тумэнди ԥэнавас, жан лэ свынтонэ зорэстар и дэн и жызня.
64 Но машкар тумэндэ исин кодэла, ко на патял». (Важ кода кай о Иисусо сразу ӷанэнас, ко андэр лэстэ на патял и ко лэс здэла.)
65 Во инке ԥэндя: «Акэ васо мэ ԥэнавас тумэнди: нико нэ сможэт тэ авэл каринг мандэ, если лэс на мэкэла о Дад».
66 Посли када бут лэ Иисусостирэ ученикоря рисайлэ каринг пэстири дила и будэр на ԥирэнас лэса.
67 О Иисусо пушля кай и 12 апосталоря: «Можэт, тумэ тожэ камэн тэ ужантар?»
68 О Си́мано Пётро ԥэндя лэсти: «Учителё*, каринг кастэ амэ тэ жас? Тирэ алава дэн вечно жызня.
69 И амэ патяям и ӷанас, кай ту — Свынто, савэс бишалдя о Дэл».
70 О Иисусо ԥэндя лэнди: «Хэба най мэ витидэм тумэн, всаворэн 12? Но ек андар тумэндэ — хохавно*».
71 Во ԥэнэнас пала Иуда, лэ Симаноско лэ Искариотоско шаво, саво, хоть и сас ек анда 12 апосталоря, ӷэт май интя здя лэс.
Сноски
^ Досл. «дина́рии».
^ Досл. «ячмени пышки».
^ Или «котора, савэ ашэлэпэ лэ пандже пышкэндар».
^ Или «кодэва, ко пэрэдэл и алава лэ Дэвлэстар».
^ Досл. «варикай 25 чи 30 ста́дии».
^ Или «Баро Хулай; Ӷосподино».
^ Досл. «рави́».
^ Или «стодя пэр лэстэ печать, кай блаӷословий лэс».
^ Или «Баро Хулай; Ӷосподино».
^ Или «лэ Дэвлэстирэ особи мануша».
^ Досл. «андэр тумэндэ нинай жызня».
^ Или, можэт, «пэ лэ миростири сэрбытория».
^ Досл. «ла тилатар нинай нисави польза».
^ Или «Баро Хулай; Ӷосподино».
^ О греческо алав дя́воло, саво катэ тердёл, кадяжэ ԥэнэн каринг о Бэнг. Када пэрэандярдёл сар «кодэва, ко андярэл вэрыто хохаимос пэ авэр».