2
Koj tano o Devel?
1. Sose amen valjani te služina e Devljese?
O čačutno Devel čerdža sa so isi ki Phuv. Ov nanelje početak hem niked na te ovelje krajo (Psalam 90:2). Oljestar avela o šukar haberi kova arakha ki Biblija (1. Timotejese 1:11). O Devel dijamen o dživdipe, odoljese amen valjani te služina samo oljese. Čitinen Pučaribe 4:11.
2. Savo tano o Devel?
Nijekh manuš niked na dikhlja e Devlje sose tano ov Duh, odova značini soj tano Najbaro hem so nane sar o manuša so živinena ki Phuv (Jovan 1:18; 4:24). Sa so čerdža o Devel mothovi amendže savo tano ov. Na primer, isi razno voće hem luludža kola mothovena oljeso mangipe hem mudrost. I Phuv, o nebo hem o čerenja mothovena amendže kobor tani bari oljesi moć. Čitinen Rimskonendže 1:20.
Amen šaj pobuter te sikljova savo tano o Devel dži čitina i Biblija. Na primer, oj vačeri so o Devel mangela hem so mrzini, savo tano premalo manuša hem sar dikhela ko razna buča. Čitinen Psalam 103:7-10.
3. Da lji o Devel isilje nav?
O Isus pheja: „Amaro Dad kova hijan ko nebo, te svetinipe to nav“ (Matej 6:9). Iako o Devel isilje but titule, ov isilje samo jekh nav. Ki amari čhib oljeso nav phenelape Jehova. Ama disave manuša phenena Jahve. Ki svako čhib odova nav vačeripe averčhane. Čitinen Psalam 83:18.
E Devljeso nav ki Biblija ko but thana hine ikaldo ja promimo titulenca Gospod ja Devel. Ked pisijape i Biblija e Devljeso nav hine pisimo koro 7 000 puča. Dži sikadža e manušen ando Devel, o Isus vačerdža oljendže e Devljeso nav. Čitinen Jovan 17:26.
Dikh o kratko film Da li Bog ima ime?
4. Da lji o Devel akhari gajlja amendar?
O Devel tano sar jekh dad kova akhari gajlja amendar ked tano amendže pharo
Da lji odova so isi odoborkha muke, mothovi so o Devel na akhari gajlja amendar? Disave manuša mislinena so o Devel mučinimen adžahar so mukela te ovelmen pharipe, ama odova nane čače. Čitinen Jakoveso 1:13.
Amen isimen bari čast so o Devel dijamen slobodno volja. Da lji hijam zahvalna e Devljese so šaj kokri te birina te služina oljese? (Ješua 24:15). Ama but manuša birinena te čeren lošna buča averendže, a odova anela dži ko pobare muke. E Jehova but dukhala ked dikhela odoborkha bari nepravda. Čitinen 1. Mojsieso 6:5, 6.
O Jehova tano Devel kova akhari gajlja amendar. Ov mangela te ovelmen bahtalo dživdipe. Pana hari ov ka čhinavi o dukha hem ka cidel okoljen kola čerena averendže muke. Dži na ovela odova ov isilje razlog sose pana na cidela o muke. Ki 8. lekcija ka sikljova sose tano odova adžahar. Čitinen 2. Petareso 2:9; 3:7, 13.
5. Sar šaj te ova paše e Devljeja?
O Jehova vičinimen te ova paše oljeja adžahar so ka moljinamen oljese. Ov akhari gajlja ando svako manuš (Psalam 65:2; 145:18). Ov tano spremno te oprostini. O Devel dikhela kobor daja sa amendar te šunalje, iako disavo puti nane lokho. Odova značini, iako hijam nesavršena amen čače šaj te ova paše e Devljeja. Čitinen Psalam 103:12-14 hem Jakoveso 4:8.
Odoljese so o Jehova dijamen dživdipe, amen valjani te mangalje pobuter nego bilo kas avere (Marko 12:30). To mangipe premalo Devel ka mothove ako sikljoveja oljestar hem ako čereja odova so ov rodela. Tegani tu ka ove paše oljeja. Čitinen 1. Timotejese 2:4 hem 1. Jovaneso 5:3.
