O Isus phenđa: „Ka uštel o narodo upro narodo hem o kraljevstvo upro kraljevstvo. Ka oven bare zemljotresija, zarazna nabormipa hem bokhalipa ko razna thana“ (Luka 21:10, 11). Sar so o linije ćerena otisak ando naj kova odgovorini samo jekhe manušese, ađahar sa akala događaja mothovena soj tano „e Devleso Kraljevstvo paše“. Da li sa akala događaja ulje ko isto vreme hem ko celo sveto? Te dikha o dokazija.

1. MARIBA

Ko 1914. berš, ulo jekh maribe kova utičinđa upro manuša ko celo sveto pobuter nego bilo kova aver maribe. But putija, o istoričarija phenena so e manušengi istorija meninđa pe ked ko 1914. berš počminđa o Prvo svetsko rat. Ko odova maribe prvo puti koristinđe pe tenkija, bombarderija, mitraljezija, bojna otrovija hem aver oružje. Palo odova, ulo o Dujto svetsko rat kuri prvo puti koristinđa pe o atomsko oružje. Ando 1914. berš isi mariba ko but thana hem ko odola mariba milionija manuša našalena po životi.

2. ZEMLJOTRESIJA

Premali jekh enciklopedija svako berš ovena prekalo 100 bare zemljotresija kola ćerena but ozbiljno šteta (Britannica Academic). Isto ađahar, o Geološko zavod ki Amerika phenela: „Premalo podatkija kola već beršencar ćedena pe (otprilike ando 1900. berš) svako berš očekujinaja oko 16 bare zemljotresija.“ Disave mislinena so avdije nane pobuter zemljotresija nego angleder, već isi pošukar tehnologija koja zabeležini o zemljotresija. Ama, i činjenica tani so o bare zemljotresija ko sveto ćerena but bari šteta hem so sebepi olengo but manuša merena.

3. BOKHALIPE

O bokhalipe ko sveto ovela sebepi o mariba, korupcija, ekonomska problemija hem sebepi so na planirini pe so ka ćerel pe ko lošna vremenska uslovija. Ko izveštaj ando Svetsko program asi hrana ko 2018. berš hine pisimo so „ko celo sveto, 821 milionija manuša nane len so te han, a 124 milionija manuša merena bokhatar“. Sebepi odova, svako berš prekalo 3,1 milionija ćhavore merena sose nane len dovoljno so te han. Ko 2011. berš oko 45 posto ćhave mulje sebepi odova.

4. ZARAZNA NABORMIPA

Ki jekh publikacija andi Svetsko zdravstveno organizacija pisini: „Ko palune 20 berš hine disave bare nabormipa. O nabormipa kola angleder hine sar soj tane i kolera, i kuga hem i žuto groznica palem irinđe pe, a disave sar soj tane o virus SARS, MERS, ebola hem zika akana sigate pojavinđe pe“. O COVID-19 tano najnevo zarazno nabormipe. Iako o naučnikija hem o doktorija sikljilje but ando akala nabormipa, on pana našti te arakhen iljači aso akala nabormipa.

5. PROPOVEDINI PE KO CELO SVETO

O Isus phenđa so angleder te avel e Devleso Kraljevstvo ka ovel hem diso šukar: „Akija šukar vest ando Kraljevstvo ka propovedini pe ko celo sveto sar svedočanstvo sa e narodonđe, hem tegani ka avel o kraj“ (Matej 24:14). Iako akana ko sveto isi bare problemija, pobuter ando ofto milionija manuša ando sa o narodija vaćerena ando Devleso Kraljevstvo ko prekalo 240 phuvja hem ko pobuter ando 1 000 ćhibja. Akava na hine niked angleder.

Sa o događaja kola tane deo ando znak kova o Isus dinđa ovena avdije. Ama, so sa odova značini amenđe? O Isus phenđa: „Ked ka dikhen so sa odova ovela, đanen so e Devleso Kraljevstvo tano paše“ (Luka 21:31).

O događaja kola o Isus prorekninđa hem avera biblijake proročanstvija, pomožinena amen te haljova so o Devel uspostavinđa po Kraljevstvo ko nebo ko 1914. berš. a Tegani, ov ćhivđa pe Ćhave, e Isuse Hriste, te ovel Kralj ko odova Kraljevstvo (Psalam 2:2, 4, 6-9). Pana hari, e Devleso Kraljevstvo ka počmini te vladini upri celo phuv, ka uništini sa o manušikane vladavine hem ka ćerel i phuv te ovel raj.

Pana hari, o lafija andi molitva koja o Isus sikavđa e manušen ka ispuninen pe: „Nek avel to Kraljevstvo. Nek ovel ti volja, sar ko nebo, ađahar hem ki phuv“ (Matej 6:10). Ama, so odova Kraljevstvo ćerđa sar počminđa te vladini? Hem sar ka izgledini amaro životi ked odova Kraljevstvo ka vladini upro manuša?