Ko okova članko, dikhljam disave događaja kola o Isus prorekninđa. Odola događaja tane jasno dokaz so e Devleso Kraljevstvo vladini ko nebo hem so o Isus Hrist tano Kralj ko odova Kraljevstvo.

I Biblija phenela so ked o Isus ulo Kralj, ov fordinđa e Satana hem olese demonen ando nebo. Odova značini so on šaj te utičinen upri phuv. Odolese, ando 1914. berš i situacija ki phuv tani sa pološno (Otkrivenje 12:7, 9).

Iako i situacija ki phuv tani sa pološno, o Isus sar Kralj ando Devleso Kraljevstvo ćerela but buća te pomožini e manušenđe ki celo phuv. Sebepi so propovedini pe ki celo phuv, o manuša šaj te sikljon andi Biblija hem te primeninen olake savetija ko po životi (Isaija 2:2-4). But manuša sikljilje sar te ovel len bahtali familija hem so i buti na valjani te ovel olenđe najvažno ko životi. Isto ađahar, on haljilje so na valjani te trošinen sa po vreme hem pi snaga ko odova te ovel len so pobuter materijalna buća. On sikljona sar šaj već akana te ovel len pošukar životi hem sar šaj te oven manuša save o Devel mangela te oven ko oleso Kraljevstvo.

Iako o Isus već vladini ko nebo, o manuša pana vladinena ki phuv. Ama, o Devel phenđa e Isusese: „Đa maškaro te dušmanija hem pobedin len“ (Psalam 110:2). Pana hari, o Isus ka uništini pe dušmanen hem ka olakšini sarinenđe kola šunena e Devle.

Tegani, e Devleso Kraljevstvo:

• Ka uništini sa o hovavne religije. On sikavđe o hovajba ando Devel hem ćerđe e manušengo životi te ovel but pharo. Ama, pana hari ka oven uništime. Ki Biblija ando hovavne religije vaćeri pe sar andi jekh bludnica. But manuša ka oven iznenadime ked i hovavni religija ka ovel uništimi (Otkrivenje 17:15, 16).

• Ka cidel sa o manušikane vlastija. E Devleso Kraljevstvo ka uništini sa o manušikane vlastija (Otkrivenje 19:15, 17, 18).

• Ka cidel sa e lošno manušen. So ka ovel okolencar kola na šunena e Devle hem kola ćerena lošnipe? Ki Biblija pisini: „O lošna ka oven uništime“ (Poslovice 2:22).

• Ka cidel e Satana hem e demonen. On više na ka šaj te utičinen upro manuša (Otkrivenje 20:3, 10).

So odova ka značini e manušenđe kola podržinena e Devleso Kraljevstvo?

Sar nebesko Kralj, o Isus ka ćerel but pobuter ando bilo kova manušikano vladari. Olese ka pomožinen o 144 000 manuša kola tane birime te vladinen oleja (Otkrivenje 5:9, 10; 14:1, 3). Ov ka pobrinini pe te ćerel pe e Devlesi volja ki phuv. So e Devleso Kraljevstvo ka ćerel e manušenđe?

• Ka cidel o nabormipe hem o meribe. „Nijekh manuš ki phuv na ka phenel: „Nabormo hijum“ hem o meribe više na ka ovel (Isaija 33:24; Otkrivenje 21:4).

• Ka ćerel te ovel mir ki phuv. „Te ćhave ka ovel len baro mir“ hem „svako ka bešel tali pi drakh hem tali pi smokva hem niko na ka daravi len“ (Isaija 54:13; Mihej 4:4).

• Svako ka ovel le šuži buti. „Me izabranikija ka uživinen ko sa so ćerena pe vastencar. Na ka ćeren phari buti badijava“ (Isaija 65:22, 23).

• Ka rešini o ekološka problemija. „Ka radujini pe i pustinja hem i šuki phuv, ka radujini pe i phuv koja tani pusto hem ka cvetoni sar o šafran“ (Isaija 35:1).

• Ka sikavi e manušen so valjani te ćeren te živinen večno. „A te šaj te dobinen večno životi, valjani šukar te penđaren tut, e jedino ćaćutne Devle, hem okole kas bićhalđan, e Isuse Hriste“ (Jovan 17:3).

O Devel mangela te uživine ko asavko sveto (Isaija 48:18). Aver članko vaćeri odolestar so valjani već akana te ćere te šaj te živine ko Devleso Kraljevstvo.