O krštenje tano ked jekh manuš celo khuvela talo pani, a palo odova ikljola ando pani. a Odolese o Isus krstinđa pe ki jekh bari reka (Matej 3:13, 16). Isto ađahar, jekh Etiopljanin rodinđa te krstini pe ked nakhlje uzo pani (Dela apostolska 8:36-40).

So značini o krštenje?

 I Biblija phenela so o krštenje tano sar o parujbe (Rimljanima 6:4; Kološanima 2:12). Ked o manuš krstini pe, ov paruni ja aćhavi o životi kova angleder živinđa, a počmini nevo životi sar predajimo e Devleso sluga. O krštenje hem sa o korakija kola legarena amen đi odova, tane buća kola o Devel rodela te šaj te ovel amen čisto savest koja temeljini pe ki otkupno žrtva ando Isus Hrist (1. Petrova 3:21). Odolese, o Isus sikavđa pe učenikonen so valjani te krstinen pe (Matej 28:19, 20).

Da li o krštenje panjeja thovela amare grehija?

 Na. I Biblija sikavi amen so jedino e Isuseso rat čistini amen ando greh (Rimljanima 5:8, 9; 1. Jovanova 1:7). Te šaj te pomožini amen e Isusesi žrtva, valjani te mothova vera ko Isus, te ićera amen ko olese sikljoviba hem te krstina amen (Dela apostolska 2:38; 3:19).

Da li i Biblija sikavi so o bebe ja o tikne ćhave valjani te krstinen pe?

 Na. Nigde ki Biblija na vaćeri pe so o bebe ja o tikne ćhave hine krstime. Ko disave crkve o tikne ćhave krstinena pe ađahar so prskinena ja ćhorena lenđe hari pani ko šero hem dena len anav. Ki aver strana, te šaj neko te krstini pe, ov valjani te ovel dovoljno baro te šaj te haljol hem te verujini ki „šukar vest ando Devleso Kraljevstvo“ (Dela apostolska 8:12). Aso krštenje tano važno i osoba te penđari e Devleso Lafi, te ićeri pe ko odova so čitini hem te pokajini pe, a o tikne ćhave odova našti te ćeren (Dela apostolska 2:22, 38, 41).

 Premali Biblija, o Devel dikhela upro ćhave ando okola so služinena olese sar sveta ja čista, sebepi so olenge roditeljija verno služinena olese (1. Korinćanima 7:14). Ako o tikne ćhave valjani te krstinen pe, tegani o Devel niked na bi phenela so o ćhave tane sveta sebepi pe roditeljengi vera. b

Disave hovajba ando krštenje

 Hovajbe: Nane potrebno o manuš celo te khuvel talo pani, dovoljno tano te prskine le ili te ćhore pani upro leste.

 Ćaćipe: Ked čitinaja ki Biblija ando krštenje, šaj te dikha so svako puti o manuša khuvđe cela talo pani. Na primer, ked o učenik Filip krstinđa e Etiopljanine, on khuvđe ko pani, a palo odova ikljilje ando pani (Dela apostolska 8:36-39). c

 Hovajbe: Ki Biblija vaćeri pe ando jekh manuš kotar Filipi hem mothovi so ov hem sare ando oleso ćher krstinđe pe. Odova mothovi so hem o tikne ćhave hine krstime (Dela apostolska 16:31-34).

 Ćaćipe: O izveštaj mothovi so sare kola krstinđe pe haljilje „e Jehovaso lafi“ hem so „but radujinđe pe“ sebepi odova (Dela apostolska 16:32, 34). Odova mothovi so o tikne ćhave ko oleso ćher na hine krstime, sose naštine te haljon e Devleso Lafi.

 Hovajbe: O Isus sikavđa so o tikne ćhave valjani te krstinen pe sose phenđa so o Kraljevstvo pripadini e tikne ćhavenđe (Matej 19:13-15; Marko 10:13-16).

 Ćaćipe: Ked o Isus phenđa odola lafija, ov na vaćerđa ando krštenje. Ov manglja te phenel so ako neko mangela te ovel ko e Devleso Kraljevstvo, valjani te ovel ponizno sar o ćhavoro (Matej 18:4; Luka 18:16, 17).