Na, na pomožinena amen sa o religije te ova paše e Devleja. Ki Biblija isi but primerija kola mothovena so o Devel na prihvatini sa o religije. Sa o religije šaj te podelina ko duj grupe.

O religije kola poštujinena e hovavne devlen

 I Biblija mothovi soj tano bezvredno hem so nane korisno te služina e hovavne devlenđe (Jeremija 10:3-5; 16:19, 20). Jekh ando zapovestija kola o Jehova a dinđa e Izraelcenđe hine: „Ma te ovel tut avera devela, osim mande“ (Izlazak 20:3, 23; 23:24). Ked o Izraelcija služinđe avere devlenđe o Jehova „hine but holjamo“ (Brojevi 25:3; Levitska 20:2; Sudije 2:13, 14).

 O Devel hem avdije ađahar dikhela upro hovavne devela (1. Korinćanima 8:5, 6; Galatima 4:8). Okolenđe kola mangena te služinen olese, o Devel phenela: „Ikljoven odothar hem odvojinen tumen olendar“ (2. Korinćanima 6:14-17). Ako tane sa o religije šukar hem ako pomožinena amen te ova paše e Devleja, tegani sose bi o Devel odova phenela amenđe?

O religije kola lađaćerena e Devle

 Ko purano vreme, o Izraelcija dikhlje sar o avera narodija služinđe e hovavne devlenđe. But putija, on manglje te služinen hem e hovavne devlenđe hem e Jehovase. Ama, o Jehova na prihvatinđa odova (Izlazak 32:8; Ponovljeni zakoni 12:2-4). Ko Isuseso vreme, o religiozna vođe samo ćerđe pe so služinena e Devlese, ama olenge delija mothovđe soj tane dur olestar. O Isus osudinđa len sebepi odova hem phenđa lenđe: „Na mothovđen odova soj tano premalo Zakon považno: i pravda, o milosrđe hem i vernost“ (Matej 23:23).

 O pravo ćaćipe šaj te arakha samo ko Devleso Lafi. Samo i religija kase sikljoviba avena ando Devleso Lafi, šaj te pomožini e manušenđe te oven paše e Devleja (Jovan 4:24; 17:17; 2. Timoteju 3:16, 17). O religije kase sikljoviba na avena kotar Devleso Lafi, durjaćerena e manušen ando Devel. But manuša mislinena so o sikljoviba ando Trojstvo, andi duša koja na merela hem ando pakao avena andi Biblija. Ama, on avena ando religije kolen o Devel na prihvatini. Anglo Devlese jaćha asavke religije nane len nisavi vrednost sose e Devlese zapovestija menjinđe aso manušikane običaja (Marko 7:7, 8).

 E Devlese tane odvratna o manuša kola samo ćerena pe so služinena olese (Titu 1:16). Te šaj o manuša te oven paše e Devleja, i religija valjani te utičini ko olengo životi, a na samo te sikavi len te ićeren pe ko disave običaja. I Biblija phenela: „Ako neko mislini so služini e Devlese, a na kontrolišini pi ćhib, ov hovavi po vilo hem odova so ćerela e Devlese na vredini nisose. Te služina amare Devlese hem Dadese ko način kova ov mislini soj tano čisto hem kova nane melalo značini akava: te brinine tut aso ćhave bizo roditeljija hem aso udovice ki olengi nevolja hem te arakhe tut ando melalipe kotar akava sveto“ (Jakovljeva 1:26, 27, fusnote). Ko prevod andi Biblija King James koristinena pe o lafija i religija koja tani čisto sose vaćeri pe ando odova so valjani te služini pe e Devlese ađahar sar so ov mangela.