О Водечко тело тано тикни група зрела христијања кола со дена упатствија е Јеховаскере сведоконге ко цело свето. Иси ле дуј задаче:

•   Ов надглединела о спремибе е публикациенгоро, е состаноконгоро хем е разна школенгоро кола со темелинена пе ки Библија (Лука 12:42).

•   Грижинела пе башо меѓународно дело е Јеховаскере сведоконгоро аѓаар со организиринела и служба проповедибаске хем надглединела сар користинена пе о доброволна прилогија.

 О Водечко тело џала пало пример е апостоленгоро хем е старешиненгоро таро прво веко ко Ерусалим. Ола анена сине важна одлуке со користинена сине цело собраниеске (Дела 15:2). Исто сар адала верна мурша, о членија таро Водечко тело нане водачија амаре организацијакере. Ола родена водство ки Библија, џандор кај о Јехова чхивѓа е Исусе те овел поглавари е собраниескоро (1. Коринќаните 11:3; Ефешаните 5:23).

 О членија ко Водечко тело тане: Гејџ Флигл, Герит Леш, Дејвид Сплејн, Кенет Кук, Марк Сандерсон, Семјуел Херд, Стивен Лет, Џефри Виндер хем Џефри Џексон. Ола служинена ко главно седиште ко Ворвик (Њујорк, САД).

 О Водечко тело керѓа шов одборија кола со надглединена различна активностија, хем секова члени таро Водечко тело служинела ко јекх или повише одборија.

•   Одбор е координаторенгоро: Надглединела правна пучиба хем поможинела кеда иси природна катастрофе. Исто аѓаар, реагиринела кеда е Јеховаскере сведокија тане прогониме баши пли вера хем кеда иси јавера итна случаија со влијајнена упро е Јеховаскере сведокија.

•   Одбор башо персонал: Надглединела о активностија сој поврзиме е бетелска слугенцар.

•   Одбор со надглединела о печатибе: Надглединела о печатибе хем о ингарибе библиско литература. Грижинела пе хем башо градибе објектија сар сој амаре дворане, о преведувачка канцеларие хем о подружнице.

•   Одбор службаке: Надглединела о проповедибе о „шукар хабери башо е Девлескоро Царство“ (Матеј 24:14).

•   Одбор сикајбаске: Тано одговорно башо духовна поуке со добинаја лен преку о состанокија, о школе хем о аудио хем видео материјалија.

•   Одбор пишибаске: Надглединела о спремибе духовна поуке со добинаја лен ко печатимо облик хем ки амари интернет-страница. Исто аѓаар, надглединела о преведибе акале материјалескоро ко цело свето.

 Освен со служинена ко акала одборија, о членија таро Водечко тело кхедена пе секова курко те шај те керен лафи башо потребе е организацијакере. Ко акала состанокија, ола керена лафи башо адава со вакерела и Библија баши несави бути, мукхена о свети дух те водинел лен хем секогаш трудинена пе те анен одлука колаја со сарине согласинена пе (Дела 15:25).

 Ола тане одговорна христијања кола со поможинена ко одборија таро Водечко тело (1. Коринќаните 4:2). Иси лен искуство ко буќа кола со надглединела о одбор колесте со служинена. Секова курко тане присутна ко состанокија со икерела ленгоро одбор. Иако ола на анена о одлуке, дена корисна советија хем информацие, керена адава со сине одлучимо хем редовно проверинена о резултатија таро адала одлуке. О Водечко тело исто аѓаар понекогаш дела лен задача те посетинен е пхрален хем пхењен ко различна тхана таро свето или те икерен говорија ко настанија сар сој о годишна состанокија или ко дипломирибе ко Гилеад.