Оја, соске о Девел мангела о мануша те кхеден пе те шај те обожавинен ле. И Библија вакерела: „Те размислина јекх јекхеске те шај те поттикнина амен те сикава мангипе хем те кера шукарипе, хем ма те мукха амаре состанокија“ (Евреите 10:24, 25).

 О Исус вакерѓа кај лескере ученикија ка овен дело тари јекх организирими група кеда вакерѓа: „Таро адава сарине ка џанен кај сиен мле ученикија, ако иси тумен мангипе машкар туменде“ (Јован 13:35). Те шај те сикавен кај мангена пе јекх јекхеа, е Христосескере ученикија ваљани сине заедно те кхеден пе. Исто аѓаар, ваљани сине те овен дело таро собранија хем редовно те кхеден пе те шај те обожавинен е Девле (1. Коринќаните 16:19). Са о собранија ваљани сине те овен заедно сар јекх фамилија сој ко цело свето (1. Петрово 2:17).

Нане доволно те ова само дело тари несави религија

 Ки Библија пишинела кај ваљани заедно те кхеда амен те обожавина е Девле, ама адава на значинела кај о Девел ка овел задоволно аменцар ако сием само дело тари несави религија. Е Девлеске тано важно и религија те влијајнел ко амаро секојдневно живото. На пример, ки Библија пишинела: „И религија која тани чисто хем свето англо амаро Девел хем Дад тани акаја: те грижине тут е чхавенге сој бизо родителија хем е удовиценге ко ленгере неволје хем те аракхе тут таро мелалипе акале светоскоро“ (Јаков 1:27, фуснота).