LESON 7
Kosa i lé le roiyom Bondieu ?
1. Kosa i lé le roiyom Bondieu ?
Pou kosa Jézu lé vréman le Roi ki fo ? (MARK 1:40-42).
Le roiyom Bondieu lé in gouvèrnman ke lé dann sièl. Li sar prann la plas tout bann gouvèrnman. Li va fé an sort ke la volonté Bondieu i réaliz dann sièl é su la tèr. Sa lé vréman in gayar nouvèl ! Bann domoun la bezoin in bon gouvèrnman pou dirij a zot, é le roiyom Bondieu va aport a zot sak zot la bezoin. Gras se roiyom la, tout bann domoun su la tèr va viv ansanm dann lunité (Lir Danièl 2:44 ; Matieu 6:9, 10 ; 24:14).
Tout bann roiyom lé dirijé par in roi. Jéova la choizi son Garson Jézu Kris, pou èt Roi dan son roiyom (Lir Révélasion 11:15).
Regard le vidéo Kosa i lé le Roiyom Bondieu ?
2. Pou kosa Jézu lé vréman le Roi ki fo ?
Le Garson Bondieu lé vréman le Roi ki fo, parske li lé bon é ke li lut toultan pou le bien (Matieu 11:28-30). An plus, sé depui dann sièl ke li va dirij bann zafèr su la tèr. Sa i ve dir ke li lé asé puisan pou èd bann zumin. Apré son rézuréksion, li la artourn dann sièl é li la asiz « a la droit Bondieu » é la, li la atann juska tank li devien Roi (Ébreu 10:12, 13). Plu tar, Bondieu la fé a li Roi dan son roiyom (Lir Danièl 7:13, 14).
3. Kisa va rénié avèk Jézu ?
Néna in group ke i apèl « bann sin » va rénié avèk Jézu dann sièl (Danièl 7:18). Bann premié sin ke la été choizi, sé bann zapot Jézu ke lé résté fidèl. Jéova la kontinué choizi bann zom é bann fam fidèl, é sa, juska ojourdui. Kom Jézu, zot lé résusité avèk in kor parèy sak bann zanj (Lir Jan 14:1-3 ; 1 Korintien 15:44).
Tou kont fé, konbien d’pèrsonn va viv dann sièl ? Jézu la di ke zot i sré inn « ti troupo » (Luk 12:32). Zot i sra 144 000 an tou, é zot va dirij la tèr avèk Jézu (Lir Révélasion 14:1).
4. Kosa la éspasé kan Jézu lé devnu Roi ?
Sé an 1914 * ke la mèt an plas le roiyom Bondieu. Kan li lé devnu Roi, kosa Jézu la fé en premié ? Li la jèt Satan é son bann démon su la tèr. Satan lété tèlman anrajé, alor li la provok in paké déga su tout la tèr (Révélasion 12:7-10, 12). Depui sa, bann maleur la ogmanté ankor plus pou bann zumin. Néna bann gèr, bann faminn, bann maladi, é bann tranbleman d’tèr. Tousa i fé parti in « sign » ki prouv ke le Roiyom va pa tardé pou dirij tout bann zafèr su la tèr (Lir Luk 21:7, 10, 11, 31).
5. Kosa le roiyom Bondieu i fé ojourdui ?
Par le moiyin la prédikasion, le roiyom Bondieu lé antrèn uni in gran kantité d’moun dan tout bann péi. Bann domoun par milion, ki pran pa zot su la oteur, i pran parti pou le roiyom ke lé dirijé par Jézu. Le roiyom Bondieu va protèj a zot kan li va détrui le monn ke i égzis koméla. Donk, sak i ve profit bann bienfé ke se roiyom i aport, i doi choizi Jézu kom Roi é obéi a li (Lir Révélasion 7:9, 14, 16, 17).
Pandan in pèryod ke va dur 1 000 an, le Roiyom va fé sak Bondieu lavé prévu dann premié débu pou bann zumin. Alor, la tèr an antié va devnir in paradi. Pou fini, Jézu va redonn le Roiyom son Papa (1 Korintien 15:24-26). Avèk kisa ou la anvi d’partaj sak ou la aprann su le roiyom Bondieu ? (Lir Psom 37:10, 11, 29).
^ § 6 In profési la Bib lavé anonsé ke noré mèt an plas le roiyom Bondieu an 1914. Pou konèt plus la d’su, regard le liv Kosa la Bib i ansègn a nou ?, paj 217-220.
