Sé Jéova le Bondieu ereu, ki donn a nou bann gayar nouvèl. Li ve ke bann fami i viv ereu (1 Timoté 1:11). Sé li ke la mèt an plas le maryaj. Pou konèt in vi d’fami ereu, lé vréman inportan èt maryé devan la loi : sé komsa ke bann domoun maryé é zot zanfan, i san a zot an konfians. Bann krétien i doi réspèkt bann loi ke néna dan zot péi konsèrnan la fason anrejis zot bann maryaj (Lir Luk 2:1, 4, 5).

Koman Bondieu i konsidèr le maryaj ? Pou li, in maryaj i uni ansanm in mesieu é in madam, é sa i doi dur pou tout la vi. Jéova i ve ke in mari é son madam, i rès fidèl inn é lot (Ébreu 13:4). Li détès le divors (Malaki 2:16). Mé li pèrmèt ke in krétien i divors é i remaryé, seulman si inn la tronp lot (Lir Matieu 19:3-6, 9).

Le mari é le madam néna chakèn son par pou fé dan le maryaj, é chakèn i doi antrèd a zot. Sé sak Jéova té i ve kan li la kréé lom é la fam (Jenèz 2:18). Kom le mari lé le chèf la fami, li néna bann résponsabilité. Li doi donn son madam èk son bann zanfan sak i fo a zot pou viv. Li doi fé konèt a zot kisa i lé Bondieu é ansègn a zot. Li doi osi èm son madam é èt pré pou fé pas son bann zintéré an premié. In mari é son madam, i doi èm a zot é réspèkt a zot inn é lot. Kom tout bann mari é tout bann madam i komèt bann fot, zot i doi aprann pardonn inn é lot. Sé in klé, pou rann in maryaj ereu (Lir Éfézien 4:31, 32 ; 5:22-25, 33 ; 1 Pièr 3:7).

Si zot néna problèm dan zot ménaj, i fo ke zot deu ansanm, zot i fé bann gro zéfor pou mont ke zot i ièm a zot inn é lot (1 Korintien 13:4, 5). La Parol Bondieu i konsèy pa bann domoun maryé sépar a zot, pou règ bann problèm ke i ariv souvandéfoi dan zot ménaj (Lir 1 Korintien 7:10-13).

Jéova i ve ke ou lé ereu. Li donn a ou bann méyeur konsèy, pou ke ou viv bien out jenès. Li ve ke ou ékout out bann paran, parske banna lé plu saj é i koné mieu la vi ke ou (Kolosien 3:20). Li ve osi ke ou pran plézir fé bann zafèr pou Li, out Kréateur, é pou son Garson (Lir Éklézias 11:9–12:1 ; Matieu 19:13-15 ; 21:15, 16).

Ou doi travay dur pou donn out bann zanfan manjé, in kaz pou abité é bann linj pou mèt (1 Timoté 5:8). Mé, pou ke out bann marmay lé ereu, i fo ke ou aprann a zot èm Bondieu. Ou doi osi amont a zot ke lé inportan lès Bondieu ansègn a zot (Éfézien 6:4). Si dan out fason d’viv, ou mont ke ou ièm Bondieu, sa i pe avoir in bon linfluans su zot. É si ou utiliz la Bib pou éduk out bann marmay, sa va pous a zot avoir in bon fason d’pansé (Lir Detéronom 6:4-7 ; Provèrb 22:6).

Kan nou ankouraj é nou félisit bann marmay, sa i fé a zot du bien. I fo dir ke bann marmay, la bezoin osi èt korijé é avoir in lédukasion ki redrès a zot. Lédukasion ke banna va ganié, va protèj a zot : sa va évit a zot fé bann zafèr ki pouré rann a zot malereu (Provèrb 22:15). Mé kan nou korij nout bann marmay, i fo jamé fé sa avèk in keur dur é èt brutal (Lir Kolosien 3:21).

Bann Témoin Jéova la fé kantité d’liv pou èd bann paran èk bann zanfan. Tout sak nou trouv dan bann liv la, i sort dan la Bib (Lir Psom 19:7, 11).