LESON 2
Kisa i lé le vré Bondieu ?
1. Pou kosa nou devré ador Bondieu ?
Sé Bondieu li mèm ke la kré tout zafèr. Li na poin de komansman, é li va égzisté pou toultan (Psom 90:2). Sé Bondieu ki donn bann gayar nouvèl ke nou trouv dan la Bib (1 Timoté 1:11). É sé Bondieu li mèm, ke la donn a nou la vi. Donk, nou devré ador rienk li touseul (Lir Révélasion 4:11).
2. Dapré la Bib, koman Bondieu i lé ?
La poin pèrsonn la déja vu Bondieu, parske li lé in léspri (bann zéspri lé plu for ke bann zumin ; zot na poin in kor parèy ke nou é zot i viv pa su la tèr non plu) (Jan 1:18 ; 4:24). Malgrésa, nou pe dékouv kan mèm kèl karaktèr Bondieu néna kan nou regard bann zafèr ke li la kréé. Par égzanp, kan nou regard tout bann kalité frui èk fleur ke néna su la tèr, nou aprann ke li ièm a nou in bonpe é ke li na in gran sajès. Lunivèr, tèlman lé gran, i aprann a nou a kèl poin li lé puisan (Lir Romin 1:20).
Nou pe aprann ankor dot zafèr su Bondieu kan nou lir la Bib. Par égzanp, li ésplik a nou kosa li ièm, é kosa li ièm pa, koman li aji avèk bann zumin, é kèl réaksion li lavé dann diféran situasion (Lir Psom 103:7-10).
3. Èske Bondieu néna in non ?
Jézu la di : « Nout Papa ke lé dann sièl ke out non lé sanktifié » (Matieu 6:9). Nou pe apèl Bondieu Toupuisan, Kréateur, ou dot fason ankor, mé li néna rienk in seul non. Chak lang néna son manièr pou pronons le non Bondieu. Isi la Rénion, nou di pluto « Jéova ». Mé désèrtin i di « Yavé » (Lir Psom 83:18).
Dan in bonpe Bib, domoun la tir le non Bondieu é la ranplas a li par Sénieur, Létèrnèl oubien Bondieu. Pourtan, kan la Bib la été ékri, té i trouv le non Bondieu apepré 7 000 foi dedan. Jézu la fé konèt se non la avèk bann domoun, kan li la ansègn a zot bann zafèr su Bondieu (Lir Jan 17:26).
Regard le vidéo Èske Bondieu néna in non ?
4. Èske Jéova i fé in kont èk nou ?
Kom se papa ki ièm son zanfan, Bondieu i ve sak lé bien pou nou, é sa, pou toultan.
Partou dan le monn néna in bonpe la soufrans. Èske sa i ve dir ke Jéova i fé pa in kont èk nou ? Désèrtin i di mèm, ke li fé souf a nou parske li ve tèst a nou, mé sa lé pa vré dutou (Lir Jak 1:13).
Bondieu la montré son léstim pou bann zumin, kan li la donn a zot la libèrté pou fé bann choi. Surman, nou lé vréman kontan ke nou néna in libèrté komsa. Nou pe désid par nou mèm sèrv Bondieu ! (Jozué 24:15). Lé bien malereu, mé néna in bonpe domoun i choizi fé le mal otour d’zot. Sé pousa ke néna in paké la soufrans komsa. É le keur Jéova i fé mal, kan li voi tousa linjustis la (Lir Jenèz 6:5, 6).
Jéova i fé in kont avèk nou. Li ve ke nou viv ereu. I tard pa, li va fé disparèt bann soufrans mé osi tout sad lé dèryèr tousa. Pou linstan, li pèrmèt bann zafèr komsa parske li na in bon rézon. Nou va voir pou kèl rézon dann leson 8 (Lir 2 Pièr 2:9 ; 3:7, 13).
5. Koman raproch a nou koté Bondieu ?
Jéova i ankouraj a nou aproch koté li, é pousa nou doi koz avèk li dan la priyèr. Li fé in kont avèk chakèn d’nou (Psom 65:2 ; 145:18). Li lé pré pou pardonn a nou. Li voi koman nou fé bann zéfor pou fé a li plézir, mèm si nou gingn pa kontant a li toultan. An vré, mèm si nou lé pa parfé, nou pe èt bann kamarad Bondieu (Lir Psom 103:12-14 ; Jak 4:8).
Jéova la donn a nou la vi. Donk, nou devré èm a li plus ke ninport kisa (Mark 12:30). Koman ou mont ke ou ièm Bondieu ? Ou mont out lamour pou li, kan ou aprann konèt a li é kan ou fé sak li demann. Si ou fé sa, ou va raproch a ou ankor plus koté li (Lir 1 Timoté 2:4 ; 1 Jan 5:3).
