Cadsarashca huashaga shuc mushuc aillumi callarin. Camba yayagunata llaquisha balichishahuas, cadsarashca huasha ishcandi mas llaquinacuna manguichi. Imasaibiga maican ailluguna cadsarashca acta mana intindinaunzhu. Bibliamanda cunaigunami ailluhuan sallata cari, huarmi ali apanacusha cungailla causangahua yanapanga.

BIBLIAGA NINMI: “Camba yayatas mamatas balichisha uyana manguichi” (Efesios 6:​2). Can rucu ashahuas, camba yayagunata balichinata ama saquichu. Yayagunata ricuna man. Camba cari, camba huarmi paiba yayagunahuan alita apanacucpiga ama yanga piñaringuichu (1 Corintios 13:4; Gálatas 5:​26).

CAITA RAI:

• Ama yangalla nichu: “Camba aillu yapa piñahuan”, “Camba mamaga tucui uras rimahuan” nisha

• Camba carita, huarmita ama piñaichu

BIBLIAGA NINMI: “Shuc cari paihua yayatas mamatas saquisha, paihua huarmihuan llutarisha paiguna ishcai chican ashallata shuc aicha cuintalla tucungauna” (Efesios 5:31). Can ña cadsarashca acpihuas, maican yayaguna satirina munangauna.

Chasna acpihuas ishcandimi, yayaguna ama yapa satirinauchun nisha llaquihuan rimangahua cuintanacuna anguichi. Cuscata mana piñasha rimaichu (Colosenses 4:​6). Mansu shunguhuan, mana piñarisha, ahuantasha “pariumanda llaquishcahuan yanapanacusha causana anguichi” (Efesios 4:​2).

CAITA RAI:

• Yayaguna camba causaibi yapa satiricpiga, ishcandi cungailla aushcai cuintanacuichi

• Pariulla imasa alichinata cuintanacuichi