Cai quillcaibi yachashca shinaga Bibliaibi ashca cunaiguna tian canda, camba aillutas yanapangahua. Jehovaga cushi causanauchun munan. Pai munashca shina causacpiga “canguna munashcatas cui tucunguichimi” (Mateo 6:33). Yaya Diosca camba amigo tucunata munan. Chasna acpiga Diosmanda ama caruyasha, paima mas caillayangahua imatas rai (Mateo 22:​37, 38).

BIBLIAGA NINMI: “Canguna Yaya tucushami, cangunaga ñuca huahuaguna tucunguichimi” (2 Corintios 6:​18). Diosca camba ali amigo tucunata munan, paita mañashaga mas caillayangui. Jehova ninmi paita mañanata ama saquichichu nisha (1 Tesalonicenses 5:​17). Paiga ñucanchi ima yuyashcata, llaquigunatas cuintachun munan (Filipenses 4:​6). Ailluhuan Diosta mañacpiga paigunaga Dios cambaraicu sirtu ashcata quiringauna.

Diosta mañashahuas, paita uyana mangui. Paita uyangahua Bibliata, Bibliamanda quillcagunatas leingui (Hechos 17:11). Imata yachashcata yuyai (1 Timoteo 4:​15). Chasnallata Diosmanda yachangahua tandarinama rina mangui (Hebreos 10:​24, 25).

Shuc runagunata Jehovamanda cuintasha mas quiringui. Chasna rashami Diosma mas caillayangui (Mateo 28:​19, 20).

CAITA RAI:

• Diosta mañangahua, Bibliata leingahua caran punzha lugaryai

• Jehovata sirvinata mas balichingahua camba ailluta yanapai

BIBLIAGA NINMI: “Yaya Diospagma caillayaichi. Paihuagma caillayacpi pai cangunahuagma caillayangami” (Santiago 4:​8). Camba ailluhuan Jehovamanda yachangahua, ima punzha ima ura tandarinata anllai (Efesios 6:4). Mana chilla chan: caran punzha Diosta yarisha camba ailluta yanapai, paiguna mas Diosta quirinauchun. Canga “camba huasibi tiausha, ñambita puriusha, puñungahua siririusha, atariushahuas” Jehovamanda camba ailluta cuintana mangui (Deuteronomio 6:​6, 7). Cambas Josue nishca shina rai. Pai nira: “Ñuca, ñuca ailluhuas Jehovatami sirvishun” (Josue 24:15).

CAITA RAI:

• Camba aillu ima minishtishcata ricusha yachachingui