¿IMA PELIGROPITA CARCA? Ashtaca politicocuna, curacuna, pastorcunaca Bibliapi yuyaicunataca na catircachu. Ashtacacunaca paicunapa autoridadta aprovechashpami gentecuna Bibliata charichun, rurachun o traducichunga na saquin carca. Ishcai ejemplocunata ricupashun:

• Jesús shamungapaj 167 huatacunata faltajuj punllacunapica rey Antíoco Epífanesca, griegocunapa religionda judiocuna munai na munai catichun munashpami Escrituras Hebreas escribishcacunata tucuchichun mandarca. Heinrich Graetz historiador runaca nircami: “Moisesman cushca Leyta charij rollocunataca maipi tarishcapimi liquishpa rupachishpa saquin carca. Animaringapaj, cushilla sintiringapaj Bibliata liijcunatapash huañuchishpami saquin carca” nishpa.

• Casi 800 huatacuna huashamanga, huaquin gentecunaca iglesiacunapi yachachishcacunataca na yachachishpami Bibliapi yuyaicunata yachachi callarirca. Chaimandami religiongunapi huaquin ñaupaman pushajcunaca paicunapa iglesiacunapi yachachishcataca na sirvichinajunllu nishpa ninanda culirarca. Bibliapi yuyaicunata yachachij gentecunaca latín shimipi Salmo librotallami chari usharca. Bibliapa shuj librocunata charijpica paicunahuanga ninanda fiñarin carca. Ashtahuangarin curacunalla tandanajushpami dicidirca, cada parroquiapi huaquin gentecunata agllanata. Chai gentecunami Bibliapi yuyaicunata yachachijcunataca paicunapa parroquiacunapi tucui huasicunaman, alpa ucupi pacajuna ucucunamanbash yaicushpa catiriashpa mascana carca. Maijan huasipi paicunata tarishpaca chai huasitapash tucuchishpami saquina carca.

Bibliata na ricunayachij gentecuna Bibliata tucuchijpica Bibliapi yuyaicunaca chingarinmanmi carca.

¿IMASHINATA BIBLIACA TIASHPA CATISHCA? Rey Antíoco nishcaca Israel llactata llaquichingapami munarca. Shinapash judiocunaca shuj shuj llactacunapipashmi tandanajushca causanajurca. Huaquin estudiashca runacunaca ninmi, huata 100gunapica ashtaca ashtaca judiocunami Israel llactamanda rishpa shuj shuj llactacunapi causanajurca nishpa. Judiocuna tandanajushca huasicunapica Bibliapa escribishca copiacunami tiarca. Chai copiacunatami jipa punllacunapi causashca gentecunapash, Jesusta punda catijcunapash utilizan carca nishpa (Hechos 15:21).

Casi 800 huatacuna huashamanga, gentecuna catiriashpa llaquichijpipash Bibliata alicachij gentecunaca Bibliata traducishpa, copiashpami catirca. Huata 1450cunapimi imprimina maquinacunaca tiai callarirca. Shinapash chai maquinacuna nara tiajpillatami Bibliaca 33 shimicunapi ña tiarca. Imprimina maquinacuna llujshijpicarin ashtahuan ashtahuan Bibliataca shuj shuj shimicunaman traducishpa imprimi callarirca.

¿IMATA TUCUSHCA? Ashtaca autoridadta charij reycuna, pandarishca curacuna Bibliata tucuchingapaj munajpipash Bibliatami ashtaca gentecunaca charin, ashtahuan traducishcapash. Bibliapi ricushpami huaquin leycunatapash churashca. Bibliami gentecuna parlashca shimicuna tiachunbash ayudashca. Bibliami ashtaca gentecunapa causaita cambiashca.