CALLARI TEMA | BIBLIACA ¿IMASHINATA CUNANGAMAN TIASHPA CATISHCA?
Tucurinalla materialcunapi escribishca cashpapash Bibliaca na tucurircachu
¿IMA PELIGROPITA CARCA? Bibliata escribijcunapash, copiajcunapash papiro nishcapi, pergamino nishcacunapimi escribirca (2 Timoteo 4:13). * Shinapash ¿imamandata Bibliaca peligropi carca?
Papiro papelca color llujshinlla, liquinrinlla huaglinllami. Egipciocunapa causaita estudiaj Richard Parkinson, Stephen Quirke runacunaca ninmi: “Tiempohuanga papiro hojacunaca ñapashmi fitirinalla puchashna tucushpa, polvoyashpa tucurin. Papiro rollota aliguta alichijpipash ñapashmi humedadhuanga ismunlla. Cutin alpa ucupi pambajpica ucuchacuna, jurucuna, ashtahuanbachaca yuraj añangucunami tucuchinlla” nishpa. Huaquin tarishca papirocunaca indi chayashcamanda o humedadmandami ñapash huaglirca.
Pergamino nishca caracunaca papiromanda ashtahuan yalitami paran. Shinapash na aliguta cuidajpi, yapa humedadpi cashpa o yapa indipi cashpaca pergaminocunapash huaglinllami, jurucunapash tucuchinlla. * Bibliapi escribishcacuna shina huaglishpa tucurijpica Bibliapi yuyaicunapash chingarinmanmi carca.
¿IMASHINATA BIBLIACA TIASHPA CATISHCA? Moisesman cushca Leypica nijurcami, Israel llactamanda reycunaca Bibliapa callari 5 librocunatami “shuj libropi mushujta escribichishpa” o copiacunata rurashpa charina can nishpa (Deuteronomio 17:18). Ashtahuangarin, ali copiacunata ruraj runacunaca alipacha copiacunatami ruran carca. Chaimandami Jesús shamushcamanda 100 huatacuna jipacamanga ashtaca copiacunataca Israel llactamanda callarishpa Macedonia caru llactacaman judiocuna tandanajushca pushtucunapi tarinalla carca (Lucas 4:16, 17; Hechos 17:11). Shinaca ¿imashinata huaquin copiacunataca cunan punllacunacaman chari ushashcanchi?
Rollos del mar Muerto nishcacunataca shuj chaquishca chaquishca alpacunapa cueva ucupimi tarirca. Chaicunaca ashtaca ashtaca huatacunatami alpa rurashca fundu ucupi alichishca cashcarca.
Mushuj Testamentomanda alipacha yachajushca Philip Comfort shuti runaca ninmi: “Judiocunaca Bibliapa escribishca rollocuna ama huaglichunmi chai rollocunataca alpa rurashca funducunapimi alichin carca” nishpa. Jesusta catijcunapash shinallatami Bibliapa escribishca copiacunataca alichin carca. Chaimandami Bibliapa escribishca copiacunataca alpa rurashca fundu ucucunapi, yana yana ucucunapi, cuevacunapi o chaquishca chaquishca pushtucunapi alichishcata tarishca.
¿IMATA TUCUSHCA? Bibliapa escribishca huaquin copiacunaca 2 mil yali huatacuna yalijpipash na tucurishcachu, cunan punllacunamanmi parashca. Bibliapa escribishca copiacunallami ashtaca ashtaca tian, ashtaca ashtaca huatacunatapash parashca.
^ par. 3 Papiropi escribingapaca yacu ucupi tiaj papiro nishca plantatami papelta ruran carca. Cutin, pergaminopi escribingapaca animalcunapa caracunata chaquichishpami pergamino nishca caracunata ruran carca.
^ par. 5 Shuj ejemplota ricupashun, Declaración de Independencia de los Estados Unidos nishca actataca pergamino nishca carapimi escribirca. Casi 250 huatacunallami yalishca. Shinapash chaipi escribishcacunaca ñapashmi huaglirca, letracunapash casi ñana ricurinllu.
