Romanos 15:1-33
-
Cristoshnallatami caishujhuan chaishujhuan cushijushpa chasquirina capanguichi (1-13)
-
Pabloca na judío gentecunaman predicangapaj agllashca sirvijmi carca (14-21)
-
Pabloca shuj shuj llactacunaman rinatami villarca (22-33)
15 Pero shinlli feta charijcunami, na shinlli feta charijcunapa pandarishcacunataca* aguantana capanchi. Y na ñucanchipa alipillachu pensarina capanchi.
2 Cada unomi shujcuna ali cachun esforzarina capanchi. Paicunapa alipallata y paicuna shinlli tucuchunmi alita rurana capanchi.
3 Porque ni Cristopash paipa alipillaca na pensarircachu. Sino Taita Dios escribichishca shimipi nijunshnami rurarca. Chaipica nijunmi: “Quiquinda rimashpaca, ñucatami rimahuanajun” nishpa.
4 Punda tiempopi Taita Dios escribichishca shimica, ñucanchita yachachingapami can. Shinami shamuj punllacunapi Taita Dios imata caranataca shuyai ushashun. Ashtahuangarin Taita Dios escribichishca shimimi, ñucanchitaca shinlli tucuchun y aguantachun ayudan.
5 Taita Diosca aguantachun, shinlli tucuchun ayudaj Taita Diosmi can. Taita Diostami ñucaca, quiquingunapash Cristo Jesushna pensachun ayudapai nishpa mañajupani.
6 Shinami, Taita Diostaca shujllashnapacha tandanajushpa alabapanguichi. Taita Diosmi ñucanchi Señor Jesucristopa Taita can.
7 Cristoca Taita Dios alabai tucuchunmi cangunataca cushijushpa chasquirca. Shinallatami cangunapash caishujhuan chaishujhuan cushijushpa chasquirina capanguichi.
8 Cangunataca ninimi, Cristoca judiocunapa sirvijmi tucurca. Paica Taita Dios siempre ciertota parlajta ricuchingapapash, shinallata punda taitacunaman Taita Dios imata prometishca cierto cashcata ricuchingapapashmi shina rurarca.
9 Shina pasashcamandami, na judío gentecunapash Taita Dios paicunata llaquishcamandaca paita alabanga. Taita Dios escribichishca shimipipash cashnami nijun: “Shuj llactamanda gentecunapa ñaupapimi candaca alabasha. Canba shutitapashmi alabashpa candasha” nishpa.
10 Shinallata nijunmi: “Shuj llactamanda gentecunaca Taita Diospa llacta gentecunahuan cushijuichi” nishpa.
11 Shinallata ninbashmi: “Tucuilla na judío gentecuna Jehová* Diosta alabapaichi. Tucui llactamanda gentecuna Taita Diosta alabapaichi” nishpa.
12 Isaiaspashmi* cashna nin: “Jesé runagupa familiamandami shuj jari ricuringa. Paimi shuj llactacunata mandanga. Shuj llacta gentecunaca paipimi confianga” nishpa.
13 Quiquingunaca Taita Diospimi confiashcanguichi. Chaimi shuyachun ayudaj Taita Dios quiquingunamanga tucui shunguhuan cushilla canata y tranquilo canatapash cuchun mañapani. Shinami Taita Diospa espíritu santopa poderhuanga, tucui shunguhuan shuyashpa catita ushapanguichi.
14 Ñuca huauquicuna, quiquinguna alicunata rurangapaj listo cashcata, aliguta yachajushcata y caishuj chaishuj consejari ushashcatapash seguromi capani.
15 Shinapash ñucata Taita Dios ninanda juyashcamandami* nimata na pacashpa quiquinguna yarichun huaquin yuyaicunata escribipashcani.
16 Na judío gentecunaman ali villaicunata predicachunmi, Taita Diosca Cristo Jesusta sirvichun ñucataca agllahuarca. Na judío gentecunata Taita Dios chasquichunmi, Taita Dios cushca obrapica ayudajupani. Paicunaca Taita Diospa espíritu santomandami ña limpio ofrendacunashna can.
17 Cristo Jesuspa discípulo caimanda y Taita Diospa obrata rurajuimandapashmi ninanda cushijushca capani.
18 Ñuca imata rurashcataca ñana parlapashachu. Sino na judío gentecuna Cristota cazuchun, ñucapa parlashcacunata y ruraicunata utilizashpa Cristo imatalla rurashcatami parlapasha.
19 Paicunaca, Taita Diospa espíritu santo rurashca shuj shuj jatun milagrocunamandapashmi cazushca. Shinami Cristomanda ali villaicunataca Jerusalenmanda callarishpa Ilírico llactacaman gulpi ladocunapi predicapashcani.
20 Chaimi Cristomanda ña uyashca llactacunapica na predicanata decidircani. Shujcuna predicashca jahua ama ñucapash predicajungapami shina decidiparcani.
21 Taita Dios escribichishca shimipi nishcashnami pasarca. Chaipica nijunmi: “Paimanda parlajta na uyashca gentecunaca, paitaca rijsingami. Paimanda villajta na uyashcacunapash intindingami” nishpa.
22 Chai rasonmandami quiquingunata visitangapaj munashpapash, tauca viajecunata na visitai ushapashcani.
23 Pero cai llactacunapica, ña tucui ladocunapimi predicapashcani. Y ña unaitami* quiquingunata visitaj shamungapaj munajupashcani.
24 Chaimi España llactaman rijushpaca, quiquingunata ricushpandi yalingapaj munapani. Shuj tiempota quiquingunahuan cushilla yalishca jipa Españaman rijujpica, ashaguta ñucata cumbashpa richunmi munapaiman.
25 Pero primeroca Jerusalenbi Taita Diospa separashcacunata* ayudangapami, chai llactamanra rigrijupani.
26 Porque Macedonia llactamanda y Acaya* llactamanda huauquipanicunaca, Jerusalenbi causanajuj pobrella Taita Diospa separashcacunata ayudangapami, paicuna charishcagucunata tucui shunguhuan carashca.
27 Ciertota parlashpaca, paicunaca paicunapa munaimi tucui shunguhuan cararca. Pero paicunaca, Jerusalenmanda huauquicunahuanga dibi tucushcashnami can. Porque Taita Diospa separashca judiocunaca Taita Diosmanda tucui imata chasquishcataca na judío gentecunamanbashmi compartishca. Chaimi na judiocunaca, Jerusalenmanda huauquicunataca, imaguta minishtishcapi ayudanapacha can.
28 Pero cunanga huauquipanicuna carashcacunatami Jerusalenbi Taita Diospa separashcacunaman entregangapaj rijupani. Chai jipami quiquingunata visitashpandi España llactaman rigrini.
29 Ashtahuangarin, cangunapaman rishpaca, Cristopa ashtaca bendiciongunahuanmi chayagrisha.
30 Huauquicuna, ñucanchi Señor Jesucristomanda y Taita Diospa espíritu santo cushca juyaimandami, cangunataca rogaita rogapani, imashinami Taita Diosta ñucamanda mañani, shinallata cangunapash ñucamanda Taita Diosta mañapachun.
31 Judea llactamanda Jesuspi na crij gentecunamanda salvahuachun, shinallata Jerusalenbi Taita Diospa separashcacuna ñucapa ayudata ali chasquichunmi mañapani.
32 Shinami, Taita Diospa voluntad cajpica, cushijushpa quiquingunataca visitagrisha y randimanda animarishun.
33 Tranquilo ali causaiguta caraj Taita Diosca quiquingunahuan cachun. Amén.
Notacuna
^ O “debilidadcunataca”.
^ Glosariopi “Jehová” shutita ricupangui.
^ Caipica “profeta Isaiasmandami” parlajun.
^ Glosariopi “bondad inmerecida” shimita ricupangui.
^ O “huaquin huatacunatami”.
^ Glosariopi “Taita Diospa separashcacuna” shimita ricupangui.
^ Acayaca Roma llactapa shuj provinciami carca. Acaya provinciapa capitalca Corintomi carca.
