¿Imayna rijch’ayniyoqmi Jesús karan?

QALLARIY

¿Ima ninmi Biblia?

Manan pipas yachanchu Jesús imayna rijch’ayniyoq kasqantaqa, Bibliapas manan willanchu. Chaymi rikuchin imayna rijch’ayniyoq kasqanqa mana importantechu kasqanta. Ichaqa Bibliaqa willanmi imayna runa kasqanta, chaywanmi reparasunman Jesús imayna kasqanta.

Rijch’aynin: Jesuspa mamanqa judía warmin karan, paymanmi rijch’akunman karan (Hebreos 7:14). Jesusqa juj runakuna jinallan kanman karan. Chaymi juj kutin Galileamanta Jerusalenman viajaqtin mana pipas reqsiranchu (Juan 7:10, 11). Discipulonkunamantapas manan jujniraychu kanman karan, chaymi Judas Iscariotepas juj señalwan Jesusta reqsichiran, jap’iq jamuq runakunaman (Mateo 26:47-49).
Chujchan: Jesusqa manan jatun chujchayoqchu kanman karan. Biblian willan “chujchata jatunta wiñachikuyqa qharipaq p’enqay kasqanta” (1 Corintios 11:14).
Sunkhan: Jesusqa sunkhayoqmi karan. Payqa kasukuranmi judiokunapaq kamachikuyta, chaypin niran sunkhankuta ama k’isukunankupaq (Levítico 19:27; Gálatas 4:4). Jinaspapas, Jesuspa ñak’arinanmanta willaq profeciapin sunkhanmanta riman (Isaías 50:6).
Cuerpon: Jesusqa kallpayoq runan kanman karan. Payqa askha kilometrotan puriq predicaspa (Mateo 9:35). Iskay kutitan templomanta qarqomuran negocio ruwaqkunata mesankuta tanqarparispa, uywakunatapas jasut’iwanmi qarqomuran (Lucas 19:45, 46; Juan 2:14, 15). Juj libron nin: “Llapan evangeliokunan riman Jesusqa kallpayoq allin saludniyoq kasqanmanta”, nispa (Cyclopedia de M’Clintock y Strong, volumen IV, página 884).
Uyan: Jesusqa munakuq khuyapayakuq runan karan, chhayna kasqanqa uyanpichá rikukuran (Mateo 11:28, 29). Tukuy clase runan paytaqa maskhaq consolasqa kanankupaq yanapayninta mañakunankupaq ima (Lucas 5:12, 13; 7:37, 38). Wawakunapas kusisqan ladonpi sientekuqku (Mateo 19:13-15; Marcos 9:35-37).

Jesuspa rijch’ayninmanta pantasqa yachachikuykuna

Pantasqa yachachikuy: Wakinqa piensankun Jesús yana colorniyoq kananpaq Apocalipsis libropi chujchanta millmawan chakintataq ‘ch’uyayachisqa k’anchashaq broncewan’ comparasqanrayku (Apocalipsis 1:14, 15 Diospa Simin Qelqa).

Cheqaq kaq: Apocalipsis libropi willakuykunaqa “mosqoypi jina” rikuchisqan karan (Apocalipsis 1:1). Chaypi chujchanmanta chakinmantawan willasqanqa Jesús kausarimpuspa imayna cualidadniyoq kasqantan representan, manan kay pachaman jamuspa imayna rijch’ayniyoq kasqantachu willashan. Apocalipsis 1:14 textopi “umanpas chujchanpas yuraq millma jina rit’i jinan yuraqllaña kasqa” nispaqa ima color kasqanmantan rimashan. Yuraq chujchaqa Jesús yachayniyoq kasqantan representan, unay tiempo kausasqanrayku (Apocalipsis 3:14). Chay versiculoqa manan comparashanchu Jesuspa chujchanta millma imayna kasqanwan, nitaq rit’i imayna kasqanwanchu.

Juanpa rijuriypi rikusqanman jina, Jesuspa chakinqa “hornopi k’ancharishaq cobre jinan kasqa” (Apocalipsis 1:15). “Uyanpas chaupi p’unchaypi k’ancharishaq inti jinaraqmi kasqa” (Apocalipsis 1:16). Chay rijuriyqa representallanmi, manan ima razamanta runapas rijuriypi willakusqanwanqa tupanmanchu. Chay versiculokunapiqa kausarimpusqan qhepata Jesús imayna kasqanmantan rimashan, payqa ‘mana achhuykuna k’anchaypin tiyan’ (1 Timoteo 6:16).

Pantasqa yachachikuy: Jesusqa débil runan karan.

Cheqaq kaq: Jesusqa manan débil runachu karan, aswanpas fuerte valienten karan. Ejemplopaq, mana manchakuspan willaran pichus kasqanta payta jap’iq armasqa jamuq askha runakunaman (Juan 18:4-8). Jesusqa allin kallpayoqchá karan, carpinteriapi llank’ananpaqqa kallpatan necesitaran (Marcos 6:3).

Chhaynaqa, ¿imanaqtintaq yanapayta necesitaran wañuchinankupaq k’aspita q’epichishaqtinku? ¿Imanaqtintaq paywan kuska k’aspiman clavasqa runakunamanta aswan antestaraq wañupuran? (Lucas 23:26; Juan 19:31-33.) Manaraq wañuchishaqtinkun cuerpon nishuta debilitakuran. Tutantinmi mana puñuranchu, chaymantapas sinchi llakisqan kasharan (Lucas 22:42-44). Judiokunan tutantin maltrataranku, romanokunataq paqaristin tutamantan ñak’arichiranku (Mateo 26:67, 68; Juan 19:1-3). Tukuy chaykunawanchá astawan ratolla wañupuran.

Pantasqa yachachikuy: Jesusqa khuyay llakisqan puriq.

Cheqaq kaq: Jesusqa Jehová Dios jinan karan. Taytanqa ‘kusisqa Diostaq’ chayqa, kusisqapunichá Jesuspas karan (1 Timoteo 1:11; Juan 14:9). Chaymantapas Jesusqa imaynapi kusisqa kankuman chaytan jujkunaman yachachiran (Mateo 5:3-9; Lucas 11:28). Chhaynatataq yachachiran chayqa, paypas kusisqapunichá kausaran, chhaynaqa manan nisunmanchu “Jesusqa llakisqan kausaran” nispaqa.