Jesusmi willakurqa manaraq mañakuchkaptinchik ima necesitasqanchikmantapas Diosqa yachasqanmantaña (Mateo 6:8). Chaymantam Rey Davidpas nirqa: “Dios Taytalláy, manaraqpas rimarichkaptiyqa yachachkankiñam imam rimanaytaqa”, nispa (Salmo 139:4). Chaymi ichapas wakinqa ninman: “Manaraqpas mañakuchkaptiy ima necesitasqaytapas Dios yachaptinqa, ¿imanasqataq mañakunay?”, nispa. Imanasqa Diosta mañakunamanta Bibliapa ima nisqantayá yachasun. *

Bibliam willawanchik Jehova * Diosqa tukuy imata yachasqanmanta chaymantapas willawanchikmi serviqninkunata allintapuni reqsiwasqanchikmanta (Salmo 139:6; Romanos 11:33). Computadorapim waqaychanku runakunapa sutinta chaynataq maypi yachasqankumanta otaq tiyasqankumanta. Jehova Diosqa manam sutillanchiktachu nitaq maypi tiyasqallanchiktachu yachan, payqa yachanmi sonqonchikpi ima munasqanchikta hinaspapas munanmi amistadnin kananchikta (Salmo 139:23, 24; Santiago 4:8). Ima necesitasqanchikmanta Diosninchik yachaptinpas hinalla orakunanchikpaqmi Jesusqa kallpanchawanchik (Mateo 6:6-8). Unanchawaqninchikman sapa kutilla asuykuspaqa paywanmi allin amistadta ruwasun.

Wakinpiqa manapaschá yachanchikchu imayna mañakuyta. Chaywanpas Diosqa entiendewanchikmi ima mañakusqanchikta hinaspam chayman hina yanapawanchik (Romanos 8:26, 27; Efesios 3:20). Imayna yanapawasqanchikta musyakuspam Jehova Diosman astawan asuykunchik.

Bibliam willawanchik Jehova Diosqa payman sonqo kaqkunapa mañakusqanta uyarisqanmanta, chaymantapas willawanchiktaqmi wakinpa mañakusqantaqa mana uyarisqanmanta. Ñawpa tiempopim Israelpa castankuna tukuy mana allinta ruwaptinku Jehova Diosqa profetan Isaiaswan kaynata willachirqa: “Achka kutita mañakamuwaptikichikpas manam uyarikichikchu qamkunataqa. Yawarwan qachachasqam kachkan makikichikqa”, nispa (Isaias 1:15). Qawasqanchikman hina kamachisqanta mana kasukuqkunapata otaq munasqankuman hina mañakuqkunapataqa Diosqa manam uyarinchu (Proverbios 28:9; Santiago 4:3).

Bibliaqa niwanchiktaqmi: ‘Diospa munasqanman hina imatapas mañakuptinchikqa, payqa uyariwasunmi’ (1 Juan 5:14, NM). ¿Chaywanqa nichkanchu serviqninkuna imata mañakuptinpas Dios qosqanmanta? Manam. Apostol Pablom Diosta kimsa kutikama mañakurqa kichkapa tipaynin hina nanayninmanta libraykunanpaq (2 Corintios 12:7, 8). Yaqapaschá chay nanayninqa karqa ñawinpi. Chaywanqa hukmanyasqachá tarikurqa, Pabloqa hukkunata sanoyachinanpaqmi milagrokunata ruwarqa, ichaqa manam kikinqa librakuyta atirqachu nanayninmanta (Hechos 19:11, 12; 20:9, 10). Dios mana sanoyachiptinpas yanapaykusqanwanmi contentakurqa (2 Corintios 12:9, 10).

Ñawpa tiempopim Diosta serviq wakin runakunaqa mañakusqankuman hina Diospa milagro ruwasqanta rikurqaku (2 Reyes 20:1-7). Ichaqa wakin kutillapim chaynaqa karqa. Chaymi wakinpiqa mana contestasqanta piensaspanku serviqninkunaqa hukmanyasqa tarikurqaku. Hukninmi karqa rey David, paymi hukmanyasqa kaspan kaynata nirqa: “Dios Taytalláy ¿haykapikamataq qonqaruwanki? ¿Wiñaypaqchum qamqa qonqaruwanki?”, nispa (Salmo 13:1). Davidqa cuentatam qokururqa Jehova Diosqa achka kutipi imayna yanapasqanmanta, chaywanmi payqa Diospi astawanraq confiarqa. Chaymi chaylla nirqa: “Kuyakuynikipimá confiakullachkani”, nispa (Salmo 13:5). Ñoqanchikpas achka kutikamapaschá Diosta mañakunchik, ichaqa manapaschá cuentata qokunchikchu imayna yanapawasqanchikmanta (Romanos 12:12).

Imapas necesitasqanchiktam qowanchik.

Kuyakuq taytapas manam lliw mañakusqankutachu churinkunamanqa qon. Jehova Diospas manam lliw mañakusqanchiktachu nitaq munasqanchik horapichu qowanchik. Kuyakuq taytaqa churinkuna imatapas necesitaptinqa tanteasqanman hinam qon, chaynallataqmi Taytanchik Diospas necesitasqanchikman hinalla qowanchik (Lucas 11:11-13).

Mana musyayllatam wakinpiqa contestawanchik.

Ima sasachakuypi tarikuspapas, ¿suyananchikraqchu milagrota ruwaspan Jehova Dios yanapawananchikta? Chaynata mana ruwaptinqa, ¿mana yanapawasqanchikpaqchu piensananchik? Manam, aswanqa kallpanchakunanchikmi imayna yanapawasqanchikmanta cuentata qokunapaq. Ichapas necesitasqanchik hora mayqen amistadninchikpas yanapawarqanchik (Proverbios 17:17). Yaqapaschá yanapawarqanchik Jehova Dios kallpanchaykuptin. Mañakusqanchiktaqa contestawachwanmi Palabranwanpas. Ichapas chaypi tarirqanchik allin consejota ima sasachakuytapas atipanapaq (2 Timoteo 3:16, 17).

Sapa sasachakuyninkupi serviqninkunata yanapananmantaqa aguantanankupaqmi Diosqa kallpanchan (2 Corintios 4:7). Huk kutipim Jesucristo llumpay sasachakuypi tarikuspan Taytanpa yanapayninta mañakurqa, payqa manam munarqachu Taytanpa honornin yanqacharuytaqa. Mañakusqanta uyarispanmi Jehova Diosqa huk angelninwan kallpanchaykurqa (Lucas 22:42, 43). Chaynallataqmi ima llakipas pasawaptinchikqa mayqen amistadninchiktapas valekuspan kallpanchaykuwanchik (Proverbios 12:25). Chaymi imayna contestawasqanchikpi reparananchik, wakinpiqa mana musyayllatam contestawanchik.

Wakinpiqa suyananchikmi contestawananchikta.

Bibliam willakun tukuy atiyniyoq Dios kaspanpas humilde runataqa tiempollanpi contestasqanmanta (1 Pedro 5:6). Mañakusqanchikta chaylla mana contestawaptinchikqa manam piensanachu manaña reparawasqanchikpiqa. Alto-altopi Dios kaspanpas yachanmi imataq allinninchikpaq kasqanta hinaspam chayman hina contestawanchik.

Kaypi piensariy, uchuy warmachayki bicicletata rantipunaykipaq nisuptiki, ¿chayllachu rantirapuwaq? Manachá rantipuwaqchu bicicletata manejananpaq manaraq yuyayniyoq kaptinqa. Rantipuwaqqa manejananpaq hatunchaña kaptinchá. Chaynallataqmi Jehova Diospas tantean mañakusqanchikta haykapi qowananchikpaq, sonqonchikpa munasqan allinpaq kaptinqa hinallayá mañakusun (Salmo 37:4).

Bibliam kallpanchawanchik Dios yanapawananchikta munaspaqa tukuy sonqonchikwan hinalla mañakunapaq. Ichapas wakinqa ninman: “Rimayqa manam sasachu, confianzawan mañakuymi ichaqa sasa”, nispa. Wakinpim chaynata piensachwan imawanpas ñakarisqanchik hora mañakusqanchikta Dios chaylla mana contestawaptinchik. Ichaqa hinalla mañakunamanta Jesuspa ima nisqatam yuyananchik.

Jesusmi rikchanachispan willakurqa mana allin juezta huk wakcha viuda yanapaykunanpaq sapa kutilla ruegakusqanmanta (Lucas 18:1-3). Chay juezqa manam yanapayta munarqachu ichaqa  kaynatam piensarurqa: “Diosta mana manchakuspaypas hinaspa runakunata mana respetachkaspaypas hamupayawasqanraykuyá arreglota ruraykapusaq mana chayqa, kutinyamuspanmi [otaq fastidiawaspanmi] umayta nanachiwanman”, nispa (Lucas 18:4, 5). Hebreo rimaypiqa ‘fastidiay’ ninanqa “ñawinpi takay” otaq “pitapas penqaypi qepachiy” * ninanmi. Chay mana allin juezpas penqaypi mana qepananraykum viudata yanapayta munarqa, ¿manachu kuyakuq taytanchik Diospas ‘tuta-punchaw qayakusqanchikta’ uyarispan yanapaykuwasun? Jesusmi nirqa: ‘Payqa chayllam [justiciata] rurasunkichik’, nispa (Lucas 18:6-8).

Wakinpiqa ichapas amiruchwan Diospa yanapaynin mañakuyta. Hinalla mañakuspaqa Diospa yanapaynin chaskiy munasqanchiktam qawachinchik. Chaymantapas reparananchikmi mañakuptinchik Dios imayna yanapawasqanchikta, chayqa payman astawan asuykunapaqmi kallpanchawanchik. Jehova Diospa munasqanman hina chaynataq iñiywan mañakuptinchikqa yanapawasunpunim (Lucas 11:9).