Nacerqanim Alemania nacionpi, Sajonia lawpi. Chay tiempoqa llaqtaymi karqa gobierno comunistapa makinpi (Republica Democratica Alemana). Warma kasqaymantam tayta-mamayqa yachachiwarqa allin kaqkunata ruwanaypaq. Llaqtaypi runakunaqa gobierno comunistapa makinpi kasqankuraykum manaña Diospiqa creerqakuñachu. Chaymi ñuqapas mana creerqanichu. 18 wataykamam wiñarqani comunista umayuq hinaspa Diospi mana creeq.

Comunismo gobiernotam allinpaq qawarqani ‘lliw runam chaynakamalla kanchik’ nisqankurayku. Ñuqaqa piensarqaniraqmi tukuy imata lliw runaman aypunamanta, chaynapi apupas wakchapas mana kananpaq. Chaymi comunistata allinpaq qawaq mozokunawan hukllawakurqani. 14 wataypi kachkaspaymi servichikusqa papelkunata huñurqani yapamanta imaynata servichikunapaq, hinaptinmi Aue sutiyuq llaqtapi alcalde premiota quwarqa. Mozollaraq kachkaspaymi politicapi puriq runakunawan riqsinakurqani. Chaymi piensarqani qipa punchawqa paykuna hina kanaymanta.

Ichaqa, 1989 watapim Berlin llaqtata rakiq hatun pirqata tuñirachiptinku tukuy ima piensasqaypas puyu hina chinkarurqa. Chaywanmi gobierno comunistapas tukurqa. Hinaptinmi yachakururqa comunista kaq runakunaqa, mana comunista kaq runakunata usuchisqankuta. Chayta yacharusqaywanmi llumpayta hukmanyarurqani. Chaymi tapukurqani ¿imaynamá llapallanchikmi chaynalla kanchik nichkaspankuqa runamasinta usuchirqaku? ¿Icha yanqallachu rimarqaku?, nispay.

Chayraykum comunismotaqa saqirurqani, hinaspam tocayta chaynataq dibujaytaña estudiarqani. Chaymantapas, tayta-mamaypa yachachiwasqanta mana kasukuspaymi sunquypa munasqantaña ruwarqani, chaymi pasñakunawanpas iskay-kimsawan kakuq kani. Ichaqa sunquypa munasqanman hina kawsakuspaypas chaynataq tocayman hinaspa dibujayman qukuruspaypas, sunquypiqa hinallam hukmanyasqa tarikurqani hamuq punchawmanta chaynataq imapaq kawsasqanchikmanta piensasqayrayku. Chaymi  dibujasqaykunapipas chaymanta llakikusqay sutilla karqa.

Huk punchawmi, estudiasqaypi achka mozokuna huñunakuruspanku hamuq tiempomanta rimachkasqaku, chaymi ñuqapas paykunawan tiyaykurqani. Paykunawan tiyaq Madily * sutiyuq testigom kaynata niwarqa: “Andreas, hamuq punchawmanta chaynataq imapaq kawsasqanchikmanta yachayta munaspaykiqa bibliata ñawinchay”, nispa.

Chay niwasqanmanta iskayrayaspaypas yachaytam munarqani. Madilynmi Danielpa iskay capitulonta qawachiwarqa. Chaypim rimachkan wakin nacionkunamantapas aswan munayniyuq nacionkunamanta. Qawachiwarqataqmi hamuq punchawpaq bibliapa willakusqantapas. Chaymi chayraq sunquy tiyaykurqa. Ichaqa tapukurqaniraqmi ¿pitaq chaykunata qillqarqa? ¿Pitaq hamuq punchawmanta imam kaqta willakuqqa? ¿Dios kasqantachu chay willakuyqa qawachin?, nispay.

Madilynmi Horst hinaspa warmin Angelikata bibliamanta yachachiwanankupaq riqsiykachiwarqa. Paykuna bibliamanta yachachiwaptinmi entienderurqani Jehova Diospa testigonkunalla Diospa sutinta riqsichisqankumanta (Romanos 10:13; Mateo 6:9). Yacharurqanitaqmi, Jehova Diosta kasukuq runakunaqa kay allpa pacha sumaq huerta kaptin wiñaypaq kawsakunankumanta. Chaytam Salmo 37:9 nin: ‘Allpatamá dueñoyanqa tayta Diospi suyaqkuna’, nispa. Chayta yacharuspaymi kusisqa tarikurqani.

Ichaqa bibliapa nisqanta kasukunaypaqmi sasachakurqani. Allin dibujaq hinaspa allin tocaq kasqayraykum hatun tukuq karqani, chaymi kallpanchakurqani hatun tukuq kayniyta saqinaypaq. Sasachakurqanitaqmi sunquypa munasqanman hina kawsakusqayta saqinaypaqpas. Jehova Diostam agradecekuni ñuqa hina kallpanchakuqkunawan kuyakuq, pacienciakuq kasqanmanta.

18 wataykamam wiñarqani comunista umayuq hinaspa Diospi mana creeq, ichaqa chaymanta qipamanmi bibliapa yachachisqanña kawsakuyniypi yanapawachkan. Chaymi kusisqa sunquyuqña kawsakuni. Manañam kunanqa llakikuywanñachu qipa punchawtaqa suyani. 1993 watapim bautizakurqani Jehova Diospa testigon kanaypaq, 2000 watapiñataqmi Tabitha sutiyuq iñiqmasiywan casarakurqani. Iskayniykum astawan tiempochakuniku bibliamanta runakunaman yachachinaykupaq. Runakunaqa yaqa llapankum comunismo umayuq hinaspa Diospi mana creeq wiñarqaku. Kusisqam tarikuni Jehova Diosmanta runakunaman yachachispay.

Testigokunawan hukllawakuyta qallaykuptiymi tayta-mamayqa mana allinpaq qawarqaku. Ichaqa tiempopa risqanman hinam, cuentata qukururqaku testigo kasqayrayku allin kawsakusqaymanta. Kunanqa, tayta-mamayqa testigokunawanmi bibliata estudiachkanku, hinaspapas huñunakuykunamanmi richkanku.

Warmichaypas, ñuqapas kallpanchakunikum casadokunapaq bibliapa ima nisqanta kasukunaykupaq, chaymi kusisqa kawsakuniku. Bibliam nin casadokunaqa yanallankupaq ñawiyuq kanankumanta, chayta kasukusqaykuraykum huk sunqulla kawsakuniku (Hebreos 13:4).

Enteron pachapi hawka kawsakuq testigokunam aylluy hina kanku. Testigopiqa lliwmi chaynakamalla kaniku, manam pipas aswan allinpaqqa hapikunchu, chayna runakunawan kawsaytam warma kasqaymantapacha munarqani.