Cai tucushcai iyari: Karen chunga minutu shu istai ashcai cungaimanda uyan ricsishca shimira huashamanda:

Huashama ricusha paihua amiga Jessicara ricun ishqui cervezara apamuuta. Jessica shu botellara cusha nin: “Ña mana shu huahua angui. Ansa cushiyana ushangui ¿manzhu?”.

Karen mana upina munan, shinajpi Jessica paihua amiga an. Karen mana munan paihua amiga cushiyanara mana charingui nisha iyachu. Jessica shu ali malta an. Pai upijpi ali anga. Karen iyarin: “Shu cervezalla an. Mana droga upina cuinta an” nisha.

Can Karen asha, ¿imara ruranguima?

Ali ajllashcaunara apingaj cai tucushcaunai, can ima tunu runa ashcara yachangaj ministingui. Can ima tunu runa ashcara yachana ricuchin can ima valichishcara can ima quirishcara. Caita yachasha yanapan, ursaras cun camba causaira ali apangaj shujcuna canmanda randi ruranuchu (1 Corintios 9:​26, 27).

¿Imasnara chi ursara tupana ushangui? Callaringaj catij tapuigunara yachashun.

Can ima ali ruranai yachasha canllai mas quirina charingui.

BIBLIAMANDA EJEMPLO: Apóstol Pablo quillcaca: “Ñuca mana ali rimaj ajpi, mana shinachu ñuca yachana” (2 Corintios 11:6). Diospa Shimira ali ricsishcamanda chijnishca tucusha shinzhi catica. Mana saquica mana ali rimashcauna paillai quirina pirdichu (2 Corintios 10:10; 11:5).

CANLLAI IYARI: Quillcai can ima ali rurana ushashcara.

Cuna can mas ali ruranara quillcai (iyari ¿can llaquij shungu, cuyaj, ali pactachij angui?).

Imasna shu huasca apiyashca partii pitirin, shinallara can valichishcara quirishcaras cungarina ushangui manali rurashcaunara rurangaj callarisha.

BIBLIAMANDA EJEMPLO. Pablo pai manali ruranaunara ricsica. Chiraigu quillcaca: “Ñuca shungu ucui, Diospa ley shimii cushiyauni. Shinajpi, shu ley shimira ricuni ñuca aichai, caiga ñuca iyaibi tiaj ley shimihua macanaun, ñucara apisha nin, ñuca aichai tiaj ucha ley shimira rangaj” (Romanos 7:​22, 23).

CANLLAI IYARI: ¿Ima manali ruranai vinsinara ministini?

¿Shu taxima sicasha manejau runara mañanguichu chi cuadrai muyurisha gasolina illaj saquirinagama? Yangamanda, ¿manzhu? Astaun yapa cullqui valingami.

¿Imara yachaunchi? Pactachina iyaigunara charina yanapanmi chimanda tarbangaj camba causaibi. Yachangui maima rinara imasna pactanaras.

BIBLIAMANDA EJEMPLO: Pablo quillcaca: “Ñuca casna callpauni, mana yanga callpasha” (1 Corintios 9:26). Causaibi yangamanda riusha imaras pasachu saquina randimanda Pablo pactachina iyaigunara churarca pai causaibi, astaun ursarica pactachingahua (Filipenses 3:​12-14).

CANLLAI IYARI: Cuna quillcai quinsa pactachina iyaira cai huatai rurana munashcara.

Can quirishcara mana sirtu quirisha, ima ajllanara mana yachangui. Tucui huras turcaringui camba amigoguna cuinta ricuringaj, imasna shu camaleón nishca turcarin caran partii pai purishcai. Maican shina rurasha pi ashcara mana yachan.

Randi, can quirishcara catisha can pi ashcara yachangaraungui shujcuna ima iyashcara mana ricusha.

BIBLIAMANDA EJEMPLO: Daniel shu maltalla ashcangachari paihua familiamanda caruyachishcai. Shina ashas “tucui shunguhua” ajllaca Dios mandashcaunara casungaj (Daniel 1:8). Pai pi ashcara mana cungarina munaca, pai quirishcaunahua ali catisha causaca.

CANLLAI IYARI: ¿Imai quiringui? Iyari: ¿Diospi quiringui? ¿Imarasha? ¿Imara canda quirichishca pai tiashcara?

¿Iyanguichu Diospa mandashcauna canda yanapashcara? ¿Imarasha?

Can ¿imara tucuna munangui: huaira panga apashca o shinzhi huaira ahuantaj yurasna? Cai yura cuinta tucuna munasha, ursari can pi ashcara yachangaj. Cai yanapanga catij tapuira cutipangaj: Ñuca ¿pita ani?