Cai tucushcai iyari: Julia ispijui ricurisha yapa racu ira huarmi ricurin. “Irquiyana ani” nisha iyan. Shinajpi paihua yayauna amigogunas rimanun yapajta irqui ashcara ña tullu ricurin.

Julia ashca timpu iyasha riushca imasna mas irquiyanara. Micuna saquinalla an ansa punzhauna...

Can Julia cuinta sintirisha, ¿imara ruranguima?

Alimi can ricurinamanda preocuparingaj. Astaun Biblia riman ashca sumaj cari huarmimandas imasna Sara, Raquel, José, David, Abigail cuinta. Shu huarmi Abisag shutiyujmanda nin “yapajta sumaj aca” (1 Reyes 1:​4).

Ashca maltauna paiguna imasna ricurina yapajta turbarinun. Cai atun llaquiunara apamuna ushan. Caibi iyari:

• Caita estudiashcai, 58% huarmiuna rimanuca yapajta racu ashcara, randi 17% paigunamanda racuuna anuca.

• Shuj estudiashcai, irqui huarmiunamanda 45% iyanuca racu ashcara.

• Huaquin maltauna irqui angahua yapajta turbarisha anorexia nishca ungüira apinushca. Cai ungüi micunara saquina an paihua causaira huañuibi churan.

 Casna tunu ungüira charisha shuj tunuunaras, yanapaira mascai. Camba yayaunara cuintai o shuj ali runara. Biblia ninmi: “Ali amigo tucui huras llaquinmi shinallara turmindus tiashcai shu huauqui an” (Proverbios 17:17).

Ñucanchi shungu ucui tiashcara mas sumaj ricuchin. Ricui Bibliai ima nishcara Absalonmanda rey Davidpa churi:

“Tucui Israel llactai mana tiaca ni shuj runa ahuayachishca Absalón cuinta sumaj ashcamanda. Chaquimanda pacha uma curunagama, pai ima irus illaj aca” (2 Samuel 14:25).

Pai yapajta ahuayashca, yapajta munaj, llullaj malta runa aca. Chiraigu Biblia paimanda manali riman, mana chuyaj shunguyuj, chijnisha huañuchij runa cuinta ricuchin.

Chiraigu Biblia camachin:

“Mushuj causaira churarichi” (Colosenses 3:10).

“Canguna sumajyarina ama canzhallara achu, [...] astaumbas canguna sumajyarina ucuma achu, shungüi” (1 Pedro 3:​3, 4).

Can ali ricuringaj munaira charisha alimi an, shinajpi can imasna ashca ucui mas valij an. Huasha runauna can ali ruranaunara ricununga, can imasna ricurina randi. “Can sumaj asha, runauna canda dsaslla ricununga” Cecilia malta huarmi nin, “shinajpi can shungu ucui charishcara, can ali ruranaunara shujcuna llaquihua iyarinunga”.

Can imasna ricurinara ¿gustanguichu?

¿Huaquin huras iyarishcanguichu shu dietara rurangaj manali ricurishcara alichingaj?

Camba ricurinamanda ¿imara cambianguima? (Ajllai can munashcara).

• AHUA

• PESO

• ACCHA

• AICHA TUNU

• ÑAHUI

• AICHA CARA

Ishqui punda tapuigunai “ari” cutipashca asha, shinallara quinsa o mas ajllashca asha quinsa tapuibi, iyari caibi: shujcunas mana ricunun can manali cuinta ricurishcara. Riparai ahualla an yapajta preocuparingaj imasna ricurinamanda (1 Samuel 16:​7).