Lección 7
¿Huahuacunamanca ima shinataj yachachina cangui?
“Cunan ñuca canman imalla yachachishcacunataca cambaj shungupi alli huaquichingui. Chaicunataca cambaj huahuacunamanca punllanta cutin cutin yachachingui.” (Deuteronomio 6:6, 7)
Familiata callarichishpaca Jehová Diosca yaya mamatami huahuacunata cuidachun mingarca (Colosenses 3:20). Huahuacuna Jehová Diosta cꞌuyachun, huiñashpapish alli cꞌari, alli huarmi tucuchunca yaya mamacunami yachachina can (2 Timoteo 1:5; 3:15). Huahuacuna shungupi imata yuyashcatapishmi yaya mamaca yachana can. Huahuacunaman Diospaj Shimita alli yachachingapajca, yayacunarajmi Diospaj Shimita cꞌuyana can (Salmo 40:8).
1 HUAHUACUNA CANHUAN PARLACHUN AYUDAI
BIBLIACA CAITAMI YACHACHIN: “Imatapish uyanataca alli uyaichij. Manaraj alli yuyarishpaca ama rimaichijchu” (Santiago 1:19). Huahuacuna mana manchashpa tucuita parlachunca, canmi paicunahuan parlangapaj tiempota charina cangui. Mana pꞌiñarishpa, alli uyajpica huahuacunaca canhuan parlasha ningami (Santiago 3:18). Yayacuna pꞌiñarijta, maipish cachun rimajta ricushpaca huahuacunaca mana tucuita parlasha ningachu. Chaimantami alli parlashpa huahuacunata cꞌuyashcata ricuchina cangui (Mateo 3:17; 1 Corintios 8:1).
CAITA RURAI:
-
Huahuacuna canhuan parlasha nijpica tiempotami charina cangui
-
Huahuacunahuanca mana llaquicuna tiyajllapichu parlana cangui, cutin cutinmi parlana cangui
2 HUAHUACUNA IMATA NISHA NISHCATA UYAI
BIBLIACA CAITAMI YACHACHIN: “Mandaj Diospi shunguta churashpa, paipaj shimitapish tucui yuyaihuan yachajca allicunata japishpa cushicunmi” (Proverbios 16:20). Huahuacuna imata nisha nishcata alli yachangapajca, mana paicuna parlashcallatachu uyana cangui. Huahuacunaca huaquinpica mirachishpa, mana alli yuyashpami parlan. Chaimantami Bibliaca: ‘Manaraj uyashpa imatapish cutichijca, upa cashcata ricurishpami pingai tucun’ nin (Proverbios 18:13). Shinaca mana ñapish pꞌiñarinachu cangui (Proverbios 19:11).
CAITA RURAI:
-
Cambaj huahua imata parlacujpipish ama mancharishpa, ama upallachishpa alli uyai
-
Huahua cashpa can imata munashcata, ima shina sintirishcata yuyari
3 SHUJ YUYAILLA TUCUSHPA YACHACHICHIJ
BIBLIACA CAITAMI YACHACHIN: “Ñuca huahualla, alli causanata cambaj yaya yachachishcataca alli uyayari. Cambaj mama yachachishcatapish ama mana uyasha nichu” (Proverbios 1:8). Yayapish mamapish huahuacunaman yachachichunmi Diosca mandan. Ishquidijmi respetanata, cazunatapish yachachina can (Efesios 6:1-3, NM). Yaya mamacuna mana shuj yuyailla cajpica huahuacunaca jahuallami ricun. Chaimantami Bibliaca: “Yuyanapi, tucuicuna tandalla chai shinataj caichij” nin (1 Corintios 1:10). Imapi mana shuj yuyailla cashpaca, huahuacunapaj ñaupajpi mana pꞌiñanacunachu canguichij. Huahuacuna chaita ricushpaca mana respetangachu.
CAITA RURAI:
-
Huahuacunaman ima shina yachachinata cancunapura alli parlanacuichij
-
Huahuacunaman yachachingapaj cusahuan o huarmihuan mana shuj yuyailla cashpaca, cusa o huarmi imamanta chashna yuyashcata entendi
4 IMA SHINA YACHACHINATA YUYAI
BIBLIACA CAITAMI YACHACHIN: “Cambaj huahuataca uchilla cajpiraj, alli yachachingui” (Proverbios 22:6). Huahuacunataca mana yuyarishca horasllachu yachachina cangui. Ima shina yachachinatami alli yuyana cangui. Shinallataj huaquinpica llaquichinami minishtirin (Salmo 127:4; Proverbios 29:17). Llaquichina nishpaca mana macanallamantachu parlan. Ashtahuanpish imamanta cashna o chashna rurachun nishcatami entendichina cangui (Proverbios 28:7). Diospaj Shimita cꞌuyanata, imamanta Biblia chashna yachachishcata entendichunmi ayudana cangui (Salmo 1:2). Chashna ayudajpica huahuacunaca ima alli cashcata ima mana alli cashcatami yachanga (Hebreos 5:14).
CAITA RURAI:
-
Huahuacuna Dios tiyashcata crichun, Diospi shunguta churachunpish ayudai
-
Internetpica achca llaquichijcunami tiyan, chaimantami huahuacunata pipish ama llaquichichun yachachina cangui. Violasha nijcunamantapish alli cuidarichunmi yachachina cangui