Santiago 1:1-27
-
Saludashcamanta (1)
-
Llaquicunata ahuantaj runaca cushicunmi (2-15)
-
Ahuantashpami alli feta charishcata ricuchinguichij (3)
-
Crishpa mañaranamanta (5-8)
-
Runapaj munaimi juchamanpish, huañuimanpish apan (14, 15)
-
-
Tucui alli regalocunaca jahua pachamantami shamun (16-18)
-
Diospaj shimita uyanamanta, pajtachinamantapish (19-25)
-
Espejopi ricurij runamanta (23, 24)
-
-
Diosta pai munashca shina chuya, ima mapa illajlla adoranamanta (26, 27)
1 Diostapish, Amito Jesucristotapish sirvij Santiagomi tucui ladocunapi caj 12 familiacunata:
¡Saludapani!
2 Ñuca huauquicunalla, chꞌican chꞌican llaquicunapi cashpaca achcata cushicuichij.
3 Cancunaca allimi yachanguichij, chai llaquicunata chꞌimbapurashpa cancunapaj fe alli cashcata ricuchishpaca ahuantanatami yachanguichij.
4 Ahuantanata mana saquishpaca alli allichirishcami canguichij. Chashnami tucuipi completo, tucuipi alli* canguichij. Shinallataj cancunapajca ima mana illangachu.
5 Chaimanta, cancunamanta maijanpish alli yachaita minishtishpaca Diosta cutin cutin mañachun. Chashna mañashpaca chasquingami. Diosca mana mitsashpa, mana rimashpami tucuicunaman chai yachaitaca cun.
6 Ashtahuanpish crishpa, caita chaita mana yuyashpa mañashpa catichun. Caita chaita yuyaj runaca mama cucha yacuta huaira cuyuchishpa caiman chaiman apashca shinami can.
7 Paica Jehová* Diosmanta imata chasquinataca mana yuyanachu can.
8 Chai runaca ishqui yuyaiyujmi. Tucui paipaj ruraicunatapish siempre cambianllami.
9 Shinapish humilde huauquica Dios paita jatunyachishcamanta cushicuchun.*
10 Cutin charij huauquica humilde canata yachashcamanta cushicuchun. Charij runaca qꞌuihua sisa shinami chingaringa.
11 Shuj plantaca inti llujshishpa yallitaj rupachijpimi anguyan. Chaimi sisaca sumaj cashpapish urmashpa chaquirishpa chingarin. Chashnallatajmi charij runapish charinacunallata mashcacushcamanta huañushpa chingaringa.
12 Llaquicunahuan cashpapish ahuantashpa catij runaca cushicunmi. Chashna ahuantajpimi Jehová* Diosca shuj premiota* shina paimanca causaita cunga. Chai premiotaca paita cꞌuyashpa catijcunamanmi Diosca cusha nishca.
13 Maijanpish ima llaquita apacushpaca: “Diosmi ñucata llaquichicun” ama nichun. Ima mana allicunahuanca Diostaca pi mana llaquichi tucunchu. Diospish mana allicunahuanca pita mana llaquichinchu.
14 Ashtahuanpish cada unomi paipaj quiquin munaillataj umajpi, shuj trampata shina churajpi llaquipi urmai tucun.
15 Chai munai chichujpica juchami huacharin. Juchata rurajpica chai juchaca huañuimanmi apan.
16 Ñuca cꞌuyashca huauquicuna, ama umarichijchu.
17 Tucui alli regalocunapish, ima ashtahuan allicunapish jahua pachamantami shamun. Chaicunaca jahua pachapi caj achijyachij luzcunata ruraj Yayamantami shamun. Paica llandu cambiarij shinaca mana cambianchu.
18 Paipaj munai cashcamantami paipaj mana llulla shimita crijpi ñucanchijman causaita curca.* Pai rurashcacunapuramanta punta agllashcacuna cachunmi chashna rurarca.
19 Ñuca cꞌuyashca huauquicuna, caita yachachunmi munani. Tucuicunallataj alli uyajcuna, mana utca rimajcuna, mana utca pꞌiñarijcuna caichij.
20 Pꞌiñarij runaca mana Dios munashca shina cashcata ruranchu.
21 Chaimanta tucui imalla mapayachijcunata, tucui laya millaicunatapish cancunapaj causaimanta anchuchichij. Shinallataj Dios paipaj shimita cancunapi sapiyachichun humilde shunguhuan chasquichij. Diospaj shimimi cancunapaj causaita quishpichi tucun.
22 Ashtahuanpish Diospaj shimita pajtachichij. Ama uyajcunalla caichijchu. Chashna uyajcunalla cashpaca cancunallatajmi llulla yuyaicunahuan umaringuichij.
23 Maijanpish Diospaj shimita uyashca jahua mana pajtachijca shuj runa paipaj ñahuita espejopi ricurij shinami.
24 Espejopi ricurishpapish chaimanta rishpaca pai ima shina runa cashcatami utca cungarin.
25 Shinapish huatashcamanta cacharichij Diospaj jucha illaj leyta alli ricurashpa pajtachij runaca, chai leyta uyashpaca mana cungarinchu. Ashtahuanpish Diospaj shimita cazuj runami can. Chaita rurashpami paica cushicunga.
26 Maijanpish Diosta adoracushcata yuyacushpapish paipaj cꞌalluta mana jarcarishpaca paipaj quiquin shungutami umacun. Diostapish yangamantami adoracun.
27 Ñucanchij Yaya Diosta pai munashca shina chuya, ima mapa illajlla adoranaca* caimi: yaya mama illajcunata, viudacunatapish llaquicunapi cajpi cuidana, cai pachapi causajcunapaj ima mana alli ruraicunamantapish caruyanami.
Notacuna
^ O “sano”.
^ “Jehová” shutita huasha diccionariopi ricui.
^ Griego rimaipica: “jatunyarichun” ninmi.
^ “Jehová” shutita huasha diccionariopi ricui.
^ Griego rimaipica: “coronata” ninmi.
^ Griego rimaipica: “ñucanchijta huacharichirca” ninmi.
^ O “religionca”.
