1 Corintios 1:1-31
-
Pablo saludashcamanta (1-3)
-
Pabloca Corinto llajta huauquicunamantami Diosta pagui nirca (4-9)
-
Pabloca shuj yuyailla cachunmi mandarca (10-17)
-
“Cristomi Diospaj podertapish, yachaitapish ricuchin” (18-25)
-
Jehová Diosmanta jatun tucuchun nishcamanta (26-31)
1 Dios munashcamanta Cristo Jesuspaj apóstol cangapaj cayashca Pablomi cani. Ñucanchij huauqui Sostenesdijmi
2 Corinto llajtapi caj Diospaj congregacionmanpish, shuj shinalla tucushpa ñucanchij Amito Jesucristopaj shutita tucui ladocunapi huillacujcunamanpish cai cartata quillcanchij. Paica paicunapajpish, ñucanchijpajpish Amitomi. Cancunaca Cristo Jesushuan shuj shinalla cashcamantami Diospajlla chꞌicanyachishca canguichij. Diosmi cancunataca jucha illajcuna cachun cayashca:
3 Ñucanchij Yaya Diospish, Amito Jesucristopish yallitaj llaquij cashcata ricuchichun, sumaj causaitapish cancunaman cuchun.
4 Siempremi cancunamantaca ñuca Diosta pagui nini. Jesucristomantami cancunamanca Diosca yallitaj llaquij cashcata ricuchishca.
5 Cancunaca Cristohuan shuj shinalla cashcamantami tucui caicunataca chasquishcanguichij. Chaimantami Diospaj shimitaca alli huillai tucunguichij, alli yachai tucunguichij.
6 Cristomanta huillashcata uyashpami cancunaca tucui shunguhuan crishcanguichij.
7 Ñucanchij Amito Jesucristo paipaj poderta ricuchingacama shuyacushpaca tucui imalla minishtishcatami cancunaca charinguichij.
8 Ñucanchij Amito Jesucristo shamuna punllapi cancunata pi ama juchachichunmi Diosca tucuricama cancunataca sinchiyachishpa ayudanga.
9 Diosca pai nishcata pajtachijmi. Diosmi paipaj Churi ñucanchij Amito Jesucristohuan shuj shinalla cachun cancunata cayarca.
10 Shinaca cunanca huauquicuna, ñucanchij Amito Jesucristopaj shutipimi caita rogapani. Tucuicuna shuj yuyailla tucushpa parlaichij, ama cancunapura chꞌicanyanacuichijchu. Ashtahuanpish cancunapaj yuyaipi, munaipipish shuj shinalla caichij.
11 Ñuca huauquicunalla, cancunapurapi pꞌiñanacushpa rimanacui tiyashcatami Cloepaj huasimanta maijancunaca ñucaman huillarcacuna.
12 Cancunamanta maijancunaca: “Ñucaca Pablopajmi cani”, “Ñucaca Apolospajmi cani”, “Ñucaca Cefaspajmi* cani”, “Ñucaca Cristopajmi cani” nishpami puringuichij.
13 ¿Cristoca chaupirishcachari? ¿Pablochari cancunamantaca caspipi* huarcushca huañurca? ¿Pablopaj shutipichari cancunaca bautizarircanguichij?*
14 Cancunapuramanta ni maijanta mana bautizashcamantami Diosta pagui nini. Ñucaca Crispollata, Gayollatami bautizarcani.
15 Chaimantami cancunapuramantaca ñuca shutipi bautizarishcataca ni pi mana ni tucunguichij.
16 Cierto, Estefanaspaj huasipi cajcunatapishmi bautizarcani. Maijan shujtajta bautizashcataca mana yuyarinichu.
17 Cristoca ñucataca bautizachunca mana cacharcachu. Ashtahuanpish alli huillaicunata huillachunmi cacharca. Shinapish llaquichina caspipi* Cristo huañushca ama yanga cachunmi yachaj runacuna shina huillachunca mana cacharca.
18 Chingachishca cana gentecunapajca llaquichina caspipi* Cristo huañushcamanta huillaica yangallami. Shinapish ñucanchij quishpirishcacunapajca chai huillaica Diospaj podertami ricuchin.
19 Quillcachishcapica: “Yachaisapacunapaj yachaitami chingachisha. Yuyaisapa runacunapaj yuyaitapish mana chasquishachu” ninmi.
20 ¿Maipitaj yachaisapa runaca? ¿Maipitaj mandashcacunata quillcajca?* ¿Maipitaj cai punllacunamanta* imatapish rimanacunata munaj runaca? ¿Manachu Diosllataj cai pachapaj yachaitaca imapaj mana valijta shina rurarca?
21 Cai pacha gentecunaca paicunapaj yachaipi shunguta churashcamantami Diostaca mana rijsishcacuna. Ñucanchij huillashcaca shujtajcunapajca imapaj mana valij shinami. Shinapish cai huillaita crijcunatami Diosca quishpichishca. Chashnami paica alli yachaj cashcata ricuchishca.
22 Ashtahuanpish judiocunaca milagrocunata rurachunmi mañancuna. Cutin griegocunaca alli yachaitami mashcancuna.
23 Shinapish ñucanchijca caspipi huañuchishca Cristomantami huillanchij. Caica judiocunapajca shuj ñitcachij rumi shinami can. Cutin shujtaj llajta gentecunapajca imapaj mana valij shinami can.
24 Chashna cajpipish Dios cayashcacunapajca judiocuna cajpipish, griegocuna cajpipish Cristomi Diospaj podertapish, yachaitapish ricuchin.
25 Diospajlla cajcunaca yangalla shina ricurishpapish gentecunata ashtahuan yalli yachajcunami. Shinallataj Diospajlla cajcunaca irquijlla shina ricurishpapish gentecunata ashtahuan yalli sinchicunami.
26 Huauquicuna, cancunallatajmi yuyari tucunguichij. Gentecuna yuyashca shina alli yachajcunata, poderyujcunata, alli familia ucupi huacharishcacunataca Diosca mana achcacunata cayarcachu.
27 Ashtahuanpish alli yachajcunata pingaipi churangapajmi Diosca cai pachamanta yangalla shina cajcunata agllarca. Sinchicunata pingaipi churangapajmi Diosca irqui shinacunata agllarca.
28 Gentecunapaj yuyaipi achca valishcacunata tucuchingapajmi cai pachapi imapish mana cajcunata, pꞌiñashcacunata, imapaj mana valijcunata Diosca agllarca.
29 Diosca paipaj ñaupajpi maijanpish ama jatun tucuchunmi chashna rurarca.
30 Diosmantami cancunaca Cristo Jesushuan shuj shinalla canguichij. Jesusmi Diospaj alli yachaitapish, cashcata ruranatapish ñucanchijman ricuchin. Jesusmantami jucha illaj cai tucunchij. Pai ñucanchijta randishpa quishpichishcamantami juchamantapish cacharichishca cai tucunchij.
31 Dios quillcachishcapi nishca shina pajtarichunmi chashna tucurca. Quillcachishcapica: “Maijanpish jatun tucujca Jehová* Diosmanta jatun tucuchun” ninmi.
Notacuna
^ “Cefas” shutica Pedropaj caishuj shutimi.
^ “Caspi” shimita huasha diccionariopi ricui.
^ “Bautizana” shimita huasha diccionariopi ricui.
^ “Llaquichina caspi” shimita huasha diccionariopi ricui.
^ “Llaquichina caspi” shimita huasha diccionariopi ricui.
^ Mandashcacunata quillcajca Leymanta yachachij runami carca.
^ Griego rimaipica: “aión” ninmi. “Cai punlla” shimita huasha diccionariopi ricui.
^ “Jehová” shutita huasha diccionariopi ricui.
