1 Corintios 7:1-40
-
Cazarashcacunapaj, mana cazarashcacunapajpish consejocuna (1-16)
-
Ima shinami cayashca carcanguichij chashnallataj catichij (17-24)
-
Mana cazarashcacunamanta, viudacunamantapish (25-40)
-
Mana cazarashcacuna ima bendicioncunata charinamanta (32-35)
-
“Cristota catijllahuan” cazaranamanta (39)
-
7 Cancuna quillcashpa tapushcamantami cunanca cashna quillcani. Shuj cꞌaripajca shuj huarmipi mana chayarinami ashtahuan alli can.
2 Shinapish huainayana* yallitaj tiyashcamantami cꞌarica paipaj propio huarmita, huarmipish paipaj propio cusata charichun nini.
3 Cusaca paipaj huarmi minishtishcata cuchun. Huarmipish paipaj cusa minishtishcata cuchun.*
4 Huarmica paipaj cuerpotaca mana mandai tucunchu. Ashtahuanpish paipaj cusami mandan. Shinallataj cusapish paipaj cuerpotaca mana mandai tucunchu. Ashtahuanpish paipaj huarmimi mandan.
5 Cusandij huarmindij aichapi chayarinacunataca ama saquichijchu. Shinapish Diosta mañangapaj ishquindijllataj shuj tiempota ama chayarinacungapaj ari ninacushca cashpaca allimi. Chai tiempo pajtajpica cutinllataj aichapi chayarinacuchunlla. Mana chashna rurajpica cancuna mana jarcari tucushcamantami Satanasca pandachi tucun.
6 Caita rurachuntajca mana mandanichu. Ashtahuanpish chashna ruranaca allimi canman nicunillami.
7 Ashtahuanpish tucui cꞌaricuna ñuca shinallataj cachunmi munani. Chashnapish Diosmi cada unoman shuj regalota cushca. Chaimantami maijancunaca cazarancuna, cutin shujtajcunaca soltero saquirincuna.
8 Manaraj cazarashcacunatapish, viudacunatapish ñuca shinallataj mana cazaranami ashtahuan alli can ninimi.
9 Shinapish mana jarcari tucushpaca cazarachunlla. Cꞌaripish, huarmipish yallitaj aichapi chayarina munaihuan purinapaj randica cazaranami alli.
10 Cazadocunamanca caitami mandani, shinapish mana ñucachu mandani, ashtahuanpish Amito Jesusmi mandan. Huarmica paipaj cusamanta ama separarichun.
11 Separarishpapish shujtaj cꞌarihuan ama cazarachun. Mana cashpaca paipaj cusahuan cutin alli tucuchun. Cusapish paipaj huarmimantaca ama separarichun.
12 Cutin caishujcunamanca caitami nini, mana Amito Jesuschu caitaca nin, ñucami cashna nini. Shuj huauquipaj huarmi ñucanchij Amitopi feta mana charishpapish paihuan saquirisha nijpica paipaj huarmimanta ama separarichun.
13 Shinallataj shuj huarmipaj cusa ñucanchij Amitopi feta mana charishpapish paihuan saquirisha nijpica paipaj cusamanta ama separarichun.
14 Feta mana charij cusaca paipaj huarmimantami jucha illaj tucun. Feta mana charij huarmipish paipaj cusamantami jucha illaj tucun. Mana chashna cajpica paicunapaj huahuacunaca Diospaj ñaupajpica mapa shinami canman. Shinapish cunanca paicunaca jucha illajcunami.
15 Ashtahuanpish feta mana charij cusa o huarmi separarisha nishpaca richunlla. Chashna tucujpica huauquipish, panipish paihuan causachunca mana obliganachu can. Ashtahuanpish Diosmi cancunamanca sumaj causaita cushca.
16 Shinaca huarmi, ¿cambaj cusata quishpichinata o mana quishpichinataca ima shinataj yachangui? Mana cashpaca cusa, ¿cambaj huarmita quishpichinata o mana quishpichinataca ima shinataj yachangui?
17 Dios manaraj cayajpi ima shinami causacurcanguichij, chashnallataj cada uno Jehová* Dios cushca shina causaichij. Caillatatajmi tucui congregacioncunapi mandacuni.
18 ¿Dios cayajpica shuj runaca ñachu circuncisionta rurachishca carca? Paica chashnallataj catichun. Cutin ¿Dios cayajpica shuj runaca manarajchu circuncisionta rurachishca carca? Paica circuncisionta ama rurachichun.
19 Circuncisionta* rurachinapish, circuncisionta mana rurachinapish mana importantechu can. Ashtahuanpish Dios mandashcacunata cazunami ashtahuan alli can.
20 Ima shinami cada uno cayashca carcanguichij chashnallataj catichij.
21 ¿Canta cayajpica sirvijchu carcangui? Ama sustarichu. Ashtahuanpish ima punlla sirvij canata saqui tucushpaca saquinguilla.
22 Maijanpish sirvij runa cashparaj Cristohuan* shuj shinalla cangapaj cayashca cashpaca, ña cacharichishca cashcamantami cunanca Cristota* cazun. Chashnallataj maijanpish cayashca horas cacharichishca cashca cashpaca cunanca Cristota sirvijmi.
23 Cancunataca Diosmi tucuimanta yalli valishcahuan randirca. Shinaca runacunata sirvij tucunata saquichij.
24 Huauquicuna, ima shinami cada uno cayashca carcanguichij Diospaj ñaupajpica chashnallataj catichij.
25 Mana nunca cazarashcacunapajca* Amito Jesús ima mandashcataca mana charinichu. Shinapish caitami nini, Amito Jesusmi yallitaj llaquij cashcata ñucamanca ricuchirca. Chaimantami ñuca nishcataca cri tucunguichij.
26 Shinapish cai llaqui punllacunapi cashcamantaca ima shinami carcanguichij chashnallataj catinami cancunapajca ashtahuan alli canga yuyanimi.
27 Huarmita charishpaca, paita saquishpa rinataca ama yuyaichu. Cutin huarmita mana charishpaca ama shuj huarmita mashcaichu.
28 Shinapish cazarashpaca ima juchata mana ruranguichu. Shinallataj shuj soltero* cazarashpaca ima juchata mana ruranchu. Ashtahuanpish cazarajcunaca causaipimi llaquicunata charingacuna. Chashna llaquicunata ama charichunmi cancunamanca chashna nini.
29 Ashtahuanpish huauquicuna, asha punllacunallami saquirin. Cunanmantaca huarmita charijcunaca huarmita mana charij shina cachun.
30 Huacajcunaca mana huacajcuna shina cachun. Cushicujcunaca mana cushicujcuna shina cachun. Imata randijcunaca imata randishcata mana charijcuna shina cachun.
31 Cai pachapi imalla tiyashcacunata charijcunapish mana tucuita charishca shina cachun. Cai pachapi imalla tucushcacunaca cambiacunmi.
32 Cancuna ama imamantapish sustarichunmi munani. Mana cazarashca runaca Cristopaj* ñaupajpi alli ricuringapajmi Cristopajta* rurana yuyailla causan.
33 Shinapish cazarashca runaca paipaj huarmipaj ñaupajpi alli ricuringapajmi cai pachapi tiyashcacunamanta sustarin.
34 Chaimantami ishqui yuyai tucun. Mana cazarashca huarmipish, soltera* huarmipish cuerpopipish, yuyaipipish jucha illaj cangapajmi Cristopajta* rurana yuyailla can. Shinapish cazarashca huarmica paipaj cusapaj ñaupajpi alli ricuringapajmi cai pachapi tiyashcacunamanta sustarin.
35 Caitaca cancunapaj allipajmi nini. Ima jarcaita churangapajca mana chashna ninichu. Ashtahuanpish allita rurashpa catichun, ima jarcaicuna illaj punllanta Cristota* sirvichunmi chashna nini.
36 Shinaca maijanpish soltero cashpa aichapi chayarina munaita mana jarcari tucushpa, ña mana yalli huambraraj cashpaca caita rurachun: pai munashcata rurachunlla, cazarasha nishpaca cazarachunlla, chashna rurashpaca ima juchata mana ruranchu.
37 Cutin maijanpish paipaj shungupi alli yuyarishpa, aichapi chayarina munaita mana charishpa, chai munaimanta jarcari tucushpa, paipaj shungupi soltero saquirinata yuyarishca cashpaca allitami ruran.
38 Shinaca cazarajpish allitami ruran. Cutin mana cazarajpish ashtahuan allitami ruran.
39 Cazarashca huarmica paipaj cusa causangacamallami paihuan cazarashca can. Shinapish paipaj cusa huañujpica* pihuanpish cazarai tucunllami. Ashtahuanpish Cristota catijllahuan cazarachun.*
40 Shinapish ñuca yuyaipica mana cutin cazarashpami ashtahuan cushilla canga yuyanimi. Ñucapish Diospaj espirituta charishcataca seguromi cani.
Notacuna
^ Griego rimaipica: “pornéia” ninmi. “Huainayana” shimita huasha diccionariopi ricui.
^ Caipica minishtishcata cuchun nishpaca cusa huarmipura aichapi chayarinamantami parlacun.
^ “Jehová” shutita huasha diccionariopi ricui.
^ “Circuncisión” shimita huasha diccionariopi ricui.
^ Griego rimaipica: “Amitohuan” ninmi.
^ Griego rimaipica: “Amitota” ninmi.
^ Caipica cꞌari cashpapish, huarmi cashpapish mana nunca aichapi chayarijcunamantami parlacun.
^ Caipica soltero nishpaca cꞌaricunamantapish, huarmicunamantapishmi parlacun. Paicunaca mana nunca aichapi chayarishcacunachu.
^ Griego rimaipica: “Amitopaj” ninmi.
^ Griego rimaipica: “Amitopajta” ninmi.
^ Caipica shuj cꞌarihuan aichapi mana chayarishca huarmimantami parlacun.
^ Griego rimaipica: “Amitopajta” ninmi.
^ Griego rimaipica: “Amitota” ninmi.
^ O “huañuipi dormirijpica”.
^ Griego rimaipica: “Amitollapi cazarachun” ninmi.
