1 Corintios 5:1-13
-
Shuj runa huainayashcamanta (1-5)
-
Ashalla levadura tucui masata pꞌunguillichij cashcamanta (6-8)
-
“Cancunapurapi caj millai runata llujshichichij” (9-13)
5 Cancunapurapi shuj runa huainayashpa* causacujtami uyashcani. Paica paipaj yayapaj huarmihuanmi causacun. Chashna huainayajca* Diosta mana rijsijcunapurapipish* manamari uyarishcachu.
2 ¿Chai jucha tiyashcamantaca cushillachu canguichij? ¿Manachu cancunaca llaquilla cana canguichij? ¿Chai juchata ruraj runataca manachu cancunapuramanta llujshichina canguichij?
3 Cancunahuan ñuca mana chaipi cashpapish ñuca espirituca cancunahuanmi. Juchata ruraj runataca ñuca chaipi cashca shinallatajmi ña juzgashcani.
4 Ñucaca espiritupimi cancunahuan cani. Ñucanchij Amito Jesusmantapishmi poderta chasquishcani. Chaimanta Amito Jesuspaj shutipi tandanacushpa,
5 chai runa apamushca jucha congregacionmanta anchurichun paitaca Satanasman entregaichij. Chashna rurajpimi Amito Jesús shamushpa gentecunata juzgana punllapica huauqui panicunaca alli yuyaita charingacuna.
6 Jatun tucunaca mana allichu can. ¿Ashalla levadura tucui masata pꞌunguillichij cashcataca manachu yachanguichij?
7 Mushuj masa cangapajca mauca levadurata anchuchichij. Cancunaca levadura illaj masa shinami canguichij. Cristoca paipaj causaitami sacrificiota shina curca. Chashnami paica ñucanchij Pascua malta oveja tucurca.
8 Chaimanta fiestataca* mauca levadurahuanca ama rurashunchijchu. Levadura shina caj mana alli, millai ruraicunahuanpish ama rurashunchijchu. Chaipaj randica levadura illaj tandata micushunchij. Chaica alli shunguta, mana llulla shunguta charishca shinami can.
9 Cancunamanca shuj cartapimi huainayajcunahuan* ama tandanacushpa catichun nishpa quillcarcani.
10 Chaihuanca huainayashpa causaj cai pacha gentecunamanta, shujtajcunapajta munajcunamanta, shuhuajcunamanta, rurashcalla dioscunata adorajcunamanta libritaj anchurina cashcataca mana nisha nircanichu. Chashna cana cajpica cai pachamantami llujshina canguichijman.
11 Cunanca caitami cancunamanca quillcani. Huauquimi cani nishca jahua huainayaj, shujtajcunapajta munaj, rurashcalla dioscunata adoraj, cꞌamij, machaj, shuhuaj runahuanca ama tandanacunguichijchu. Paihuanca micungapajllapish ama tiyaringuichijchu.
12 Shinaca ¿imamantataj canllaman cajcunata ñucaca juzgashari? Cancunami congregación ucupi cajcunataca juzgana canguichij.
13 Diosmi canllapi cajcunataca juzganga. “Cancunapurapi caj millai runata llujshichichij”.
Notacuna
^ Griego rimaipica: “pornéia” ninmi. “Huainayana” shimita huasha diccionariopi ricui.
^ Griego rimaipica: “pornéia” ninmi. “Huainayana” shimita huasha diccionariopi ricui.
^ Griego rimaipica: “llajtacunapurapipish” ninmi.
^ Caipica Levadura illaj tandata micuna fiestamantami parlacun.
^ “Huainayana” shimita huasha diccionariopi ricui.
