Bibliapica cai pachapaj ruraicuna tucurinapaj imalla tucuna cashcata, gentecunapish ima shina cana cashcatami yachachin (Mateo 24:3). Cai tiempotaca Bibliaca ‘tucuri punllacuna’ ninmi (Daniel 8:19; 2 Timoteo 3:1).

 Bibliapica tucuri punllacuna tucurimucujpi chai tiempollapitaj achca señalcuna pajtarina cashcatami ricuchin (Lucas 21:7). Huaquin ejemplocunata ricushunchij:

 Muyundij allpapimi guerracuna tiyanga. Jesusca: “Shuj mama llajtaca caishuj mama llajtahuanmi macanacunga. Shuj gobiernoca caishuj gobiernohuanmi macanacunga” nircami (Mateo 24:7). Shinallataj Apocalipsis 6:4-pica shuj ‘caballo jahuapi tiyacujca cai allpapi sumaj causaita anchuchina’ cashcatami huillan. Caica jatun macanacuicuna tiyana cashcatami ricuchin.

 Yaricaicunami tiyanga. Jesusca ‘chꞌican chꞌican llajtacunapi yaricai’ tiyana cashcatami huillarca (Mateo 24:7). Apocalipsis libropica shuj yana caballopi tiyacujmantapishmi parlan. Caimi muyundij allpapi yaricai tiyanata ricuchin (Apocalipsis 6:5, 6).

 Jatun terremotocunami tiyanga. Jesusca muyundij allpapi o ‘chꞌican chꞌican llajtacunapi terremotocuna tiyana’ cashcatami huillarca (Mateo 24:7; Lucas 21:11). Cai jatun terremotocunamantami mana nunca tiyashca achca huañuicuna, llaquicunapish tiyana carca.

 Ungüicunami tiyanga. Jesusca tucui laya ‘millai ungüicunapish’ tiyana cashcatami huillarca (Lucas 21:11, Biblia en Quichua Chimborazo, 2010).

 Millai ruraicunami tiyanga. Gentecunaca achca huatacunatami millaita rurashpa causashcacuna. Pero Jesusca tucuri punllacuna tucuringapajca ‘millai ruraicuna yallitaj mirarina’ cashcatami huillarca (Mateo 24:12).

 Allpataca achcatami llaquichingacuna. Apocalipsis 11:18-pica gentecuna cai allpata llaquichina cashcatami liyinchij. Caita nishpaca mana millai ruraicunallamantachu parlan. Ashtahuanpish achcacuna cai allpapi tiyashcacunata llaquichinamantami parlan.

 Gentecunaca punllantami ashtahuan millai tucungacuna. Bibliapica: ‘Gentecunaca mana pagui nijcuna, shujtajcunamanta caruyajcuna, alli tucunata mana munajcuna, yangamanta juchachijcuna, mana jarcarijcuna, pꞌiña millaicuna, ima allitapish pꞌiñajcuna, amigocunahuan contra tucujcuna, mana uyasha nijcuna, shujtajcunata yalli casha nijcunami cangacuna’ ninmi (2 Timoteo 3:1-4). Bibliapica gentecuna chashna millai tucushcamantami tucuri punllacunaca ‘mana ahuantaipaj, sinchi llaqui punllacuna’ cana cashcata parlan.

 Familiacunami chꞌicanyaringacuna. 2 Timoteo 3:2, 3-pica achca gentecunaca ‘familia ucupi cꞌuyaita mana ricuchishpa’ causajcuna cashcata, huahuacunapish ‘yaya mamata mana cazushpa’ causana cashcatami parlan.

 Gentecunaca Diosta cꞌuyanatami saquingacuna. Jesusca ‘achcacunapaj cꞌuyaimi chiriyanga’ nishpaca achca gentecuna Diosta cꞌuyanata saquina cashcatami parlarca (Mateo 24:12). 2 Timoteo 3:4-pipish gentecuna cai tucuri punllacuna tucurinapajca ‘Diosta cꞌuyanapaj randica paicunapaj quiquin munaillata rurana’ cashcatami parlan.

 Jahua shungullami Diosta adorangacuna. 2 Timoteo 3:5-pica cai gentecunamanta parlashpaca: “Ricuipica tucui shunguhuan Diosta adoracuj shinami cangacuna” ninmi. Pero paicunapaj causaihuanca Diosta mana sirvishcatami ricuchingacuna.

 Bibliapi huillashca profeciacunataca ashtahuan allimi intindingacuna. Danielca tucuri punllacunapi causaj achca gentecuna Bibliapi yachachishcacunata ashtahuan alli intindina cashcatami parlarca. Por ejemplo, cai punllacunapi pajtaricuj profeciacunatami ashtahuan alli intindingacuna (Daniel 12:4).

 Muyundij allpapimi Diospaj Shimimanta alli huillaicunata huillangacuna. Jesusca: ‘Diospaj Gobiernomanta alli huillaicunatami muyundij allpapi huillangacuna’ nircami (Mateo 24:14).

 Imata mana cazushpa chanzata rurashpami burlaringacuna. Jesusca achca gentecunaca tucuri punllacunapaj señalcunata ricushpapish mana cazusha nishcatami huillarca (Mateo 24:37-39). 2 Pedro 3:3, 4-pi nishca shinaca, gentecunaca cai señalcunata ricushpapish, caicunaca imata mana ricuchinchu nishpami burlaringacuna.

 Tucui profeciacunami pajtaringa. Jesusca tucuri punllacuna tucurinapajca huaquin profeciacunalla pajtarina cashcataca mana yachachircachu. Ashtahuanpish tucui profeciacuna chai tiempollapitaj pajtarina cashcatami yachachirca (Mateo 24:33).

 Ari. 1914 huatapi Primera Guerra Mundial nishca macanacui callarishcata ricushpa, Bibliapi tiyaj profeciacunata ricushpa, cai allpapi imalla tucucushcata ricushpami tucuri punllacuna 1914 huatapi callarishcata intindinchij. Cai catij videota ricushpaca tucuri punllacunapi causacushcatami cuentata cungui:

 1914 huatapimi Diospaj Gobiernoca jahua pachapi mandai callarirca. Jahua pachapi ña mandai callarishpaca Diablotapish, demoniocunatapishmi cai allpaman shitarca. Chai punllamantami Diabloca cai allpallapi millaita rurashpa causacushca (Apocalipsis 12:7-12). Gentecuna millaicunata rurajta ricushpami Diablo chai gentecunata pandachicushcata cuentata cunchij. Chaimantami cai ‘tucuri punllacunaca mana ahuantaipaj sinchi, llaqui punllacuna’ can (2 Timoteo 3:1).

 Achca gentecunaca cai sinchi punllacunapi causacushcamantami dimastij llaquilla sintirincuna. Cutin maijancunaca, gentecunaca ña mana tandalla causai tucungacunachu nishpami sustarincuna. Shujtajcunacarin, gentecunaca caishuj chaishuj huañuchinacushpami chingaringacuna nishpami sustarincuna.

 Shinapish achca gentecunaca cai allpapi tiyaj millai ruraicunamanta sustarishpapish shamuj punllacunapi sumaj causai tiyanata yachashpami cushicuncuna. Pero ¿imamantataj chashna cushilla cancuna? Paicunaca Yayitu Diospaj Gobierno cai tucui llaquicunata tucuchinatami seguros cancuna (Daniel 2:44; Apocalipsis 21:3, 4). Paicunaca “tucuringacama ahuantajllami quishpiringa” Jesús nishcata yuyarishpami cushicuncuna. Chaimantami Yaya Dios pai cusha nishcacunata cungacama pacienciahuan shuyashpa caticuncuna (Mateo 24:13; Miqueas 7:7).