¿Jesusca ima shinataj ñucanchijta quishpichi tucun?
Bibliaca caitami yachachin
Jesusca huañushpami alli shungu gentecunata quishpichirca (Mateo 20:28). Chaimantami Bibliapica Jesustaca: “Cai pachapi causajcunata Quishpichij” nin (1 Juan 4:14). “Ashtahuanpish pi shujtaj Quishpichijca mana tiyanchu. Cai pachapi causajcunata quishpichichunca Taita Diosca pi shujtajtaca mana cushcachu. Jesusllami quishpichi tucun” ninmi (Hechos 4:12).
Jesusca tucui paipi crijcunamantami huañurca (Hebreos 2:9; Juan 3:16). Qꞌuipaca Jehová Dios causachijpimi espíritu shina Jesusca jahua pachaman tigrarca (Hechos 3:15). Jahua pachamantami ‘Jesusca maijanpish paimanta Diosman cꞌuchuyajtaca, huiñaipaj quishpichi tucun. Paicunamanta Diosta mañashpami huiñaita causacun’ (Hebreos 7:25).
¿Jehová Dioshuan, Jesús ñucanchijmanta rimachunca imamantataj minishtinchij?
Tucuicuna juchayuj cashcamanta (Romanos 3:23). Juchami huañuimanpish apan. Diosmantapish caruyachin (Romanos 6:23). Pero Jesusca shuj abogado shina paipi feta churajcunatami ayudan (1 Juan 2:1). Paica ñucanchijmanta huañushpami ñucanchij juchacunata perdonachun, ñucanchij mañashcacunata uyachun Diosta mañashpa ayudan (Mateo 1:21; Romanos 8:34). Jehová Diosca Jesustaca cai pachapi causajcuna paillamanta quishpirichunmi cacharca. Chaimantami Jesús ñucanchijmanta mañajpica Yayitu Diosca chasquin (Juan 3:17).
¿Quishpiringapajca Jesuspi crinallachu minishtirin?
Mana. Quishpiringapajca mana Jesusllapi crinachu canchij (Hechos 16:30, 31). Ashtahuanpish Bibliapica: “Ima shinami alma illajlla cuerpoca huañushca. Chashnallatajmi ima rurashcacuna illajlla crijca huañushcallataj” ninmi (Santiago 2:26). Quishpiringapajca catij yuyaicunatami pajtachina canchij:
Yayitu Jehová Diosmanta, Jesusmantami yachana canchij (Juan 17:3).
Jesuspipish, Jehová Diospipishmi crina canchij (Juan 12:44; 14:1).
Crishcata ricuchingapajca Dios mandashcacunatami cazuna canchij (Lucas 6:46; 1 Juan 2:17). Jesusca: ‘Ñucata: “¡Mandaj Jesús, Mandaj Jesús!” nijcunaca mana tucuicuna quishpiringacunachu. Ashtahuanpish ñuca Yayapaj munaita rurajcunami, quishpiringa’ nircami (Mateo 7:21).
Llaquicunata charishpapish feta charishcatami ricuchina canchij. Jesusca: “Tucuringacama catijllami quishpiringa” nircami (Mateo 24:13).
Puede que también le interese
BIBLIAMANTA IMPORTANTE YACHAICUNA
¿Jesusca imamantataj huañurca?
Jesusca ñucanchij juchacunamantami huañurca. Pero shuj runalla huañushpaca ¿ima shinataj tucuicunata ayudai tucun?
HUILLAJ
Sumaj causaitami chari tucungui
Dios cusha nishca causaita charingapajca paita cꞌuyana huiñai causaita apaj ñantami purina canchij.
BIBLIAMANTA YACHAICUNA
Cai publicacionhuan Bibliamanta yachai
Shuj yachachijhuan Bibliamanta gratis yachai.